ਸਰੀ-15 ਅਕਤੂਬਰ ਨੂੰ ਹੋ ਰਹੀਆਂ ਸਰੀ ਸਿਵਿਕ ਚੋਣਾਂ ਵਿੱਚ ਕੁੱਲ 84 ਉਮੀਦਵਾਰ ਮੈਦਾਨ ਵਿਚ ਹਨ ਜਿਨ੍ਹਾਂ ਵਿਚ ਮੇਅਰ ਦੇ ਅਹੁਦੇ ਲਈ 8 ਉਮੀਦਵਾਰ, ਕੌਂਸਲਰ ਲਈ 56 ਉਮੀਦਵਾਰ ਅਤੇ ਸਕੂਲ ਟਰੱਸਟੀ ਲਈ 20 ਉਮੀਦਵਾਰ ਹਨ। ਇਨ੍ਹਾਂ ਵਿੱਚੋਂ 16 ਉਮੀਦਵਾਰ ਆਜ਼ਾਦ ਹਨ। ਦੱਸਣਯੋਗ ਹੈ ਕਿ ਇਨ੍ਹਾਂ ਵਿੱਚੋਂ ਇੱਕ ਮੇਅਰ, 8 ਕੌਂਸਲਰ ਅਤੇ 7 ਟਰੱਸਟੀ ਚੁਣੇ ਜਾਣੇ ਹਨ। ਮੇਅਰ ਦੀ ਚੋਣ ਲੜਨ ਵਾਲਿਆਂ ਵਿਚ ਪੰਜਾਬੀ ਮੂਲ ਦੇ 4 ਉਮੀਦਵਾਰ ਹਨ ਜਦੋਂ ਕਿ ਪੰਜਾਬੀ ਮੂਲ ਦੇ 21 ਉਮੀਦਵਾਰ ਕੌਂਸਲਰ ਦੀ ਚੋਣ ਲੜ ਰਹੇ ਹਨ ਅਤੇ 5 ਉਮੀਦਵਾਰ ਸਕੂਲ ਟਰੱਸਟੀ ਦੇ ਚੋਣ ਮੈਦਾਨ ਵਿਚ ਹਨ।
ਮੇਅਰ ਦੀ ਵੱਕਾਰੀ ਕੁਰਸੀ ਹਥਿਆਉਣ ਦੀ ਦੌੜ ਵਿੱਚ ਪੰਜਾਬੀ ਮੂਲ ਦੇ ਮੈਂਬਰ ਪਾਰਲੀਮੈਂਟ ਸੁੱਖ ਧਾਲੀਵਾਲ, ਐਮ.ਐਲ.ਏ. ਜਿੰਨੀ ਸਿਮਸ, ਅੰਮ੍ਰਿਤ ਬਿੜਿੰਗ ਅਤੇ ਕੁਲਦੀਪ ਪੇਲੀਆ ਤੋਂ ਇਲਾਵਾ ਮੌਜੂਦਾ ਮੇਅਰ ਡੱਗ ਮੈਕੱਲਮ, ਗੋਰਡੀ ਹੌਗ, ਬਰੈਂਡਾ ਲੌਕ ਅਤੇ ਜੌਹਨ ਵੋਲੰਸਕੀ ਮੈਦਾਨ ਵਿਚ ਹਨ। ਇਨ੍ਹਾਂ ਵਿੱਚੋਂ ਕੁਲਦੀਪ ਪੇਲੀਆ ਅਤੇ ਜੌਹਨ ਵੋਲੰਸਕੀ ਆਜ਼ਾਦ ਉਮੀਦਵਾਰ ਹਨ।
ਕੌਂਸਲਰ ਲਈ ਚੋਣ ਮੈਦਾਨ ਵਿਚ ਉਤਰਨ ਵਾਲੇ ਪੰਜਾਬੀ ਮੂਲ ਦੇ ਉਮੀਦਵਾਰਾਂ ਵਿਚ ਮੌਜੂਦਾ ਕੌਂਸਲਰ ਮਨਦੀਪ ਨਾਗਰਾ, ਜਸਬੀਰ ਸੰਧੂ, ਹੈਰੀ ਬੈਂਸ, ਸ਼ਵੇਤਾ ਬੱਸੀ, ਤੇਜਨੂਰ ਸਿੰਘ ਚੀਮਾ, ਸਰਘੀ ਚੀਮਾ, ਨਵ ਧਨੋਆ, ਐਂਡੀ ਢਿੱਲੋਂ, ਰੀਨਾ ਗਿੱਲ, ਕਿਰਨ ਹੁੰਦਲ, ਰਮਨ ਜੱਸੜ, ਪਰਦੀਪ ਕੌਰ ਕੂਨਰ, ਪਰਮਜੀਤ ਸਿੰਘ ਮੱਲ੍ਹੀ, ਅਰਸ਼ ਮੰਡੇਰ, ਅਜੀਤ ਮਹਿਤ, ਮਨਦੀਪ ਨਾਗਰਾ, ਕੈਮ ਪਵਾਰ, ਮਨਜੀਤ ਸਿੰਘ ਸਹੋਤਾ, ਕੁਲਵਿੰਦਰ ਸੈਣੀ, ਪ੍ਰੀਤ ਸੰਧੂ, ਕੁਲਤਾਰ ਸਿੰਘ ਅਤੇ ਜੋਡੀ ਤੂਰ ਸ਼ਾਮਲ ਹਨ।
ਸਕੂਲ ਟਰੱਸਟੀ ਲਈ ਪੰਜਾਬੀ ਉਮੀਦਵਾਰਾਂ ਵਿਚ ਡਾ. ਜਸਬੀਰ ਨਰਵਾਲ, ਡਾ. ਬਲਬੀਰ ਗੁਰਮ, ਸੰਨੀ ਮਾਂਗਟ, ਦੁਪਿੰਦਰ ਕੌਰ ਸਰਾਂ ਅਤੇ ਗੈਰੀ ਥਿੰਦ ਸ਼ਾਮਲ ਹਨ।
ਜ਼ਿਕਰਯੋਗ ਹੈ ਕਿ ਸਰੀ ਸਿਟੀ ਦੀਆਂ 2018 ਦੀਆਂ ਸਿਵਿਕ ਚੋਣਾਂ ਵਿੱਚ 83 ਉਮੀਦਵਾਰਾਂ ਨੇ ਚੋਣ ਲੜੀ ਸੀ ਅਤੇ ਉਦੋਂ ਵੀ ਮੇਅਰ ਦੀ ਚੋਣ ਲਈ 8 ਉਮੀਦਵਾਰ ਸਨ, ਕੌਂਸਲਰਾਂ ਦੀ ਚੋਣ ਲਈ 48 ਅਤੇ ਸਕੂਲ ਟਰੱਸਟੀ ਲਈ 27 ਉਮੀਦਵਾਰ ਮੈਦਾਨ ਵਿਚ ਸਨ।