ਨਾਨਕਸ਼ਾਹੀ ਕੈਲੰਡਰ ਦੀ ਦੁਬਿਧਾ ਵਿੱਚ ਫਸੀ ਕੌਮ ਇਸ ਵਾਰ ਵੀ ਨਹੀਂ ਜਾ ਸਕੇਗੀ ਗੁਰੂ ਅਰਜਨ ਦੇਵ ਮਹਾਰਾਜ ਦਾ ਇਹ ਸ਼ਹੀਦੀ ਗੁਰਪੁਰਬ ਮਨਾਉਣ ਪਾਕਿਸਤਾਨ

 ਗੁਰਦਵਾਰਾ ਡੇਹਰਾ ਸਾਹਿਬ ਲਾਹੌਰ ਵਿਖੇ ਵਡੀ ਪਧਰ ਤੇ ਗੁਰੂ ਅਰਜਨ ਸਾਹਿਬ ਦੇ ਸ਼ਹੀਦੀ ਸਮਾਗਮ ਮਨਾਏ ਜਾਂਦੇ ਹਨ। ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਹਰ ਸਾਲ ਇਹ ਦਿਹਾੜਾ 16 ਜੂਨ ਨੂੰ ਮੂਲ ਨਾਨਕਸ਼ਾਹੀ ਕੈਲੰਡਰ ਮੁਤਾਬਿਕ ਮਨਾਉਦੀ ਆ ਰਹੀ ਹੈ, ਜਦਕਿ ਸ਼ੋ੍ਰਮਣੀ ਕਮੇਟੀ ਸ੍ਰੀ ਗੁਰੂ ਅਰਜਨ ਸਾਹਿਬ ਦਾ ਸ਼ਹੀਦੀ ਪੁਰਬ ਇਸ ਸਾਲ  3 ਜੂਨ ਨੂੰ ਮਨਾ ਚੁੱਕੀ ਹੋਵੇਗੀ। ਤਰੀਕਾਂ ਦੇ ਮਤਭੇਦ ਦੇ ਕਾਰਨ ਸ਼ੋ੍ਰਮਣੀ ਕਮੇਟੀ ਹਰ ਸਾਲ  ਸ੍ਰੀ ਗੁਰੂ ਅਰਜਨ ਸਾਹਿਬ ਦਾ ਸ਼ਹੀਦੀ ਪੁਰਬ ਮਨਾਉਣ ਲਈ ਜੱਥਾ ਨਹੀ ਭੇਜਦੀ। ਉਧਰ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਨੇ ਸ੍ਰੀ ਗੁਰੂ ਅਰਜਨ ਸਾਹਿਬ ਦੇ ਸ਼ਹੀਦੀ ਦਿਹਾੜੇ ਨੂੰ ਲੈ ਕੇ ਭਾਰਤੀ ਯਾਤਰੀਆਂ ਦੇ ਜਥੇ ਲਈ ਪ੍ਰੋਗਰਾਮ ਜਾਰੀ ਕੀਤਾ ਹੈ। ਇਸ ਮੁਤਾਬਿਕ 8 ਜੂਨ ਨੂੰ ਭਾਰਤੀ ਯਾਤਰੀਆਂ ਨੂੰ ਵਾਹਗਾ ਸਰਹੱਦ ਤੋ ਵਿਸੇ਼ਸ਼ ਰੇਲ ਰਾਹੀ ਗੁਰਦਵਾਰਾ ਪੰਜਾ ਸਾਹਿਬ ਹਸਨ ਅਬਦਾਲ ਲੈ ਜਾਇਆ ਜਾਵੇਗਾ।10 ਜੂਨ ਨੂੰ ਇਹ ਯਾਤਰੀ ਗੁਰਦਵਾਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਆ ਜਾਣਗੇ। 11 ਜੂਨ ਨੂੰ ਯਾਤਰੀ ਲੋਕਲ ਗੁਰੂ ਘਰਾਂ ਦੇ ਦਰਸ਼ਨ ਕਰਨਗੇ ਤੇ 12 ਜੂਨ ਨੂੰ ਸੜਕ ਮਾਰਗ ਰਾਹੀ ਯਾਤਰੀਆਂ ਨੂੰ  ਗੁਰਦਵਾਰਾ ਸੱਚਾ ਸੌਦਾ ਫਾਰੂਖ਼ਾਬਾਦ ਲੈ ਜਾਇਆ ਜਾਵੇਗਾ। 13 ਜੂਨ ਨੂੰ ਯਾਤਰੀਆਂ ਨੂੰ ਵਿਸੇ਼ਸ਼ ਰੇਲ ਰਾਹੀ ਲਾਹੌਰ ਲਿਆਂਦਾ ਜਾਵੇਗਾ। 14 ਜੂਨ ਨੂੰ ਯਾਤਰੀ ਸੜਕ ਮਾਰਗ ਰਾਹੀ  ਗੁਰਦਵਾਰਾ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਦਰਸ਼ਨ ਕਰਨ ਲਈ ਜਾਣਗੇ। ਰਾਤ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਰੁਕਣ ਤੋ ਬਾਅਦ 15 ਜੂਨ ਨੂੰ ਇਨਾਂ ਯਾਤਰੀਆਂ ਨੂੰ ਸੜਕ ਮਾਰਗ ਰਾਹੀ ਗੁਰਦਵਾਰਾ ਰੋੜੀ ਸਾਹਿਬ ਦੇ ਦਰ਼ਸਨ ਕਰਨਗੇ। ਇਥੋ ਇਨਾਂ ਯਾਤਰੀਆਂ ਨੂੰ ਵਾਪਸ ਲਾਹੌਰ ਲਿਆਂਦਾ ਜਾਵੇਗਾ ਜਿਥੇ 16 ਜੂਨ ਨੂੰ ਗੁਰਦਵਾਰਾ ਡੇਹਰਾ ਸਾਹਿਬ ਵਿਖੇ ਹੋਣ ਵਾਲੇ ਸ਼ਹੀਦੀ ਸਮਾਗਮਾਂ ਵਿਚ ਭਾਗ ਲੈਣ ਤੋ ਬਾਅਦ ਇਹ ਯਾਤਰੀ 17 ਜੂਨ ਨੂੰ ਭਾਰਤ ਪਰਤਣਗੇ।