ਨਵੀਂ ਦਿੱੱਲੀ- ਯੂਥ ਅਕਾਲੀ ਦਲ ਵੱਲੋਂ ਅੱਜ ਕਾਂਗਰਸਸਰਕਾਰ ਦੀਆਂ ਫਲੈਕਸਾਂ ਦੇ ਰੂਪ ਵਿਚ ਜਨਤਾ ਦੇ ਕਰੋੜਾਂ ਰੁਪਏ ਬਰਬਾਦ ਕੀਤੇ ਜਾਣ ਵਿਰੁੱਧ ਸਾਦੇ ਢੰਗ ਨਾਲ ਸ਼੍ਰੀ ਗੁਰੂ ਰਵਿਦਾਸ ਚੌਕ ਜਲੰਧਰ ਵਿਖੇ ਰੋਸ ਪ੍ਰਦਰਸ਼ਨ ਕੀਤਾ ਗਿਆ।ਇਸ ਦੌਰਾਨ ਜ਼ਿਲ੍ਹਾ ਪ੍ਰਧਾਨ ਸੁਖਮਿੰਦਰ ਸਿੰਘ ਰਾਜਪਾਲ ਦੀ ਅਗਵਾਈ ਵਿਚ ਵਰਕਰਾਂ ਨੇ ਕਾਂਗਰਸ ਸਰਕਾਰ ਦੇ ਕੈਪਟਨ ਅਮਰਿੰਦਰ ਸਿੰਘ ਦੇ ਪਹਿਲਾਂ ਵਾਲੇ ਬੈਨਰ ਤੇ ਹੁਣ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੇ ਵਾਅਦਿਆਂ ਵਾਲੇ ਨਵੇਂ ਬੈਨਰ ਫੜ੍ਹ ਕੇ ਰੋਸ ਦਾ
ਪ੍ਰਗਟਾਵਾ ਕੀਤਾ ਗਿਆ।ਇਸ ਰੋਸ ਪ੍ਰਦਰਸ਼ਨ ਦੌਰਾਨ ਚੋਣ ਕਮਿਸ਼ਨ ਵੱਲੋਂ ਜਾਰੀ ਹਦਾਇਤਾਂ ਦੀ ਪਾਲਣਾ ਕੀਤੀ ਗਈ।ਇਸ ਦੌਰਾਨ ਲੋਕਾਂ ਨੂੰ ਜਾਗਰੂਕ ਕੀਤਾ ਗਿਆ ਕਿ ਕਿਵੇਂ 5 ਸਾਲ ਪਹਿਲਾਂ ਕਾਂਗਰਸ ਵੱਲੋਂ ਝੂਠੇ ਵਾਅਦੇ ਕੀਤੇ ਗਏ ਸੀ ਜੋ ਅੱਜ ਤਕ ਵੀ ਪੂਰੇ ਨਹੀ ਹੋਏ ਤੇ ਕਿਵੇਂ ਹੁਣ ਨਵੇਂ ਵਾਅਦੇ ਕਰ ਕੇ ਲੋਕਾਂ ਨੂੰ ਮੂਰਖ ਬਣਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਇਸ ਮੌਕੇ ਰਾਜਪਾਲ ਨੇ ਕਿਹਾ ਕਿ ਝੂਠ ਬੋਲ ਕੇ ਸੱਤਾ ਹਥਿਆਉਣ ਵਾਲੀ ਕਾਂਗਰਸ ਸਰਕਾਰ ਵੱਲੋਂ 2017 ਵਿਚ ਸਰਕਾਰ ਬਣਾਉਣ ਦੇ ਬਾਵਜੂਦ ਜਨਤਾ ਨਾਲ ਕੀਤੇ ਵਾਅਦੇ ਪੂਰੇ ਨਹੀ ਕੀਤੇ ਗਏ ਤੇ ਹੁਣ ਪਹਿਲਾਂ ਵਾਲੇ ਵਾਅਦੇ ਪੂਰੇ ਨਾ ਹੋਣ ਦੇ ਬਾਵਜੂਦ ਜਨਤਾ ਨੂੰ ਨਵੇਂ ਲਾਰੇ ਲਗਾ ਕੇ ਵੋਟਾਂ ਇਕੱਠੀਆਂ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।