ਨਵੀਂ ਦਿੱਲੀ- ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਜਨਰਲ ਸਕੱਤਰ ਹਰਮੀਤ ਸਿੰਘ ਕਾਲਕਾ ਨੇ ਕਿਹਾ ਹੈ ਕਿ ਦਿੱਲੀ ਕਮੇਟੀ ਚੋਣਾਂ ਵਿਚ ਸੰਗਤ ਵੱਲੋਂ ਦਿੱਤੇ ਫ਼ਤਵੇ ਅਨੁਸਾਰ ਦਿੱਲੀ ਗੁਰਦਵਾਰਾ ਕਮੇਟੀ ਮੈਂਬਰਾਂ ਦੀ 30 ਮੈਂਬਰੀ ਟੀਮ 22 ਜਨਵਰੀ ਨੂੰ ਕਮੇਟੀ ਦੇ ਅਹੁਦੇਦਾਰਾਂ ਦੀ ਹੋਣ ਜਾ ਰਹੀ ਚੋਣ ਵਾਸਤੇ ਤਿਆਰ ਬਰ ਤਿਆਰ ਹੈ।ਅੱਜ ਇਥੇ ਸਮੁੱਚੇ ਮੈਂਬਰਾਂ ਦੇ ਨਾਲ ਸਾਂਝੀ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਹਰਮੀਤ ਸਿੰਘ ਕਾਲਕਾ ਨੇ ਕਿਹਾ ਕਿ ਅਸੀਂ ਬਹੁਤ ਵੱਡੀ ਲੜਾਈ ਦਿੱਲੀ ਕਮੇਟੀ ਦੀਆਂ ਚੋਣਾਂ ਨੂੰ ਲੈ ਕੇ ਪਿਛਲੇ ਸਮੇਂ ਤੋਂ ਲੜੀ ਹੈ।ਉਹਨਾਂ ਕਿਹਾ ਕਿ ਤਕਰੀਬਨ 1 ਸਾਲ ਹੋਣ ਜਾ ਰਿਹਾ ਹੈ, ਫਰਵਰੀ 2021 ਵਿੱਚ ਚੋਣਾਂ ਦਾ ਐਲਾਨ ਹੋਇਆ, ਅਪ੍ਰੈਲ ਵਿਚ ਚੋਣਾਂ ਹੋਣੀਆਂ ਸਨ ਜੋ 22 ਅਗਸਤ ਨੂੰ ਖਤਮ ਹੋਈਆਂ ਤੇ 25 ਅਗਸਤ ਨੂੰ ਨਤੀਜਾ ਆਇਆ ਜਿਸ ਵਿਚ ਸਾਡੀ ਸਮੁੱਚੀ ਟੀਮ ਨੁੰ ਸੰਗਤ ਨੇ ਫਤਵਾ ਦਿੱਤਾ ਤੇ ਅਸੀਂ 27 ਸੀਟਾਂ `ਤੇ ਜੇਤੂ ਰਹੇ।ਉਹਨਾਂ ਕਿਹਾ ਕਿ ਇਸ ਮਗਰੋਂ ਵਿਕਰਮ ਸਿੰਘ ਰੋਹਿਣੀ ਕੋਆਪਟ ਹੋਏ, ਇਸ ਉਪਰੰਤ ਸੁਖਬੀਰ ਸਿੰਘ ਕਾਲੜਾ ਸਾਡੇ ਨਾਲ ਆਏ ਤੇ ਫਿਰ ਸ਼੍ਰੋਮਣੀ ਕਮੇਟੀ ਵੱਲੋਂ ਐਡਵੋਕੇਟ ਹਰਜਿੰਦਰ ਸਿੰਘ ਧਾਮੀ ਨਾਮਜ਼ਦ ਹੋਏ।ਇਸ ਤਰੀਕੇ ਸਾਡੇ 30 ਮੈਂਬਰ ਹਨ ਜਿਹਨਾਂ ਨਾਲ ਅਸੀਂ 22 ਜਨਵਰੀ ਨੁੰ ਚੋਣਾਂ ਵਾਸਤੇ ਬਿਲਕੁਲ ਤਿਆਰ ਬਰ ਤਿਆਰ ਹਾਂ।ਸ. ਕਾਲਕਾ ਨੇ ਕਿਹਾ ਕਿ ਅਸੀਂ ਲੰਬੇ ਸਮੇਂ ਤੋਂ ਇਸ ਅਹੁਦੇਦਾਰਾਂ ਦੀ ਚੋਣ ਦੀ ਉਡੀਕ ਕਰ ਰਹੇ ਸੀ ਤੇ ਹੁਣ
ਡਾਇਰੈਕਟਰ ਗੁਰਦੁਆਰਾ ਚੋਣਾਂ ਨੇ 22 ਜਨਵਰੀ ਦੀ ਜੋ ਤਾਰੀਕ ਤੈਅ ਕੀਤੀ ਹੈ, ਉਹ ਸਾਨੁੰ
ਮਨਜ਼ੂਰ ਹੈ।ਪੱਤਰਕਾਰਾਂ ਵੱਲੋਂ ਕੀਤੇ ਸਵਾਲ ਦੇ ਜਵਾਬ ਵਿਚ ਕਾਲਕਾ ਨੇ ਕਿਹਾ ਕਿ ਡਾਇਰੈਕਟਰ ਗੁਰਦੁਆਰਾ ਚੋਣਾਂ ਹੀ ਜਵਾਬ ਦੇ ਸਕਦੇ ਹਨ ਕਿ ਕਰਫਿਊ ਵਾਲੇ ਦਿਨ ਉਹਨਾਂ ਨੇ ਕਿਸ ਦਬਾਅ ਹੇਠ ਚੋਣਾਂ ਰੱਖੀਆਂ ਹਨ ਪਰ ਸਾਨੁੰ ਕੋਈ ਕਿੰਤੂ ਪ੍ਰੰਤੁ ਨਹੀਂ, ਅਸੀਂ ਤਿਆਰ ਹਾਂ।ਸ. ਕਾਲਕਾ ਨੇ ਹੋਰਨਾਂ ਪਾਰਟੀਆਂ ਦੇ ਮੈਂਬਰਾਂ ਨੂੰ ਵੀ ਸੱਦਾ ਦਿੱਤਾ ਕਿ ਉਹ ਸੰਗਤ ਦੇ ਫਤਵੇ ਦਾ ਸਤਿਕਾਰ ਕਰਦਿਆਂ ਇਸ ਟੀਮ ਨਾਲ ਜੁੜਨ, ਉਹਨਾਂ ਨੂੰ ਪੂਰਾ ਮਾਣ ਸਤਿਕਾਰ ਦਿੱਤਾ ਜਾਵੇਗਾ। ਉਹਨਾਂ ਇਹ ਵੀ ਦੱਸਿਆ ਕਿ ਕਿਵੇਂ ਦੇਰ ਰਾਤ ਤੱਕ ਸਾਡੇ ਮੈਂਬਰਾਂ ਬਾਰੇ ਗੁੰਮਰਾਹਕੁੰਨ ਪ੍ਰਚਾਰ ਕੀਤਾ ਜਾਂਦਾ ਰਿਹਾ ਹੈ ਜੋ ਨਿਰਾ ਝੁਠ ਹੈ। ਵਿਰੋਧੀ ਪਾਰਟੀਆਂ `ਤੇ ਵਰਦਿਆਂ ਉਨ੍ਹਾਂ ਨੇ ਕਿਹਾ ਕਿ ਵਿਰੋਧੀਆਂ ਵੱਲੋਂ ਕੱਲ ਡਾਇਰੈਕਟਰ ਗੁਰਦੁਆਰਾ
ਚੋਣਾਂ ਨਾਲ ਮੁਲਾਕਾਤ ਕੀਤੀ ਗਈ ਤੇ ਡਾਇਰੈਕਟਰ ਨੇ ਛੇਵੀਂ ਪਰਚੀ ਕੋਆਪਸ਼ਨ ਵਾਸਤੇ ਕੱਢ
ਦਿੱਤੀ ਜਦੋਂ ਕਿ ਦਿੱਲੀ ਕਮੇਟੀ ਦੇ ਇਤਿਹਾਸ ਵਿਚ ਅਜਿਹਾ ਕਦੇ ਨਹੀਂ ਹੋਇਆ।ਉਹਨਾਂ ਕਿਹਾ
