ਸਰੀ-ਗ਼ਜ਼ਲ ਮੰਚ ਸਰੀ ਦੀ ਮੀਟਿੰਗ ਨਾਮਵਰ ਸ਼ਾਇਰ ਜਸਵਿੰਦਰ ਦੀ ਪ੍ਰਧਾਨਗੀ ਹੇਠ ਮੰਚ ਦੇ ਦਫਤਰ ਵਿਚ ਹੋਈ। ਇਸ ਮੀਟਿੰਗ ਵਿਚ ਪੰਜਾਬੀ ਕਵਿੱਤਰੀ ਮਨ ਮਾਨ ਦਾ ਗ਼ਜ਼ਲ ਸੰਗ੍ਰਹਿ ‘ਰਾਵੀ ਦੀ ਰੀਝ’ ਰਿਲੀਜ਼ ਕੀਤੀ ਗਈ।
ਇਸ ਪੁਸਤਕ ਬਾਰੇ ਵਿਚਾਰ ਪੇਸ਼ ਕਰਦਿਆਂ ਜਸਵਿੰਦਰ ਨੇ ਕਿਹਾ ਕਿ ਮਨ ਮਾਨ ਦੀ ਸ਼ਾਇਰੀ ਗ਼ਜ਼ਲ ਦੀ ਦੁਨੀਆ ਵਿਚ ਇਕਦਮ ਪ੍ਰਗਟ ਹੋਈ ਹੈ। ‘ਰਾਵੀ ਦੀ ਰੀਝ’ ਮਨ ਮਾਨ ਦੇ ਕਾਵਿ ਸਫ਼ਰ ਦਾ ਪਹਿਲਾ ਪੜਾਅ ਹੈ। ਇਸ ਕਿਤਾਬ ਵਿਚ ਉਹਦੀ ਚੇਤਨਾ ਦੇ ਧਰਾਤਲ 'ਤੇ ਵਿਛੀਆਂ ਤਿੱਖੀਆਂ ਧੁੱਪਾਂ, ਹਨੇਰੀਆਂ, ਠੰਡੀਆਂ ਛਾਵਾਂ ਤੇ ਕਿਣਮਿਣੀਆਂ ਦਾ ਦਿਲ ਨੂੰ ਛੂਹਣ ਵਾਲਾ ਵਰਣਨ ਹੈ। ਸੰਵੇਦਨਾਵਾਂ ਤੇ ਭਾਵਨਾਵਾਂ ਦੀ ਨਿਰਮਲ ਪੇਸ਼ਕਾਰੀ ਉਹਦਾ ਹਾਸਲ ਵੀ ਹੈ ਤੇ ਚੰਗੇਰੇ ਭਵਿੱਖ ਦੀ ਜ਼ਾਮਨ ਵੀ।
ਇਸ ਕਿਤਾਬ ਨੂੰ ਜੀ ਆਇਆਂ ਕਹਿੰਦਿਆਂ ਰਾਜਵੰਤ ਰਾਜ, ਕ੍ਰਿਸ਼ਨ ਭਨੋਟ, ਦਵਿੰਦਰ ਗੌਤਮ, ਪ੍ਰੀਤ ਮਨਪ੍ਰੀਤ, ਹਰਦਮ ਮਾਨ ਅਤੇ ਦਸ਼ਮੇਸ਼ ਗਿੱਲ ਫ਼ਿਰੋਜ਼ ਨੇ ਮਨ ਮਾਨ ਦੇ ਦ੍ਰਿਸ਼ਟੀਕੋਣ ਤੇ ਸ਼ਿਲਪਕਾਰੀ ਵਿਚ ਹੋਰ ਨਿਖਾਰ ਆਉਣ ਦੀ ਕਾਮਨਾ ਕੀਤੀ।