ਸਰੀ-ਸਰੀ ਵਿਚ ਪੰਜਾਬੀ ਮਾਂ ਬੋਲੀ ਲਘੂ ਫਿਲਮ ਉਤਸਵ ਮਨਾਇਆ ਗਿਆ। ਇਸ ਦੇ ਪਹਿਲੇ ਪੜਾਅ ਤਹਿਤ ਜਰਨੈਲ ਆਰਟ ਗੈਲਰੀ ਅਤੇ ਗੁਰਦੀਪ ਆਰਟਸ ਅਕੈਡਮੀ ਦੇ ਵਿਹੜੇ ਵਿਚ ਪੰਜਾਬੀ ਚਿੱਤਰਕਾਰਾਂ ਵੱਲੋਂ ਆਪਣੀਆਂ ਕਿਰਤਾਂ ਪ੍ਰਦਰਸ਼ਿਤ ਕੀਤੀਆਂ ਗਈਆਂ। ਪੰਜਾਬ ਪੈਨਰਾਮਾ ਦੇ ਲੇਬਲ ਅਧੀਨ ਲਾਈ ਗਈ ਦੋ ਦਿਨਾਂ ਚਿੱਤਰ ਪ੍ਰਦਰਸ਼ਨੀ ਵਿਚ ਬਲਜੀਤ ਕੌਰ ਵੱਲੋਂ ਭਾਰਤੀ ਨਾਰੀ ਦੇ ਵੱਖ ਵੱਖ ਮਨੋਭਾਵਾਂ ਨੂੰ ਦਰਸਾਉਂਦੇ ਚਿੱਤਰ, ਬਲਵਿੰਦਰ ਸਿੰਘ ਤੇ ਨੀਤੀ ਸਿੰਘ ਦੇ ਰਾਜਸਥਾਨੀ ਵਿਅਕਤੀਆਂ ਦੇ ਚਿਤਰ, ਬਿੰਦੂ ਮਠਾੜੂ ਦੀਆਂ ਏਕਮਕਾਰ ਤੇ ਹੋਰ ਅਧਿਆਤਮਿਕ ਪੇਟਿੰਗਜ਼, ਜਰਨੈਲ ਸਿੰਘ ਦੀਆਂ ਇਤਿਹਾਸ ਤੇ ਪੰਜਾਬੀ ਸਭਿਆਚਾਰ ਨਾਲ ਸਬੰਧਤ ਕਿਰਤਾਂ, ਜੇ ਪਨੇਸਰ ਦੀ ਦਰਬਾਰ ਸਾਹਿਬ ਦੀ ਫੋਟੋ, ਨਵਲਪ੍ਰੀਤ ਰੰਗੀ ਵੱਲੋਂ ਪੰਜਾਬ ਦੇ ਪੇਂਡੂ ਦ੍ਰਿਸ਼ ਦੀਆਂ ਦੋ ਤਸਵੀਰਾਂ, ਰਿਮਨਦੀਪ ਬਰਾੜ ਦੀਆਂ ਮਹਾਤਮਾ ਬੁੱਧ ਤੇ ਖੇਤਾਂ ਵਿਚ ਪੰਜਾਬਣ ਮੁਟਿਆਰਾਂ ਦੀਆਂ ਕਿਰਤਾਂ, ਰੀਤੂ ਸਿੰਘ ਦੀਆਂ ਨੇਟਿਵ ਆਰਟ ਦੀਆਂ ਕਲਾ ਕਿਰਤਾਂ ਅਤੇ ਸਭ ਤੋਂ ਛੋਟੀ ਉਮਰ ਦੇ ਬਾਲ ਕਲਾਕਾਰ ਬੀਰ ਯੁਵਰਾਜ ਸਿੰਘ ਦੀਆਂ ਕਿਰਤਾਂ ਸੁਸ਼ੋਭਿਤ ਕੀਤੀਆਂ ਗਈਆਂ।
ਪੰਜਾਬੀ ਕਲਾ ਪ੍ਰੇਮੀਆਂ ਨੇ ਤਿੰਨੇ ਦਿਨ ਇਸ ਪ੍ਰਦਰਸ਼ਨੀ ਵਿਚ ਬੇਹੱਦ ਦਿਲਚਸਪੀ ਦਿਖਾਈ ਅਤੇ ਚਿੱਤਰਕਾਰੀ ਦੇ ਬਿਹਤਰੀਨ ਕਾਰਜ ਨੂੰ ਬੜੀ ਨੀਝ ਨਾਲ ਤੱਕਿਆ। ਚਿੱਤਰਕਾਰੀ ਦਾ ਆਨੰਦ ਮਾਣਨ ਵਾਲਿਆਂ ਵਿਚ ਪ੍ਰਸਿੱਧ ਨਾਵਲਕਾਰ ਜਰਨੈਲ ਸਿੰਘ ਸੇਖਾ, ਸ਼ਾਇਰ ਮੋਹਨ ਗਿੱਲ, ਜਸਵੰਤ ਬਰਾੜ, ਕਰਤਾਰ ਸਿੰਘ ਕੰਗ, ਕਰਨਬੀਰ ਸਿੰਘ, ਸਿਕੰਦਰ ਸਿੰਘ ਕੰਗ ਤੇ ਪਰਿਵਾਰ ਜਸਲੀਨ ਕੌਰ, ਮਨਜੀਤ ਸਲੈਚ, ਹਰਪ੍ਰੀਤ ਸਿੰਘ, ਐਸ਼ਲੀਨ, ਕਵਿੱਤਰੀ ਅਮਨ ਸੀ ਸਿੰਘ, ਚਰਨਜੀਤ ਸਿੰਘ, ਰੰਗ ਮੰਚ ਅਦਾਕਾਰ ਗੁਰਦੀਪ ਭੁੱਲਰ ਤੇ ਹੋਰ ਅਨੇਕਾਂ ਕਲਾ ਪ੍ਰੇਮੀ ਸ਼ਾਮਲ ਸਨ। ਪ੍ਰਦਰਸ਼ਨੀ ਦੌਰਾਨ ਹਾਜਰ ਕਲਾਕਾਰਾਂ ਨੂੰ ਪ੍ਰਬੰਧਕਾਂ ਵੱਲੋਂ ਸਨਮਾਨ ਪੱਤਰ ਦਿੱਤੇ ਗਏ।