ਅੰਮ੍ਰਿਤਸਰ - ਥਮਿੰਦਰ ਸਿੰਘ, ਰਾਜਵੰਤ ਸਿੰਘ ਤੇ ਓਅੰਕਾਰ ਸਿੰਘ ਵਲੋ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਪਾਵਨ ਬਾਣੀ ਨਾਲ ਛੇੜਛਾੜ ਕਰਨ ਦਾ ਮਾਮਲਾ ਹਾਲੇ ਚਲ ਹੀ ਰਿਹਾ ਹੈ ਕਿ ਹੁਣ ਸਤਿਕਾਰ ਕਮੇਟੀ ਯੂ ਕੇ ਦੇ ਭਾਈ ਮਨਵੀਰ ਸਿੰਘ ਦਾ ਇਕ ਨਵਾਂ ਕਾਰਨਾਮਾਂ ਸਾਹਮਣੇ ਆਇਆ ਹੈ। ਭਾਈ ਮਨਵੀਰ ਸਿੰਘ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਯੂ ਕੇ ਨੇ ਇੰਗਲੈਂਡ ਵਿਚ ਵਸਦੇ ਸਿੱਖਾਂ ਦੇ ਘਰਾਂ ਵਿਚੋ ਤੇ ਕੁਝ ਗੁਰੂ ਘਰਾਂ ਵਿਚੋ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪ ਚੁੱਕ ਕੇ ਉਨਾਂ ਨੂੰ ਨਿਜੀ ਕਬਜੇ ਵਿਚ ਰਖਿਆ ਹੈ।ਉਨਾਂ ਦਾ ਵਿਰੋਧ ਕਰਨ ਵਾਲਿਆਂ ਨੂੰ ਉਹ ਮੀਣੇ, ਮਸੰਦ, ਨਰਕਧਾਰੀਏ, ਗੋਲਕ ਚੋਰ ਅਤੇ ਅਕ੍ਰਿਤਘਣ ਜਿਹੇ ਸ਼ਬਦਾਂ ਨਾਲ ਸੰਬੋਧਨ ਹੰੁਦੇ ਹਨ। ਭਾਈ ਮਨਵੀਰ ਸਿੰਘ ਬਾਰੇ ਅਨੇਕਾ ਸ਼ਿਕਾਇਤਾ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੇ ਆ ਚੁੱਕੀਆਂ ਹਨ ਤੇ ਸੂਤਰ ਦਸਦੇ ਹਨ ਕਿ ਜਥੇਦਾਰਾਂ ਦੀ ਅਗਾਮੀ ਮੀਟਿੰਗ ਵਿਚ ਉਨਾ ਦਾ ਮਾਮਲਾ ਵਿਚਾਰਿਆ ਜਾ ਸਕਦਾ ਹੈ। ਜਾਣਕਾਰੀ ਮੁਤਾਬਿਕ ਇੰਗਲੈਂਡ ਦੀਆਂ ਸਾਰੀਆਂ ਗੁਰਦਵਾਰਾ ਕਮੇਟੀਆਂ ਨੇ ਉਨਾਂ ਦੇ ਵਿਰੋਧ ਵਿਚ 29 ਮਈ ਨੂੰ ਇਕ ਮੀਟਿੰਗ ਵੀ ਰਖੀ ਹੈ। ਇੰਗਲੈਂਡ ਤੋ ਮਿਲੀ ਜਾਣਕਾਰੀ ਮੁਤਾਬਿਕ ਭਾਈ ਮਨਵੀਰ ਸਿੰਘ ਬਰਮਿੰਗਮ ਤੇ ਉਸ ਦੇ ਆਸਪਾਸ ਦੇ ਇਲਾਕਿਆਂ ਵਿਚ ਪੂਰੀ ਸਰਗਰਮੀ ਨਾਲ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਸਿੱਖਾਂ ਦੇ ਘਰਾਂ ਵਿਚੋ ਚੁੱਕ ਕੇ ਪਹਿਲਾਂ ਮਸ਼ੀਨੀ ਕਟਰ ਦੀ ਮਦਦ ਨਾਲ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਅੰਗਾਂ ਤੇ ਛਪੀ ਵੇਲ ਦੀ ਕਟਾਈ ਕਰਦੇ ਹਨ ਤੇ ਫਿਰ ਮੁਖ ਪੰਨੇ ਤੇ ਧੰਨ ਧੰਨ ਆਦਿ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਛਪਾਈ ਕਰਵਾਉਦੇ ਹਨ। ਇਥੇ ਹੀ ਬਸ ਨਹੀ ਉਹ ਹਰ ਸਰੂਪ ਤੇ ਆਪਣੀ ਮੋਹਰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਯੂ ਕੇ ਦੀ ਮੋਹਰ ਲਗਾ ਰਹੇ ਹਨ। ਇਸ ਪੱਤਰਕਾਰ ਕੋਲ ਮੌਜੂਦ ਵੀਡੀਓ ਮੁਤਾਬਿਕ ਇਕ ਗੁਰੂ ਘਰ ਜਿਥੇ ਭਾਈ ਮਨਵੀਰ ਸਿੰਘ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਰਖ ਰਹੇ ਹਨ ਵਿਚ ਕਈ ਕਾਲੇ ਕੂੜੇ ਵਾਲੇ ਬੈਗ ਕਾਤਰਾਂ ਦੇ ਭਰੇ ਹੋਏ ਮਿਲੇ ਹਨ ਤੇ ਉਨਾਂ ਕੂੜੇ ਵਾਲੇ ਬੈਗਾਂ ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪੰਨੇ ਵੀ ਹਨ। ਵੀਡੀਓ ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਪਾਵਨ ਸਰੂਪਾਂ ਦੀਆਂ ਜਿਲਦਾਂ ਨੂੰ ਤਹਿ ਕੀਤੇ ਪੰਥਕ ਢੰਗ ਨਾਲ ਧਾਗੇ ਜਾਂ ਡੋਰੀ ਨਾਲ ਸਿਉਣ ਦੀ ਬਜਾਏ ਪਲਾਸਟਿਕ ਦੀਆਂ ਪਾਇਪਾਂ ਲਗਾ ਕਿ ਸੀਤਾ ਗਿਆ ਹੈ। ਕਿਹਾ ਜਾ ਰਿਹਾ ਹੈ ਕਿ ਕੁਝ ਪਾਵਨ ਸਰੂਪਾਂ ਵਿਚ ਚਿਪਾਂ ਵੀ ਲਗਾਈਆਂ ਗਈਆਂ ਹਨ।ਇਸ ਸੰਵੇਦਨਸ਼ੀਲ ਮਾਮਲੇ ਤੇ ਭਾਈ ਮਨਵੀਰ ਸਿੰਘ ਕਿਸੇ ਦੀ ਵੀ ਗਲ ਸੁਨਣ ਲਈ ਤਿਆਰ ਨਹੀ ਹਨ।