ਖਰੜ :- ਉੱਘੇ ਲੋਕ ਪੱਖੀ ਫ਼ਿਲਮ ਸਾਜ ਰਾਜੀਵ ਕੁਮਾਰ ਨੇ ਦਿੱਲੀ ਵਿਖੇ ਟਿੱਕਰੀ ਬਾਰਡਰ 'ਤੇ ਲੱਗੇ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਮੀਲਾਂ ਲੰਮੇਂ ਪੰਡਾਲ ਵਿੱਚ ਪਹੁੰਚ ਕੇ ਇਹ ਐਲਾਨ ਕੀਤਾ ਕਿ " ਮੈਂ ਕਿਸਾਨਾਂ 'ਤੇ ਮੜ੍ਹੇ ਖੇਤੀ ਕਾਨੂੰਨਾਂ ਅਤੇ ਇਸ ਮੁੱਦੇ 'ਤੇ ਕੇਂਦਰੀ ਹਕੂਮਤ ਦੇ ਨਾਂਹ ਪੱਖੀ ਰਵੱਈਏ ਦੇ ਚੱਲਦਿਆਂ ਆਪਣੀਆਂ ਫਿਲਮਾਂ ਲਈ ਮਿਲੇ ਹੋਏ ਰਾਸ਼ਟਰਪਤੀ ਅਵਾਰਡ ਨੂੰ ਵਾਪਸ ਕਰਦਾ ਹਾਂ"। ਉਹਨਾਂ ਆਖਿਆ ਕਿ ਮੈਂ ਜਿਹਨਾਂ ਕਿਰਤੀ ਲੋਕਾਂ ਦੀ ਬੇਹਤਰੀ ਲਈ ਆਪਣੀਆਂ ਫ਼ਿਲਮਾਂ ਦਾ ਨਿਰਮਾਣ ਕੀਤਾ ਜਿਸ ਦੇ ਬਦਲੇ ਮੈਨੂੰ ਅਵਾਰਡ ਪ੍ਰਾਪਤ ਹੋਏ ਹਨ ਪਰ ਅੱਜ ਉਹੀ ਲੋਕ ਸਰਦ ਰਾਤਾਂ 'ਚ ਸੜਕਾਂ 'ਤੇ ਰੁਲ ਰਹੇ ਹਨ ਅਤੇ ਸਰਕਾਰ ਉਹਨਾਂ ਵੱਲ ਧਿਆਨ ਨਹੀਂ ਦੇ ਰਹੀ ਅਜਿਹੇ ਹਲਾਤਾਂ 'ਚ ਸਰਕਾਰ ਵੱਲੋਂ ਮਿਲੇ ਅਵਾਰਡ ਨੂੰ ਆਪਣੇ ਕੋਲ ਰੱਖਣਾ ਵਾਜਬ ਨਹੀਂ। ਇਸ ਮੌਕੇ ਪੰਡਾਲ 'ਚ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੇ ਸੂਬਾ ਪ੍ਰਧਾਨ ਜੋਗਿੰਦਰ ਸਿੰਘ ਉਗਰਾਹਾਂ ਤੇ ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਝੰਡਾ ਸਿੰਘ ਜੇਠੂਕੇ ਤੋਂ ਇਲਾਵਾ ਪਲਸ ਮੰਚ ਦੇ ਪ੍ਰਧਾਨ ਅਮੋਲਕ ਸਿੰਘ ਵੀ ਮੌਜੂਦ ਸਨ। ਰਾਜੀਵ ਕੁਮਾਰ ਅਤੇ ਸੁਰਿੰਦਰ ਸ਼ਰਮਾਂ ਆਪਣੇ ਸਾਥੀਆਂ ਸਮੇਤ ਕਿਸਾਨਾਂ ਦੇ ਇਕੱਠ 'ਚ ਪੁੱਜੇ ਅਤੇ ਉਹਨਾ ਆਪਣੀਆਂ ਫਿਲਮਾਂ ਬਦਲੇ ਮਿਲੇ ਰਾਸ਼ਟਰਪਤੀ ਅਵਾਰਡ ਵਾਪਸ ਕਰਨ ਦਾ ਐਲਾਨ ਕਰ ਦਿੱਤਾ। ਵਰਨਣਯੋਗ ਹੈ ਕਿ ਰਾਜੀਵ ਕੁਮਾਰ ਨਾਬਰ, ਆਤੂ ਖੋਜੀ, ਚੰਮ , ਆਪਣਾ ਪਾਸ਼ ਤੇ ਸੀਰੀ ਵਰਗੀਆਂ ਬਹੁ ਚਰਚਿਤ ਫ਼ਿਲਮਾਂ ਦਾ ਨਿਰਮਾਣ ਕਰਨ ਰਾਹੀਂ ਦੇਸ਼ ਵਿਦੇਸ਼ 'ਚ ਵਸਦੇ ਪੰਜਾਬੀ ਜਗਤ ਦੇ ਅੰਦਰ ਨਾਮਣਾ ਖੱਟ ਚੁੱਕੇ ਹਨ।