ਕਿ ਹਮੇਸ਼ਾ ਸਬੰਧਤ ਸਿੰਘ ਸਭਾ ਹੀ ਤਸਦੀਕ ਕਰਦੀ ਹੈ ਕਿ ਸਾਡਾ ਕੌਣ ਪ੍ਰਧਾਨ ਹੈ ਜੋ ਕਮੇਟੀ ਵਿਚ ਨੁਮਾਇੰਦਗੀ ਕਰੇਗਾ।ਉਹਨਾਂ ਨੇ 2017 ਵਿਚ ਸ਼ਿਵਚਰਨ ਸਿੰਘ ਲਾਂਬਾ ਦੀ ਹੋਈ ਚੋਣ ਦੀ ਉਦਾਹਰਣ ਵੀ ਦਿੱਤੀ ਤੇ ਕਿਹਾ ਕਿ ਅਸੀਂ ਕੋਆਪਸ਼ਨ ਵਾਲੀ ਲੜਾਈ ਵੱਖਰੇ ਤੌਰ `ਤੇ ਅਦਾਲਤ ਵਿਚ ਲੜ ਰਹੇ ਹਾਂ ਤੇ ਗੁਰੂ ਸਾਹਿਬ ਦੀ ਬਖਸ਼ਿਸ਼ ਨਾਲ ਇਸਦਾ ਫੈਸਲਾ ਵੀ ਸਾਡੇ ਹੱਕ
ਵਿਚ ਹੋਵੇਗਾ।ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਜਗਦੀਪ ਸਿੰਘ ਕਾਹਲੋਂ, ਬੀਬੀ ਰਣਜੀਤ ਕੌਰ,
ਵਿਕਰਮ ਸਿੰਘ ਰੋਹਿਣੀ, ਸਰਵਜੀਤ ਸਿੰਘ ਵਿਰਕ, ਜਸਬੀਰ ਸਿੰਘ ਜੱਸੀ, ਮਹਿੰਦਰਪਾਲ ਸਿੰਘ
ਚੱਢਾ, ਹਰਵਿੰਦਰ ਸਿੰਘ ਕੇ.ਪੀ, ਜਸਪ੍ਰੀਤ ਸਿੰਘ ਕਰਮਸਰ, ਸੁਰਜੀਤ ਸਿੰਘ ਜੀਤੀ, ਅਮਰਜੀਤ ਸਿੰਘ ਪਿੰਕੀ, ਗੁਰਦੇਵ ਸਿੰਘ, ਭੁਪਿੰਦਰ ਸਿੰਘ ਗਿੰਨੀ, ਸਤਿੰਦਰਪਾਲ ਸਿੰਘ ਨਾਗੀ, ਅਮਰਜੀਤ ਸਿੰਘ ਪੱਪੂ, ਰਾਜਿੰਦਰ ਸਿੰਘ ਘੁੱਗੀ, ਹਰਜੀਤ ਸਿੰਘ ਪੱਪਾ, ਗੁਰਮੀਤ ਸਿੰਘ ਭਾਟੀਆ, ਆਤਮਾ ਸਿੰਘ ਲੁਬਾਣਾ, ਰਮਿੰਦਰ ਸਿੰਘ ਸਵੀਟਾ, ਰਮਨਜੋਤ ਸਿੰਘ ਮੀਤਾ, ਰਮਨਦੀਪ ਸਿੰਘ ਥਾਪਰ, ਗੁਰਪ੍ਰੀਤ ਸਿੰਘ ਜੱਸਾ, ਪਰਵਿੰਦਰ ਸਿੰਘ ਲੱਕੀ, ਬਲਬੀਰ ਸਿੰਘ, ਸੁਖਵਿੰਦਰ ਸਿੰਘ ਬੱਬਰ, ਭੁਪਿੰਦਰ ਸਿੰਘ ਭੁੱਲਰ ਤੇ ਸੁਖਬੀਰ ਸਿੰਘ ਕਾਲੜਾ ਵੀ ਮੌਜੂਦ ਸਨ।