ਪੰਜ ਸਾਲ ਪਹਿਲਾਂ ਕਾਂਗਰਸ ਨੇ ਜਿਹੜੇ ਵਾਅਦੇ ਕੀਤੇ ਸੀ ਉਹ ਸਿਰਫ ਲੋਕਾਂ ਨੂੰ ਮੂਰਖ ਬਣਾਉਣ ਲਈ ਸੀ ਤੇ ਉਹ ਵਾਅਦੇ ਪੂਰੇ ਨਾ ਕਰਕੇ ਕਾਂਗਰਸ ਪਾਰਟੀ ਨੇ ਲੋਕਾਂ ਦੀਆਂ ਭਾਵਾਨਾਵਾਂ ਨਾਲ ਖਿਲਵਾੜ ਕੀਤਾ ਹੈ।ਹੁਣ ਨਵੇਂ ਫਲੈਕਸ ਬੋਰਡ ਕਾਂਗਰਸ ਸਰਕਾਰ ਵੱਲੋਂ ਲਗਾਏ ਜਾ ਰਹੇ ਹਨ ਜਿਸ ਵਿਚ ‘ਨਵੀਂ ਸੋਚ, ਨਵਾਂ ਪੰਜਾਬ, ਨਵੀਂ ਕਾਂਗਰਸ’, ਪਰ ਇਨ੍ਹਾਂ ਦੀ ਸੋਚ ਤਾਂ ਪੁਰਾਣੀ ਹੀ ਹੈ, ਲੋਕਾਂ ਨੂੰ ਲੁੱਟੋ ਤੇ ਕੁੱਟੋ। ਸਾਡੀਆਂ ਧੀਆਂ ਭੈਣਾਂ ਤੇ ਮਾਤਾਵਾਂ ਸਰਦੀਆਂ ਦੇ ਵਿਚ ਆਪਣੀਆਂ ਮੰਗਾਂ ਸਬੰਧੀ ਕਾਂਗਰਸ ਦੇ ਮੰਤਰੀਆਂ ਦੇ ਘਰਾਂ ਦੇ ਬਾਹਰ ਧਰਨੇ ਲਗਾਉਂਦੀਆਂ ਰਹੀਆਂ ਤੇ ਕਾਂਗਰਸ ਸਰਕਾਰ ਵੱਲੋਂ ਉਨ੍ਹਾਂ ਦੇ ਮਸਲੇ ਹੱਲ ਕਰਨ ਦੀ ਬਜਾਏ ਉਨ੍ਹਾਂ ’ਤੇ ਤਸ਼ੱਦਤ ਕੀਤੇ ਗਏ। ਇਨ੍ਹਾਂ ਨੇ ਵੱਡੇ-ਵੱਡੇ ਐਲਾਨ ਕੀਤੇ ਪਰ ਇਕ ਵੀ ਕੰਮ ਨਹੀ ਕੀਤਾ ਗਿਆ ਨਾ ਕਿਸੇ ਨੂੰ ਸ਼ਗਨ ਮਿਲੇਆ, ਨਾ ਮੋਬਾਈਲ ਫੋਨ ਤੇ ਨਾ ਹੀ ਰੋਜ਼ਗਾਰ।ਨੌਕਰੀ ਦਿੱਤੀ ਵੀ ਤਾਂ ਸਿਰਫ ਆਪਣੇ ਐੱਮਐੱਲਏ ਤੇ ਮੰਤਰੀਆਂ ਦੇ ਪੁੱਤਰਾਂ ਨੂੰ।ਇਸ ਮੌਕੇ ਅਜੇ ਦੁੱਗਲ, ਨਿਰਵੈਰ ਸਿੰਘ ਸਾਜਨ, ਚਰਨਜੀਤ ਸਿੰਘ ਚਸਕੀ, ਮਨਪ੍ਰੀਤ ਸਿੰਘ ਪ੍ਰਿੰਸ, ਪ੍ਰਭਪ੍ਰੀਤ
ਸਿੰਘ, ਤਰੁਣ ਲੂਥਰਾ, ਰਮਿੰਦਰ ਸਿੰਘ ਸ਼ਿੱਬੂ, ਕੰਵਰਦੀਪ ਸਿੰਘ ਸਚਦੇਵਾ, ਰਾਜਮੀਤ ਸਿੰਘ
ਭਾਟੀਆ ਆਦਿ ਮੌਜੂਦ ਸਨ।