ਸਰੀ-ਸਿੱਖ ਧਰਮ ਬਾਰੇ ਜਾਣਕਾਰੀ ਹਾਸਲ ਕਰਨ ਸਰੀ ਸਕੂਲ ਡਿਸਟ੍ਰਿਕਟ ਫਾਊਂਡੇਸ਼ਨ ਦੇ ਅਧਿਆਪਕ ਅਤੇ ਵਿਦਿਆਰਥੀ ਬੀਤੇ ਦਿਨ ਗੁਰਦੁਆਰਾ ਸਾਹਿਬ ਬਰੁੱਕਸਾਈਡ ਸਰੀ ਵਿਖੇ ਨਤਮਸਤਕ ਹੋਏ। ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪਬਲਿਕ ਰਿਲੇਸ਼ਨ ਸੈਕਟਰੀ ਸੁਰਿੰਦਰ ਸਿੰਘ ਜੱਬਲ ਨੇ ਆਏ ਮਹਿਮਾਨਾਂ ਦਾ ਸਵਾਗਤ ਕੀਤਾ ਅਤੇ ਉਨ੍ਹਾਂ ਨੂੰ ਸਿੱਖ ਧਰਮ ਅਤੇ ਗੁਰਦੁਆਰਾ ਸਾਹਿਬ ਬਾਰੇ ਅਹਿਮ ਜਾਣਕਾਰੀ ਦਿੱਤੀ। ਹਾਜਰ ਅਧਿਆਪਕਾਂ ਨੇ ਸਿੱਖ ਧਰਮ ਦੇ ਨਾਲ ਨਾਲ ਮਨੁੱਖਤਾ ਸੰਬੰਧੀ ਕਰਮ ਧਰਮ ਤੇ ਨਿਤਾਪ੍ਰਤੀ ਫਰਜ਼ਾਂ ਜਿਹੇ ਅਹਿਮ ਮੁੱਦਿਆਂ ਬਾਰੇ ਸਵਾਲਾਂ ਰਾਹੀਂ ਆਪਣੀ ਜਗਿਆਸਾ ਜ਼ਾਹਰ ਕੀਤੀ। ਸ. ਜੱਬਲ ਕਿਹਾ ਕਿ ਸਰੀ ਸਕੂਲ ਡਿਸਟ੍ਰਿਕਟ ਫਾਊਂਡੇਸ਼ਨ ਦੇ ਸੰਚਾਲਕ, ਸੰਸਥਾਪਕ ਅਤੇ ਮੁੱਖ ਅਧਿਆਪਕ ਮੈਥੀਓ ਐਨਨ ਵਧਾਈ ਦੇ ਪਤਾਰ ਹਨ ਕਿ ਉਹ ਵੱਖ ਵੱਖ ਧਰਮਾਂ ਬਾਰੇ ਜਾਣਕਾਰੀ ਪ੍ਰਦਾਨ ਕਰਵਾ ਕੇ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੂੰ ਚੰਗੇਰਾ ਸਮਾਜਿਕ ਮਾਹੌਲ ਸਿਰਜਣ ਦਾ ਕਾਰਜ ਕਰ ਰਹੇ ਹਨ।
ਇਨ੍ਹਾਂ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੇ ਕੁਝ ਸਮਾਂ ਦਰਬਾਰ ਹਾਲ ਵਿਚ ਹਾਜ਼ਰੀ ਭਰ ਕੇ ਕੀਰਤਨ ਸੁਣਿਆ ਅਤੇ ਬਾਅਦ ਵਿਚ ਲੰਗਰ ਵੀ ਛਕਿਆ ਅਤੇ ਉਹ ਸਿੱਖ ਫਲਸਫੇ ਅਤੇ ਲੰਗਰ ਦੀ ਨਿਵੇਕਲੀ ਪ੍ਰਥਾ ਤੋਂ ਬਹੁਤ ਪ੍ਰਭਾਵਤ ਹੋਏ। ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨੇ ਪ੍ਰਬੰਧਕ ਕਮੇਟੀ ਦਾ ਧੰਨਵਾਦ ਕਰਦਿਆਂ ਵਿਦਾਇਗੀ ਲਈ।