ਮੋਹਾਲੀ -ਬਾਬਾ ਰਾਮ ਸਿੰਘ ਸੀਘੜੇ ਵਾਲਿਆਂ ਕਿਸਾਨ ਅੰਦੋਲਨ ਚ ਘੇਸ ਮਾਰ ਬੈਠੀ, ਮੋਦੀ ਸਰਕਾਰ ਜਗਾਉਣ ਤੇ ਭਾਜਪਾ ਹਾਈ ਕਮਾਂਡ ਦੇ ਅੜੀਅਲ ਰਵਈਏ ਖਿਲਾਫ ਆਪਣੇ ਆਪ ਨੂੰ ਗੋਲੀ ਮਾਰ ਕੇ ਸ਼ਹਾਦਤ ਦਾ ਜਾਮ ਪੀਤਾ ਤਾਂ ਜੋ ਵਿਸ਼ਵ ਭਰ ਚ ਪਤਾ ਲੱਗ ਸਕੇ ਕਿ ਲੋਕਤੰਤਰ ਦੇ ਬੁਰਕੇ ਹੇਠ ਭਾਜਪਾਈ ਡਿਕਟੇਟਰ ਬਣੇ ਪਏ ਹਨ । ਇਹ ਪ੍ਰਗਟਾਵਾ ਅਕਾਲੀ ਦਲ 1920 ਦੇ ਪ੍ਰਧਾਨ ਸ ਰਵੀਇੰਦਰ ਸਿੰਘ ਨੇ ਬਾਬਾ ਰਾਮ ਸਿੰਘ ਸਿੰਘ ਸੀਘੜੇ ਵਾਲੇ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕਰਦਿਆਂ ਕਿਹਾ ਕਿ ਮੋਦੀ ਹਕੂਮਤ ਲੋਕਤੰਤਰੀ ਪ੍ਰੰਪਰਾਵਾਂ ਬਿਲਕੁਲ ਭੁੱਲ ਗਈ ਹੈ ਤੇ ਉਹ ਇਹ ਸਮਝਦੀ ਹੈ ਕਿ ਜਿਸ ਤਰਾਂ ਉਸ ਦਾ ਹੀ ਰਾਜ ਇਥੇ ਰਹਿਣਾ ਹੈ । ਇਹ ਕਿਸਾਨੀ ਅੰਦੋਲਨ ਚ ਪਹਿਲੀ ਕੁਰਬਾਨੀ ਹੈ । ਕੜਾਕੇ ਦੀ ਠੰਡ ਵਿੱਚ ਹੋਰ ਵੀ ਕਿਸਾਨਾਂ ਆਪਾ ਵਾਰਿਆ ਹੈ । ਬਾਬਾ ਰਾਮ ਸਿੰਘ ਨੇ ਆਖਰੀ ਸ਼ਬਦ ਲਿੱਖੇ ਹਨ ਕਿ ਇਸ ਸੰਘਰਸ਼ ਚ ਕਿਸਾਨ ਬਜੁਰਗ ਤੇ ਔਰਤਾਂ ਅਤੇ ਮਜ਼ਦੂਰ ਸੜਕਾਂ ਤੇ ਰੁੱਲ ਰਿਹਾ ਹੈ । ਸ ਰਵੀਇੰਦਰ ਸਿੰਘ ਨੇ ਦਾਅਵੇ ਨਾਲ ਆਖਿਆ ਕਿ ਉਨਾ ਦੀ ਕੁਰਬਾਨੀ ਚਲ ਰਹੇ ਸੰਘਰਸ਼ ਨੂੰ ਨਵਾ ਮੋੜ ਦੇਵੇਗੀ । ਇਹ ਜਿਕਰਯੋਗ ਹੈ ਕਿ ਕਰੀਬ 23 ਦਿਨਾਂ ਤੋ ਦੇਸ਼ ਦਾ ਅੰਨਦਾਤਾ ਕਾਲੇ ਕਾਨੂੰਨ ਵਾਪਸ ਲੈਣ ਲਈ ਘੋਲ ਕਰ ਰਿਹਾ ਹੈ ਪਰ ਮੋਦੀ ਹਕੂਮਤ ਪੁੰੰਜੀਪਤੀਆਂ ਦੇ ਹੱਕ ਵਿੱਚ ਚਲ ਰਹੇ ਹਨ ।