ਚੰਡੀਗੜ:
ਚੰਡੀਗੜ ਦੇ ਸੈਕਟਰ 21 ਵਿੱਚ ਗਲੀ ਦੇ ਨਿਰਮਾਣ ਵਾਲੀ ਥਾਂ ’ਤੇ ਲਾਪਰਵਾਹੀ ਵਰਤਣ ਦਾ ਪਤਾ ਲੱਗਣ ਤੋਂ ਬਾਅਦ ਨਗਰ ਨਿਗਮ ਚੰਡੀਗੜ ਦੇ ਕਮਿਸ਼ਨਰ ਸ੍ਰੀਮਤੀ ਅਨਿੰਦਿਤਾ ਮਿਤਰਾ, ਆਈਏਐਸ, ਵਲੋਂ ਪੰਜਾਬ ਸਿਵਲ ਸੇਵਾ (ਪਨਿਸ਼ਮੈਂਟ ਐਂਡ ਅਪੀਲਜ਼ ) ਰੂਲਜ਼, 1970 ਦੇ ਨਿਯਮ 10 ਤਹਿਤ ਉਪ ਮੰਡਲ ਇੰਜੀਨੀਅਰ ਅਤੇ ਜੂਨੀਅਰ ਇੰਜੀਨੀਅਰ, ਪਬਲਿਕ ਹੈਲਥ ਡਵੀਜ਼ਨ, ਨਗਰ ਨਿਗਮ ਚੰਡੀਗੜ ਨੂੰ ਡਿਊਟੀ ਵਿੱਚ ਅਣਗਹਿਲੀ ਵਰਤਣ ਲਈ ਕਾਰਨ ਦੱਸੋ ਨੋਟਿਸ ਜਾਰੀ ਕਰ ਦਿੱਤਾ ਗਿਆ।
ਇਹ ਪਾਇਆ ਗਿਆ ਕਿ ਸੈਕਟਰ 21, ਚੰਡੀਗੜ ਵਿੱਚ ਗਲੀ ਦੇ ਨਿਰਮਾਣ ਦਾ ਕੰਮ ਮੈਸਰਜ਼ ਵਕੀਲ ਯਾਦਵ (ਠੇਕੇਦਾਰ) ਨੂੰ ਦਿੱਤਾ ਗਿਆ ਸੀ , ਜਿਸਨੇ ਆਮ ਲੋਕਾਂ ਦੀ ਸਾਵਧਾਨੀ ਨੂੰ ਅੱਖੋਂ ਪਰੋਖੇ ਕਰਦਿਆਂ ਬਿਨਾਂ ਕੋਈ ਸਾਈਨ ਬੋਰਡ ਲਗਾਏ ਸੜਕ ਪੁੱਟ ਕੇ ਕੰਮ ਅਧੂਰਾ ਹੀ ਛੱਡ ਦਿੱਤਾ ਜੋ ਕਿ ਸੜਕ ਤੋਂ ਲੰਘਣ ਵਾਲੇ ਆਮ ਲੋਕਾਂ ਲਈ ਖਤਰਾ ਪੈਦਾ ਕਰਦਾ ਸੀ।
ਇਸ ਦਾ ਨੋਟਿਸ ਲੈਂਦੇ ਹੋਏ ਮਿਊਂਸੀਪਲ ਕਮਿਸ਼ਨਰ ਨੇ ਇਸ ਕੰਮ ਲਈ ਜਿੰਮੇਵਾਰ ਅਧਿਕਾਰੀਆਂ ਨੂੰ ਕਾਰਨ ਦੱਸੋ ਜਾਰੀ ਕੀਤਾ ਹੈ ਅਤੇ ਇਹ ਵੀ ਨਿਰਦੇਸ਼ ਦਿੱਤੇ ਹਨ ਕਿ ਉਕਤ ਠੇਕੇਦਾਰ ਨੂੰ ਵੀ ਕਾਰਨ ਦੱਸੋ ਜਾਰੀ ਕੀਤਾ ਜਾਵੇ। ਉਨਾਂ ਕਿਹਾ ਕਿ ਅਜਿਹੀ ਕੋਈ ਵੀ ਲਾਪਰਵਾਹੀ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ। ਉਨਾਂ ਇੰਜੀਨੀਅਰਿੰਗ ਵਿੰਗ ਨੂੰ ਇਹ ਵੀ ਹਦਾਇਤ ਕੀਤੀ ਕਿ ਜੇ.ਈ ਜਾਂ ਐਸ.ਡੀ.ਓ ਵਲੋਂ ਉਸਾਰੀ ਵਾਲੀ ਹਰੇਕ ਥਾਂ ਦਾ ਰੋਜ਼ਾਨਾ ਘੱਟੋ- ਘੱਟ ਇੱਕ ਵਾਰ ਦੌਰਾ ਕੀਤਾ ਜਾਵੇ। ਇਸਦੇ ਨਾਲ ਹੀ ਸ਼ਹਿਰ ਦੀ ਹੱਦ ਅੰਦਰ ਸੁਰੂ ਕੀਤੇ ਸਾਰੇ ਕੰਮ ਸਮਾਂਬੱਧ ਢੰਗ ਨਾਲ ਪੂਰੇ ਕੀਤੇ ਜਾਣ।