ਜੀਰਕਪੁਰ - ਢਕੋਲੀ ਪੁਲਿਸ ਨੇ ਕਿਰਾਏ ਤੇ ਮਕਾਨ ਲੈ ਕੇ ਅੱਗੇ ਵੇਚਣ ਦੇ ਦੋਸ਼ ਹੇਠ ਇੱਕ ਔਰਤ ਸਮੇਤ ਤਿੰਨ ਖਿਲਾਫ ਮਾਮਲਾ ਦਰਜ ਕੀਤਾ ਹੈ। ਪੁਲਿਸ ਸੂਤਰਾਂ ਅਨੁਸਾਰ ਬਲਕਾਰ ਸਿੰਘ ਪੁੱਤਰ ਕੁੰਦਨ ਸਿੰਘ ਵਾਸੀ ਮਕਾਨ ਨੰਬਰ 898 ਸੈਕਟਰ 69 ਮੁਹਾਲੀ ਨੇ ਸਾਲ 2006 ਵਿੱਚ ਢਕੋਲੀ ਦੀ ਆਈਵਰੀ ਇਨਕਲੇਵ ਵਿਖੇ 109 ਗੱਜ ਦਾ ਦੋ ਮੰਜਿਲਾਂ ਮਕਾਨ ਖਰੀਦਿਆ ਸੀ। ਜਿਸ ਨੂੰ ਉਸ ਨੇ ਸੁਦੇਸ਼ ਖੰਨਾ ਪੁੱਤਰ ਰਾਮ ਮੂਰਤੀ ਖੰਨਾ ਵਾਸੀ ਸ਼ਨ ਸਿਟੀ ਟਾਵਰ—12 ਪੰਚਕੁਲਾ ਉਸ ਦੀ ਪਤਨੀ ਰਿਟਾ ਖੰਨਾ ਅਤੇ ਗਗਨਦੀਪ ਸਿੰਘ ਖੰਨਾ ਪੁੱਤਰ ਪਰਮਜੀਤ ਸਿੰਘ ਵਾਸੀ ਮਕਾਨ ਨੰਬਰ 54 ਦੇਵਾਜੀ ਰੇਜ਼ੀਡੈਂਸੀ ਢਕੋਲੀ ਨੂੰ ਕਿਰਾਏ ਤੇ ਦੇ ਦਿੱਤਾ ਸੀ। ਉਸ ਨੇ ਦਸਿਆ ਕਿ ਜਦ ਉਸ ਨੇ ਸਾਲ 2015 ਵਿੱਚ ਉਨ੍ਹਾਂ ਨੂੰ ਅਪਣਾ ਮਕਾਨ ਖਾਲੀ ਕਰਨ ਲਈ ਕਿਹਾ ਤਾ ਉਸ ਨੂੰ ਪਤਾ ਲਗਿਆ ਕਿ ਉਸ ਦੇ ਕਿਰਾਏਦਾਰਾਂ ਨੇ ਉਸ ਦਾ ਮਕਾਨ ਅੱਗੇ ਕਿਸੇ ਹੋਰ ਵਿਅਕਤੀ ਨੂੰ ਵੇਚ ਦਿੱਤਾ ਹੈ।ਜਿਸ ਦੇ ਬਦਲੇ ਉਨ੍ਹਾ ਨੇ ਉਸ ਨਾਲ 60 ਲੱਖ ਰੁਪਏ ਵਿੱਚ ਸਮਝੌਤਾ ਕਰਕੇ ਉਸ ਨੂੰ ਪੰਜ ਪੰਜ ਲੱਖ ਰੁਪਏ ਦੇ ਚੈੱਕ ਦੇ ਦਿੱਤੇ। ਉਸ ਨੇ ਦਸਿਆ ਕਿ ਇੱਕ ਚੈੱਕ ਪਾਸ ਹੋਣ ਤੋਂ ਬਾਅਦ ਉਨ੍ਹਾਂ ਵਲੋਂ ਦਿੱਤੇ ਬਾਕੀ ਸਾਰੇ ਚੈੱਕ ਬਾਊਂਸ ਹੋ ਗਏ। ਜਦ ਉਸ ਨੇ ਅਪਣੇ ਪੈਸੇ ਮੰਗੇ ਤਾਂ ਉਨ੍ਹਾਂ ਨੇ ਪੈਸੇ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਜਿਸ ਤੇ ਉਸ ਨੇ ਮਾਮਲੇ ਦੀ ਸ਼ਿਕਾਇਤ ਜਿਲ੍ਹਾ ਪੁਲਿਸ ਨੂੰ ਦਿੱਤੀ ਜਿਨ੍ਹਾ ਦੀ ਪੜਤਾਲ ਤੋਂ ਬਾਅਦ ਪੁਲਿਸ ਨੇ ਉਕਤ ਤਿੰਨ ਜਣਿਆ ਖਿਲਾਫ ਧੋਖਾਧੜੀ ਦਾ ਮਾਮਲਾ ਦਰਜ ਕਰਕੇ ਅਗਲੀ ਕਾਰਵਾਈ ਆਰੰਭ ਕਰ ਦਿੱਤੀ ਹੈ।