ਪਟਿਆਲਾ- ਪਸੂ ਪਾਲਣ ਵਿਭਾਗ ਅੰਦਰ ਕੰਮ ਕਰਦੇ ਵੈਟਰਨਰੀ ਅਫਸਰਾਂ ਅਤੇ ਹੋਰ ਸੀਨੀਅਰ ਅਫਸਰਾਂ ਦੀਆਂ ਵੱਖ-ਵੱਖ ਜਥੇਬੰਦੀਆਂ ਵੱਲੋਂ ਅੱਜ ਇੱਥੇ ਪਟਿਆਲਾ ਵਿਖੇ ਇੱਕ ਸਾਂਝੀ ਮੀਟਿੰਗ ਕਰਕੇ ਜੁਆਇੰਟ ਐਕਸ਼ਨ ਕਮੇਟੀ ਆਫ ਵੈਟਸ ਫਾਰ ਪੇਅ ਪੈਰਿਟੀ ਦਾ ਗਠਨ ਕੀਤਾ ਗਿਆ | ਇਸ ਮੀਟਿੰਗ ਵਿੱਚ ਪਿਛਲੀ ਪੰਜਾਬ ਸਰਕਾਰ ਵੱਲੋਂ ਵੈਟਰਨਰੀ ਅਫਸਰਾਂ ਦੀ ਮੈਡੀਕਲ ਅਫਸਰਾਂ ਨਾਲ ਲੰਮੇ ਸਮੇ ਤੋਂ ਚੱਲੀ ਆ ਰਹੀ ਪੇਅ ਪੈਰਿਟੀ ਤੋੜਨ ਦੀ ਸਖਤ ਨਿਖੇਧੀ ਕੀਤੀ ਗਈ ਅਤੇ ਜਲਦੀ ਹੀ ਇਸ ਘੋਰ ਬੇਇਨਸਾਫੀ ਖਿਲਾਫ ਪੰਜਾਬ ਪੱਧਰਾ ਸਘੰਰਸ਼ ਸੁਰੂ ਕਰਨ ਦਾ ਫੈਸਲਾ ਲਿਆ ਗਿਆ |
ਵੱਖ-ਵੱਖ ਜਥੇਬੰਦੀਆਂ ਦੇ ਇਕੱਠੇ ਹੋਏ ਨੁਮਾਇੰਦਿਆਂ ਵੱਲੋਂ ਸਰਬਸੰਮਤੀ ਨਾਲ ਡਾਕਟਰ ਰਾਜਿੰਦਰ ਸਿੰਘ ਨੂੰ ਕਨਵੀਨਰ ਅਤੇ ਡਾ. ਗੁਰਚਰਨ ਸਿੰਘ, ਡਾ. ਗੁਰਦੀਪ ਸਿੰਘ, ਡਾ.ਕੰਵਰਅਨੂਪ ਕਲੇਰ , ਡਾ. ਮਾਜੀਦ ਅਜਾਦ , ਡਾ. ਗੁਰਦੀਪ ਸਿੰਘ ਪਟਿਆਲਾ ਨੂੰ ਕੋ ਕਨਵੀਨਰ, ਡਾ. ਸੂਰਜ ਭਾਨ ਨੂੰ ਸੂਬਾ ਖਜਾਨਚੀ, ਡਾ. ਦਰਸ਼ਨ ਖੇੜੀ ਨੂੰ ਚੀਫ ਕੋਆਰਡੀਨੇਟਰ , ਡਾ. ਸੁਰਜੀਤ ਸਿੰਘ ਮੱਲ ਨੂੰ ਸਕੱਤਰ, ਡਾ. ਗੁਰਿੰਦਰ ਵਾਲੀਆ ਅਤੇ ਡਾ. ਪਰਮਪਾਲ ਸਿੰਘ ਨੂੰ ਪਰੈਸ ਸਕੱਤਰ, ਡਾ. ਗਗਨਦੀਪ ਕੌਸ਼ਲ ਨੂੰ ਕੋ ਕਨਵੀਨਰ ਸੀਨੀਅਰ ਵਿੰਗ, ਡਾ. ਅਕਸ਼ਪਰੀਤ ਸਿੰਘ ਨੂੰ ਇੰਚਾਰਜ ਸੋਸ਼ਲ ਮੀਡੀਆ ਵਿ਼ੰਗ ਚੁਣਿਆ ਗਿਆ |
ਇਸ ਮੌਕੇ ਪਰੈਸ ਦੇ ਨਾਮ ਇੱਕ ਬਿਆਨ ਜਾਰੀ ਕਰਦਿਆਂ ਆਗੂਆਂ ਨੇ ਕਿਹਾ ਉਹ ਸੰਘਰਸ਼ ਤੋਂ ਪਹਿਲਾਂ ਵੈਟਰਨਰੀ ਡਾਕਟਰਾਂ ਦੀ ਪੈਰਿਟੀ ਦਾ ਅਹਿਮ ਮਸਲਾ ਦੁਬਾਰਾ ਸਰਕਾਰ ਦੇ ਧਿਆਨ ਵਿੱਚ ਲਿਆਉਣਗੇ ਤਾਂ ਜੋ ਇਸਦਾ ਜਲਦ ਤੋਂ ਜਲਦ ਹੱਲ ਕੀਤਾ ਜਾ ਸਕੇ l ਇਸ ਸਬੰਧੀ ਜਲਦ ਹੀ ਜਥੇਬੰਦੀ ਦਾ ਵਫਦ ਮੁੱਖ ਮੰਤਰੀ ਪੰਜਾਬ, ਵਿੱਤ ਮੰਤਰੀ ਅਤੇ ਪਸ਼ੂ ਪਾਲਣ ਮੰਤਰੀ ਨੂੰ ਮਿਲੇਗਾ I
ਜੁਆਇੰਟ ਐਕਸ਼ਨ ਕਮੇਟੀ ਦੇ ਕਨਵੀਨਰ ਡਾ. ਰਾਜਿੰਦਰ ਸਿੰਘ ਅਤੇ ਕੋ ਕਨਵੀਨਰ ਡਾ. ਗੁਰਚਰਨ ਸਿੰਘ ਨੇ ਕਿਹਾ ਕਿ ਹੁਣ ਅਣਸਰਦੇ ਸਘੰਰਸ਼ ਦਾ ਵੇਲਾ ਆ ਚੁੱਕਾ ਹੈ ਕਿਉਂਕਿ ਮੈਡੀਕਲ ਅਫਸਰਾਂ ਨਾਲ ਪੇਅ ