ਸਥਾਨਕ ਸ੍ਰੀ ਗੁਰੂ ਰਾਮਦਾਸ ਅੰਤਰਰਾਸ਼ਟਰੀ ਹਵਾਈ ਅੱਡੇ ਦੇ ਨੇੜੇ ਸਥਿਤ ਇਤਿਹਾਸਕ ਗੁਰਦਵਾਰਾ ਪਲਾਹ ਸਾਹਿਬ ਵਿਖੇ ਅਨੰਦ ਕਾਰਜ ਦੌਰਾਨ ਇਕ ਗ੍ਰੰਥੀ ਨੇ ਨਵਾਂ ਇਤਿਹਾਸ ਸਿਰਦਿਆਂ ਗੁਰੂ ਰਾਮਦਾਸ ਜੀ ਦੁਆਰਾ ਚਲਾਈ ਲਾਵਾਂ ਦੀ ਮਰਿਯਾਦਾ ਵਿਚ ਫੇਰ ਬਦਲ ਕਰਦਿਆਂ ਚਾਰ ਦੀ ਬਜਾਏ ਪੰਜ ਲਾਵਾਂ ਪੜ ਦਿੱਤੀਆਂ। ਅਨੰਦ ਕਾਰਜ ਕਰਵਾਉਣ ਆਏ ਦੋਵੇ ਪਰਵਾਰਾਂ ਦੇ ਨਾਲ ਨਾਲ ਸੰਗਤਾਂ ਵੀ ਲਾਵਾਂ ਦਾ ਪਾਠ ਸੁਣ ਕੇ ਹੈਰਾਨ ਸੀ। ਇਤਿਹਾਸਕ ਗੁਰਦਵਾਰਾ ਪਲਾਹ ਸਾਹਿਬ ਵਿਖੇ ਦੋ ਪਰਵਾਰ ਬੀਤੇ ਦਿਨੀ ਅਨੰਦ ਕਾਰਜ ਲਈ ਹਾਜਰ ਹੋਏ। ਗੁਰਦਵਾਰਾ ਸਾਹਿਬ ਦੇ ਗ੍ਰੰਥੀ ਸਿੰਘ ਨੇ ਮਰਿਯਾਦਾ ਮੁਤਾਬਿਕ ਪਹਿਲੀਆਂ ਤਿੰਨ ਲਾਵਾਂ ਦਾ ਪਾਠ ਕੀਤਾ ਤੇ ਰਾਗੀ ਸਿੰਘਾਂ ਨੇ ਵੀ ਲਾਵਾਂ ਦੇ ਪਾਠ ਨੂੰ ਸ਼ਬਦੀ ਰੂਪ ਵਿਚ ਗਾਇਨ ਕਰ ਦਿੱਤਾ। ਚੌਥੀ ਲਾਵ ਪੜਣ ਦੀ ਬਜਾਏ ਗ੍ਰੰਥੀ ਸਿੰਘ ਨੇ ਦੂਜੀ ਵਾਰ ਮੁੜ ਤੋ ਤੀਜੀ ਲਾਵ ਦਾ ਪਾਠ ਕਰਨਾ ਸ਼ੁਰੂ ਕਰ ਦਿੱਤਾ ਤੇ ਰਾਗੀ ਸਿੰਘ ਨੇ ਵੀ ਮਜਬੂਰੀ ਵਿਚ ਤੀਜੀ ਲਾਵ ਨੁੰ ਸ਼ਬਦੀ ਰੂਪ ਵਿਚ ਗਾਇਨ ਕਰ ਦਿੱਤਾ। ਗ੍ਰੰਥੀ ਸਿੰਘ ਨੂੰ ਆਪਣੀ ਗਲਤੀ ਜਦ ਤਕ ਯਾਦ ਆਈ ਤਾਂ ਉਸ ਨੇ ਚੌਥੀ ਲਾਵ ਦਾ ਪਾਠ ਕੀਤਾ ਤੇ ਰਾਗੀ ਸਿੰਘਾਂ ਨੇ ਚੌਥੀ ਲਾਵ ਨੂੰ ਸ਼ਬਦੀ ਰੂਪ ਵਿਚ ਗਾਇਆ। ਉਸ ਸਮੇ ਤਕ ਪੰਜ ਵਾਰ ਲਾਵਾਂ ਦਾ ਪਾਠ ਹੋ ਚੁੱਕਾ ਸੀ। ਪਹਿਲਾਂ ਇਸ ਘਟਨਾਂ ਨੂੰ ਦਬਾਉਣ ਦਾ ਯਤਨ ਕੀਤਾ ਪਰ ਫਿਰ ਗ੍ਰੰਥੀ ਸਿੰਘ ਦੀ ਪੜਤਾਲ ਲਗਾ ਦਿੱਤੀ। ਇਸ ਬਾਰੇ ਸ੍ਰੀ ਦਰਬਾਰ ਸਾਹਿਬ ਦੇ ਮੈਨੇਜਰ ਸ੍ਰ ਸਤਨਾਮ ਸਿੰਘ ਮਾਂਗਾ ਸਰਾਏ ਨਾਲ ਗਲ ਕੀਤੇ ਜਾਣ ਤੇ ਉਨਾਂ ਦਸਿਆ ਕਿ ਗ੍ਰੰਥੀ ਸਿੰਘ ਨੇ ਵੱਡੀ ਭੁੱਲ ਕੀਤੀ ਹੈ ਇਸ ਮਾਮਲੇ ਦੀ ਪੜਤਾਲ ਕਰਵਾਈ ਜਾ ਰਹੀ ਹੈ। ਇਸ ਮਾਮਲੇ ਤੇ ਜੋ ਵੀ ਜਿੰਮੇਵਾਰ ਹੋਵੇਗਾ ਕਾਰਵਾਈ ਕੀਤੀ ਜਾਵੇਗੀ।