ਦੁਨੀਆ ਭਰ ਦੇ ਕਈ ਦੇਸ਼ਾਂ ਵਿਚ ਸਥਿਤੀ ਮੁੜ ਗੰਭੀਰ ਹੋ ਰਹੀ ਹੈ । ਅਮਰੀਕਾ ਵਿਚ ਪਿਛਲੇ ਦੋ ਦਿਨਾਂ ਵਿਚ ਲਗਭਗ ਦੋ ਲੱਖ ਦੇ ਕਰੀਬ ਹੋਰ ਨਵੇਂ ਮਰੀਜ਼ ਕਰੋਨਾ ਵਾਇਰਸ ਤੋਂ ਪੀੜਤ ਹੋਏ ਜਦਕਿ ਇੰਗਲੈਂਡ ਨੇ ਸਥਿਤੀ ਨਾਲ ਨਜਿੱਠਣ ਲਈ ਇਕ ਮਹੀਨੇ ਦਾ ਦੁਬਾਰਾ ਅੰਸ਼ਕ ਲੋਕ ਡਾਊਨ ਲਗਾ ਦਿੱਤਾ ਹੈ । ਬੀਤੇ 24 ਘੰਟਿਆਂ ਦੌਰਾਨ ਫਰਾਂਸ ਵਿੱਚ 35, 641, ਇਟਲੀ ਵਿਚ 31, 758, ਇੰਗਲੈਂਡ ਵਿਚ 21, 915, ਪੋਲੈਂਡ ਵਿਚ 21, 798, ਬੈਲਜ਼ੀਅਮ ਵਿਚ 20, 056, ਰੂਸ ਵਿਚ 18, 140, ਬ੍ਰਾਜ਼ੀਲ ਵਿਚ 16, 077 ਅਤੇ ਜਰਮਨੀ ਵਿਚ 15 ਹਜ਼ਾਰ ਦੇ ਕਰੀਬ ਹੋਰ ਨਵੇਂ ਮਰੀਜ਼ਾਂ ਦਾ ਵਾਧਾ ਹੋਇਆ । ਕਈ ਦੇਸ਼ਾਂ ਵਲੋਂ ਮੁੜ ਸਖ਼ਤੀ ਕੀਤੇ ਜਾਣ ਦੇ ਵਿਰੋਧ ਵਿਚ ਕਈ ਸਥਾਨਾਂ ਤੇ ਲੋਗ ਵਿਰੋਧ ਪ੍ਰਗਟ ਕਰਨ ਲਗ ਪਏ ਹਨ ਜਦਕਿ ਭਾਰਤੀ ਸਿਹਤ ਸਿੱਖਿਆ ਦੇ ਪ੍ਰਮੁੱਖ ਸੰਸਥਾਨ ਏਮਜ਼ ਦੇ ਨਿਰਦੇਸ਼ਕ ਸ੍ਰੀ ਗੁਲੇਰੀਆ ਨੇ ਕਲ੍ਹ ਹੀ ਚਿੰਤਾ ਪ੍ਰਗਟ ਕੀਤੀ ਸੀ ਕਿ ਦੇਸ਼ ਵਿਚ ਤਿਉਹਾਰਾਂ ਦਾ ਸੀਜ਼ਨ ਹੋਣ ਕਾਰਨ ਇਹ ਮਹਾਂ ਮਾਰੀ ਮੁੜ ਤੇਜ਼ੀ ਨਾਲ ਫੈਲ ਸਕਦੀ ਹੈ ਇਸ ਲਈ ਦੇਸ਼ ਵਾਸੀਆਂ ਨੂੰ ਕਿਸੇ ਤਰ੍ਹਾਂ ਦੀ ਅਣਗਿਹਲੀ ਨਹੀਂ ਕਰਨੀ ਚਾਹੀਦੀ ।