ਲੁਧਿਆਣਾ
ਕੋਰੋਨਾ ਯੁੱਗ ਵਿਚ ਮਨੋਰੰਜਨ ਉਦਯੋਗ ਦੀ ਇਕ ਹੋਰ ਬੁਰੀ ਖ਼ਬਰ ਹੈ । ਪਲੇਅਬੈਕ ਗਾਇਕ ਐਸ ਪੀ ਬਾਲਾ ਸੁਬਰਾਮਣੀਅਮ ਦੀ ਕੋਰੋਨਾ ਨਾਲ ਲੰਮੀ ਲੜਾਈ ਤੋਂ ਬਾਅਦ ਮੌਤ ਹੋ ਗਈ ਹੈ । ਉਨ੍ਹਾਂ ਨੂੰ ਅਗਸਤ ਦੇ ਮਹੀਨੇ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਬਾਲਾ ਸੁਬਰਾਮਣੀਅਮ ਨੂੰ ਸਲਮਾਨ ਖਾਨ ਦੀ ਅਵਾਜ਼ ਵੀ ਕਿਹਾ ਜਾਂਦਾ ਸੀ। ਉਨ੍ਹਾਂ ਨੇ ਸਲਮਾਨ ਦੇ ਕਈ ਹਿੱਟ ਗਾਣੇ ਗਾਏ ਹਨ। ਸਲਮਾਨ ਖਾਨ ਨੇ ਉਨ੍ਹਾਂ ਦੀ ਹਾਲਤ ਨਾਜ਼ੁਕ ਹੋਣ ਦੀ ਖ਼ਬਰ ਤੋਂ ਬਾਅਦ ਵੀਰਵਾਰ ਨੂੰ ਉਨ੍ਹਾਂ ਦੇ ਜਲਦੀ ਸਿਹਤਯਾਬੀ ਲਈ ਅਰਦਾਸ ਕੀਤੀ ਸੀ । ਸਲਮਾਨ ਨੇ ਟਵੀਟ ਕੀਤਾ ਸੀ, ਬਾਲਾ ਸੁਬਰਾਮਨੀਅਮ ਸਰ, ਮੈਂ ਜ਼ਲਦੀ ਠੀਕ ਹੋਣ ਲਈ ਆਪਣੇ ਦਿਲ ਦੀ ਗਹਿਰਾਈ ਤੋਂ ਪੂਰੀ ਤਾਕਤ ਅਤੇ ਦੁਆਵਾਂ ਦਿੰਦਾ ਹਾਂ। ਮੇਰੇ ਲਈ ਤੁਹਾਡੇ ਵਲੋਂ ਗਾਏ ਗਾਣੇ ਨੂੰ ਵਿਸ਼ੇਸ਼ ਬਣਾਉਣ ਲਈ ਤੁਹਾਡਾ ਧੰਨਵਾਦ, ਤੁਹਾਡੀ ਆਵਾਜ਼ ਤੇ ਦਿਲ ਮਹਾਨ ਹਨ । ਆਈ ਲਵ ਯੂ ਸਰ ।
ਐਸ ਪੀ ਬਾਲਾ ਸੁਬ੍ਰਾਹਮਣਯਮ ਨੇ 16 ਭਾਰਤੀ ਭਾਸ਼ਾਵਾਂ ਵਿੱਚ 40 ਹਜ਼ਾਰ ਤੋਂ ਵੱਧ ਗਾਣੇ ਗਾਏ ਹਨ। ਉਨ੍ਹਾਂ ਨੂੰ ਪਦਮ ਸ਼੍ਰੀ (2001) ਅਤੇ ਪਦਮਭੂਸ਼ਣ (2011) ਸਮੇਤ ਕਈ ਪੁਰਸਕਾਰ ਵੀ ਮਿਲ ਚੁੱਕੇ ਹਨ। ਐਸ ਪੀ ਬਾਲਾ ਸੁਬਰਾਮਣੀਅਮ ਨੇ ਪਹਿਲੀ ਹਿੰਦੀ ਫਿਲਮ 'ਏਕ ਦੂਜੇ ਕੇ ਲਿਏ' (1981) ਵਿਚ ਆਪਣੀ ਆਵਾਜ਼ ਦਿੱਤੀ ਸੀ । ਉਸ ਨੂੰ ਇਸ ਫਿਲਮ ਲਈ ਸਰਬੋਤਮ ਪੁਰਸ਼ ਪਲੇਅਬੈਕ ਸਿੰਗਰ ਦਾ ਰਾਸ਼ਟਰੀ ਫਿਲਮ ਪੁਰਸਕਾਰ ਮਿਲਿਆ ਸੀ। 1989 ਵਿਚ ਉਸਨੇ ਸਲਮਾਨ ਖਾਨ ਲਈ ਗਾਉਣਾ ਸ਼ੁਰੂ ਕੀਤਾ ਅਤੇ ਉਸਦੀ ਆਵਾਜ਼ ਬਣ ਗਏ । ਉਨ੍ਹਾਂ ਨੇ 'ਮੈਂਨੇ ਪਿਆਰ ਕੀਆ' ਅਤੇ ਹਮ ਆਪ ਕੇ ਹੈਂ ਕੌਨ 'ਚ ਸਲਮਾਨ ਦੇ ਗਾਣਿਆਂ ਨੂੰ ਆਵਾਜ਼ ਦਿੱਤੀ ਸੀ। ਫ਼ਿਲਮਾਂ ਬਲਾਕਬਸਟਰ ਸਨ ਅਤੇ ਗਾਣਿਆਂ ਨੂੰ ਅੱਜ ਵੀ ਪਸੰਦ ਕੀਤਾ ਜਾਂਦਾ ਹੈ ।