ਅੰਮ੍ਰਿਤਸਰ - 10 ਦਿਨਾਂ ਦੀ ਪਾਕਿਸਤਾਨ ਦੀ ਯਾਤਰਾ ਤੋ ਬਾਅਦ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਹਰਪ੍ਰੀਤ ਸਿੰਘ ਅੱਜ ਵਤਨ ਵਾਪਿਸ ਪਰਤ ਆਏ। ਅਟਾਰੀ ਵਾਹਗਾ ਸਰਹਦ ਤੇ ਪੱਤਰਕਾਰਾਂ ਨਾਲ ਗਲ ਕਰਦਿਆਂ ਜਥੇਦਾਰ ਨੇ ਕਿਹਾ ਕਿ ਉਨਾਂ ਦਾ ਇਹ ਦੌਰਾ ਬੇਹਦ ਤਸਲੀਬਖਸ਼ ਰਿਹਾ। ਸੰਗਤਾਂ ਦਾ ਪਿਆਰ ਦੇਖ ਕੇ ਮਨ ਨੂੰ ਬੇਹਦ ਖੁਸ਼ੀ ਹੋਈ। ਉਨਾਂ ਕਿਹਾ ਕਿ ਉਨਾਂ ਦੀ ਫੇਰੀ ਨੂੰ ਲੈ ਕੇ ਪਾਕਿਸਤਾਨ ਸਰਕਾਰ ਵਲੋ ਕੀਤੇ ਪ੍ਰਬੰਧ ਬੇਮਿਸਾਲ ਸਨ ਤੇ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰੰਬਧਕ ਕਮੇਟੀ ਦੇ ਸਾਰੇ ਹੀ ਆਹੁਦੇਦਾਰ ਤੇ ਮੈਂਬਰ ਉਨਾਂ ਨਾਲ ਹੀ ਰਹੇ। ਉਨਾਂ ਦਸਿਆ ਕਿ ਪਾਕਿਸਤਾਨ ਦੇ ਗੁਰਧਾਮਾਂ ਦੇ ਦਰਸ਼ਨਾ ਦੌਰਾਨ ਉਨਾਂ ਨਿਜੀ ਤੌਰ ਤੇ ਗੁਰਦਵਾਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਵਿਖੇ ਅਖੰਡ ਪਾਠ ਵੀ ਕਰਵਾਏ। ਭਵਿਖ ਵਿਚ ਉਹ ਦੁਬਾਰਾ ਪਾਕਿਸਤਾਨ ਜਾਣਗੇ ਤੇ ਇਹ ਦੌਰਾ ਵਿਸੇ਼ਸ਼ ਤੌਰ ਤੇ ਸਿੰਧ ਤੇ ਬਲੋਚਿਸਤਾਨ ਦੀਆਂ ਸੰਗਤਾਂ ਲਈ ਹੋਵੇਗਾ। ਜਥੇਦਾਰ ਨੇ ਅਗੇ ਦਸਿਆ ਕਿ ਬੀਤੇ ਕਲ ਉਨਾਂ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰੰਬਧਕ ਕਮੇਟੀ ਦੇ ਪ੍ਰਧਾਨ ਸ੍ਰ ਅਮੀਰ ਸਿੰਘ, ਸਾਬਕਾ ਪ੍ਰਧਾਨਾਂ ਸ੍ਰ ਬਿਸ਼ਨ ਸਿੰਘ ਅਤੇ ਸਤਵੰਤ ਸਿੰਘ ਨਾਲ ਇਵੈਕੁਈ ਟਰਸਟ ਬੋਰਡ ਦੇ ਚੇਅਰਮੈਨ ਡਾਕਟਰ ਆਮਿਕ ਅਹਿਮਦ, ਜਰਨਲ ਸਕਤੱਰ ਤਾਰਿਕ ਵਜ਼ੀਰ ਅਤੇ ਡਿਪਟੀ ਸੈਕਟਰੀ ਸ਼ਰਾਇਨ ਇਮਰਾਂਨ ਗੌਂਦਲ ਨਾਲ ਮੁਲਾਕਾਤ ਕੀਤੀ। ਇਸ ਮੌਕੇ ਤੇ ਉਨਾਂ ਡਾਕਟਰ ਆਮਿਰ ਅਹਿਮਦ ਨਾਲ ਵਿਚਾਰ ਕਰਦਿਆਂ ਪਾਕਿਸਤਾਨ ਵਿਚ ਖਸਤਾ ਹਾਲ ਗੁਰੂ ਘਰਾਂ ਦੀ ਮੁਰੰਮਤ ਕਰਵਾਉਣ, ਇਤਿਹਾਸਕ ਗੁਰੂ ਘਰ ਖੋਹਲਣ ਅਤੇ ਉਥੇ ਸਿੱਖ ਮਰਿਯਾਦਾ ਦੀ ਪਾਲਣਾ ਕਰਨ ਲਈ ਵੀ ਕਿਹਾ। ਉਨਾਂ ਡਾਕਟਰ ਆਮਿਰ ਅਹਿਮਦ ਨੂੰ ਸ਼ਹੀਦ ਭਾਈ ਤਾਰੂ ਸਿੰਘ ਦਾ ਸ਼ਹੀਦੀ ਅਸਥਾਨ, ਭਾਈ ਮਨੀ ਸਿੰਘ ਦਾ ਸ਼ਹੀਦੀ ਅਸਥਾਨ, ਓਕਾੜਾ ਵਿਚ ਗੁਰਦਵਾਰਾ ਸਤਘਰਾ ਆਦਿ ਨੂੰ ਬਚਾਉਣ ਲਈ ਵਿਸੇ਼ਸ਼ ਉਪਬਰਾਲੇ ਕਰਨ ਲਈ ਵੀ ਕਿਹਾ। ਉਨਾਂ ਇਵੈਕੁਈ ਟਰਸਟ ਦਾ ਧਨਵਾਦ ਕੀਤਾ ਕਿ ਪਾਕਿਸਤਾਨ ਦੇ ਗੁਰਦਵਾਰਾ ਸਾਹਿਬਾਨ ਦੀ ਪੁਰਾਤਨ ਦਿੱਖ ਹਾਲੇ ਤਕ ਬਹਾਲ ਰਖੀ ਹੋਈ ਹੈ। ਇਸ ਮੌਕੇ ਤੇ ਡਾਕਟਰ ਆਮਿਰ ਅਹਿਮਦ ਨੇ ਜਥੇਦਾਰ ਨੂੰ ਸਨਮਾਨਿਤ ਵੀ ਕੀਤਾ। ਪਾਕਿਸਤਾਨ ਦੇ ਸਿੱਖਾਂ ਦੀ ਹਾਲਤ ਬਾਰੇ ਗਲ ਕਰਦਿਆਂ ਜਥੇਦਾਰ ਨੇ ਕਿਹਾ ਕਿ ਉਥੇ ਵਸਦੇ ਸਿੱਖ ਆਰਥਿਕ ਤੌਰ ਤੇ ਠੀਕ ਹਨ ਤੇ ਸਰਕਾਰੇ ਦਰਬਾਰੇ ਵੀ ਸਿੱਖ ਭਾਈਚਾਰੇ ਨੂੰ ਪੂਰਾ ਮਾਣ ਤਾਨ ਮਿਲਦਾ ਹੈ। ਉਨਾਂ ਸ੍ਰ ਅਮੀਰ ਸਿੰਘ, ਸ੍ਰ ਸਤਵੰਤ ਸਿੰਘ, ਡਾਕਟਰ ਮੀਮਪਾਲ ਸਿੰਘ ਤੇ ਇੰਦਰਜੀਤ ਸਿੰਘ ਅਰੋੜਾ ਨੂੰ ਭਾਰਤ ਆਉਣ ਦਾ ਸੱਦਾ ਵੀ ਦਿੱਤਾ।