ਕੁਰਾਲੀ- ਪਿੰਡ ਭਜੌਲੀ ਵਿਖੇ ਸਮਾਜਸੇਵੀ ਸੰਸਥਾਵਾਂ ਤੇ ਵਸਨੀਕ ਨੌਜਵਾਨਾਂ ਵੱਲੋਂ ਲੋੜਵੰਦ ਪਰਿਵਾਰ ਦੇ ਮਕਾਨ ਦੀ ਸੇਵਾ ਸ਼ੁਰੂ ਕੀਤੀ ਗਈ ਹੈ। ਇਸ ਸਬੰਧੀ ਪਿੰਡ ਭਜੌਲੀ ਵਿਖੇ ਬਜ਼ੁਰਗ ਜੋੜੇ ਦੇ ਪੁੱਤਰ ਦੀ ਮੌਤ ਹੋ ਗਈ ਸੀ ਤੇ ਨੂੰਹ ਇੱਕ ਛੋਟਾ ਲੜਕਾ ਛੱਡਕੇ ਆਪਣੇ ਘਰ ਚਲੇ ਗਈ ਸੀ। ਬਿਰਧ ਅਵਸਥਾ ਵਿੱਚ ਬਜ਼ੁਰਗ ਦਿਹਾੜੀ ਨਾ ਕਰ ਸਕਣ ਕਾਰਨ ਘਰ ਦੀ ਹਾਲਤ ਵੀ ਖਰਾਬ ਹੋ ਗਈ। ਇਸ ਹਾਲਤ ਵਿੱਚ ਪਿੰਡ ਦੇ ਨੌਜਵਾਨਾਂ ਨੇ ਉਨ੍ਹਾਂ ਦੇ ਹਾਲਾਤਾਂ ਬਾਰੇ ਅਪੀਲ ਕੀਤੀ ਅਤੇ ਆਪਣੇ ਪੱਧਰ ਤੇ ਬਜ਼ੁਰਗ ਜੋੜੇ ਦਾ ਪੁਰਾਣਾ ਮਕਾਨ ਢਾਹਕੇ ਵਸਨੀਕਾਂ ਦੀ ਮਦਦ ਨਾਲ ਸਮਾਨ ਇਕੱਤਰ ਕੀਤਾ। ਇਸ ਦੌਰਾਨ ਸਮਾਜਸੇਵੀ ਸੰਸਥਾਂ ਜੀਵਨਜੋਤ ਸੇਵਾ ਸੁਸਾਇਟੀ ਤੇ ਰਤਵਾੜਾ ਸਾਹਿਬ ਟਰੱਸਟ ਵੱਲੋਂ ਭਾਈ ਹਰਜੀਤ ਸਿੰਘ ਹਰਮਨ, ਭਾਈ ਸੁਖਵਿੰਦਰ ਸਿੰਘ ਰਤਵਾੜਾ ਸਾਹਿਬ, ਰਵਿੰਦਰ ਸਿੰਘ ਵਜੀਦਪੁਰ, ਜਗਦੇਵ ਸਿੰਘ ਮਲੋਆ, ਹੈਪੀ ਕਾਂਸਲ, ਡੋਗਰ ਖਾਨ, ਪੰਡਿਤ ਅਮਿਤ ਭਾਰਦਵਾਜ ਤੇ ਅਮਨਬੇਦੀ ਆਦਿ ਸਮਾਜ ਸੇਵੀਆਂ ਨੇ ਪੁੱਜਕੇ ਅਰਦਾਸ ਉਪਰੰਤ ਨੀਂਹ ਪੱਥਰ ਰੱਖ ਕੇ ਮਕਾਨ ਦੇ ਕਾਰਜ ਦੀ ਸ਼ੁਰੂਆਤ ਕਰਵਾਈ ਅਤੇ ਮਾਇਕ ਸਹਾਇਤਾ ਦਾ ਵੀ ਭਰੋਸਾ ਦਿੱਤਾ। ਵਸਨੀਕ ਨੌਜਵਾਨਾਂ ਨੇ ਬਜ਼ੁਰਗ ਜੋੜੇ ਅਤੇ ਛੋਟੇ ਬੱਚੇ ਦੀ ਸਹਾਇਤਾ ਲਈ ਹੋਰਨਾਂ ਸਮਾਜ ਦਰਦੀਆਂ ਨੂੰ ਵੀ ਖੁਦ ਪੁੱਜਕੇ ਸਹਾਇਤਾ ਦੀ ਅਪੀਲ ਕੀਤੀ।