ਨਵੀਂ ਦਿੱਲੀ- ਸਿੱਖ ਕੌਮ ਦੀ ਸਿਰਮੌਰ ਜਥੇਬੰਦੀ ਅਖੰਡ ਕੀਰਤਨੀ ਜੱਥਾ (ਦਿੱਲੀ) ਵਲੋਂ ਐਮ ਪੀ ਵਿਚ ਰਹਿਣ ਵਾਲੇ ਸਿੱਖ ਸਿਕਲੀਗਰ ਪਰਿਵਾਰ ਜੋ ਕਿ ਸ੍ਰੀ ਦਰਬਾਰ ਸਾਹਿਬ ਅਤੇ ਹੋਰ ਵੱਖ ਵੱਖ ਗੁਰਦੁਆਰਿਆਂ ਦੇ ਦਰਸ਼ਨ ਦੀਦਾਰੇ ਕਰਨ ਜਾ ਰਹੇ ਹਨ, ਨੂੰ ਦਿੱਲੀ ਦੇ ਨਿਜ਼ਾਮੂਦੀਨ ਰੇਲਵੇ ਸਟੇਸ਼ਨ ਤੇ ਲੰਗਰ ਪਾਣੀ ਅਤੇ ਫਲ ਪਹੁੰਚਾ ਕੇ ਸੇਵਾ ਕੀਤੀ ਗਈ ਹੈ । ਸਿਕਲੀਗਰ ਪਰਿਵਾਰ ਜੋ ਕਿ ਅੱਤ ਗਰੀਬੀ ਵਿਚ ਰਹਿੰਦੇ ਹਨ ਅਤੇ ਜੀਵਨ ਯਾਪਨ ਲਈ ਉਨ੍ਹਾਂ ਦਾ ਗੁਜ਼ਾਰਾ ਵੀ ਬਹੁਤ ਔਖਾ ਹੁੰਦਾ ਹੈ, ਇਨ੍ਹਾਂ ਬਾਰੇ ਪਤਾ ਲਗਣ ਤੇ ਜੱਥੇ ਦੇ ਸੇਵਾਦਾਰ ਭਾਈ ਅਰਵਿੰਦਰ ਸਿੰਘ ਰਾਜਾ ਨੇ ਜੱਥੇ ਦੇ ਸਿੰਘਾਂ ਦੀ ਮਦਦ ਨਾਲ ਲੰਗਰ ਪਾਣੀ ਸਟੇਸ਼ਨ ਤੇ ਪਹੁੰਚਾ ਦਿਤਾ । ਭਾਈ ਰਾਜਾ ਨੇ ਦਸਿਆ ਕਿ ਹਰਿਆਣਾ ਦੇ ਸਮਾਲਖਾ ਵਿਖੇ ਵੀ ਅਖੰਡ ਕੀਰਤਨੀ ਜੱਥਾ (ਦਿੱਲੀ) ਵਲੋਂ ਓਥੇ ਰਹਿ ਰਹੇ ਸਿਕਲੀਗਰ ਸਿੱਖ ਪਰਿਵਾਰ ਜਿਨ੍ਹਾਂ ਦੇ ਮਕਾਨ ਬਹੁਤ ਖਸਤਾ ਹਾਲਾਤ ਵਿਚ ਸਨ ਅਤੇ ਕੁਝ ਗਿਰ ਵੀ ਗਏ ਸਨ ਦੀ ਮੁੜ ਉਸਾਰੀ ਕਰਵਾ ਕੇ ਉਨ੍ਹਾਂ ਦੇ ਰਹਿਣ ਲਈ ਸੇਵਾ ਚਲ ਰਹੀ ਹੈ । ਭਾਈ ਰਾਜਾ ਦੇ ਨਾਲ ਭਾਈ ਮਲਕੀਤ ਸਿੰਘ, ਭਾਈ ਜਗਤਾਰ ਸਿੰਘ, ਭਾਈ ਹਰਪ੍ਰੀਤ ਸਿੰਘ, ਭਾਈ ਦਲਜੀਤ ਸਿੰਘ ਅਤੇ ਅਨੂ ਹਾਜ਼ਿਰ ਸਨ ।