ਸੱਭਿਆਚਾਰਕ ਮੇਲਿਆਂ ਦਾ ਸ਼ਿਗਾਰ ਹੈ ਇਹ ਦੋਗਾਣਾ ਜੋੜੀ
ਦੋਸਤੇ ਜਿਵੇਂ ਕਿ ਆਪਾਂ ਸਭ ਜਾਣਦੇ ਹੀ ਹਾਂ ਕਿ ਸਟੂਡੀਓ ਵਿੱਚ ਗੀਤ ਗਾਉਣ ਅਤੇ ਖੁੱਲ੍ਹੇ ਅਖਾੜੇ ਵਿੱਚ ਗਾਉਣ ਵਿੱਚ ਜਮੀਨ ਅਸਮਾਨ ਦਾ ਫ਼ਰਕ ਹੁੰਦਾ ਹੈ । ਕਿਉਂਕਿ ਸਟੂਡੀਓ ਵਿੱਚ ਤਾਂ ਬਹੁਤ ਕਲਾਕਾਰ ਗੀਤ ਗਾ ਲੈੰਦੇ ਹਨ ਪਰ ਕੋਈ ਗਵੱਈਆ ਤਾਂ ਹੀ ਲੋਕ ਗਾਇਕਾਂ ਦੀ ਗਿਣਤੀ ਵਿੱਚ ਆਉਂਦਾ ਹੈ ਜਦ ਲੋਕਾਂ ਦੇ ਸਾਹਮਣੇ ਭਰੇ ਅਖਾੜੇ ਵਿੱਚ ਆਪਣੇ ਗਲੇ ਦੀ ਮਿਠਾਸ ਨੂੰ ਹਿੱਕ ਦੇ ਜੋਰ ਨਾਲ ਕੱਢ ਕੇ ਸਰੋਤਿਆਂ ਦੀ ਰੂਹ ਨੂੰ ਸੰਤੁਸ਼ਟੀ ਦਿੰਦਾ ਹੈ । ਅਜਿਹੀ ਹੀ ਫਨਕਾਰ ਜੋੜੀ ਹੈ ਰੇਸ਼ਮ ਸਿਕੰਦਰ ਅਤੇ ਬੇਅੰਤ ਕੌਰ ਦੀ , ਜਿੰਨ੍ਹਾਂ ਨੂੰ ਸੁਣਨ ਵਾਲਿਆਂ ਨੇ ਲੋਕ ਗਾਇਕਾਂ ਵਾਲੀ ਮੁਹਰਲੀ ਕਤਾਰ ਵਿੱਚ ਰੱਖਿਆ ਹੈ । ਇਸ ਜੋੜੀ ਦੇ ਹੁਣ ਤੱਕ ਮਾਰਕਿਟ ਵਿੱਚ ਆਏ ਗੀਤਾਂ ਨੂੰ ਬਹੁਤ ਦੇਖਿਆ ਅਤੇ ਸੁਣਿਆ ਜਾਂਦਾ ਹੈ । ਰੇਸ਼ਮ ਸਿਕੰਦਰ ਅਤੇ ਬੇਅੰਤ ਕੌਰ ਦੇ ਹੁਣ ਤੱਕ ਮਾਰਕਿਟ ਵਿੱਚ ਆਏ ਚਰਚਿਤ ਗੀਤਾਂ ਵਿੱਚ ਰੱਬ ਮੰਨ ਬੈਠੇ , ਮੁਟਿਆਰ , ਟਰੈਕਟਰ , ਸਾਨੂੰ ਕਾਹਤੋਂ ਪਿਆਰ ਕੀਤਾ , ਤੇਰੇ ਤੋਂ ਬਗੈਰ ਜੱਟੀਏ , ਡਰਾਇਵਰ , ਲਾਈਨਾਂ ਵਿੱਚ ਲੱਗੇ ਲੋਕ ਅਤੇ 7 ਬੈਂਡ ਆਦਿ ਦਾ ਜਿਕਰ ਆਉਂਦਾ ਹੈ ਜਿਨ੍ਹਾਂ ਨੇ ਸਰੋਤਿਆਂ ਤੋਂ ਖੂਬ ਪਿਆਰ ਬਟੋਰਿਆ ਹੈ । ਹਾਲ ਹੀ ਵਿੱਚ ਗੁਰਮੀਤ ਸਿੰਘ ਜੀਤਾ ਦੀ ਪੇਸ਼ਕਸ਼ ਅਤੇ ਆਰ.ਡੀ.ਅੈਕਸ ਮਿਊਜ਼ਿਕ ਦੇ ਬੈਨਰ ਹੇਠ ਰੇਸ਼ਮ ਸਿਕੰਦਰ ਅਤੇ ਬੇਅੰਤ ਕੌਰ ਦਾ ਨਵਾਂ ਡਿਊਟ ਸੌੰਗ 'ਸ਼ੱਕ ਦਿਲ ਚ' ਰੀਲੀਜ਼ ਹੋਇਆ ਹੈ ਜਿਸਨੂੰ ਗੀਤਕਾਰ ਜੱਸਾ ਲਿਖਾਰੀ ਦੀ ਕਲਮ ਨੇ ਜਨਮਿਆਂ ਹੈ ਅਤੇ ਮਿਊਜ਼ਿਕ ਡਾਇਰੈਕਟਰ ਡੀ.ਸਟੂਡੀਓ ਨੇ ਸੰਗੀਤ ਦੀ ਖੁਰਾਕ ਦੇ ਕੇ ਜਵਾਨ ਕੀਤਾ ਹੈ । ਇਸ ਗੀਤ ਦਾ ਵੀਡੀਓ ਢਿਲੋਂ ਫਿਲਮਜ਼ ਵੱਲੋਂ ਡੀ.ਓ.ਪੀ ਬਲਵੀਰ ਸਦਿਓੜਾ ਦੁਆਰਾ ਬਹੁਤ ਵੀ ਵਧੀਆ ਢੰਗ ਨਾਲ ਫਿਲਮਾਇਆ ਗਿਆ ਹੈ । ਇਸ ਡਿਊਟ ਸੌਂਗ ਨੂੰ ਦਰਸ਼ਕ ਸ਼ੋਸ਼ਲ ਮੀਡੀਆ ਅਤੇ ਵੱਖ - ਵੱਖ ਸਾਈਟਾਂ ਤੇ ਦੇਖ ਰਹੇ ਹਨ ਅਤੇ ਇਹ ਦੋਗਾਣਾ ਕਾਫ਼ੀ ਪਸੰਦ ਕੀਤਾ ਜਾ ਰਿਹਾ ਹੈ ।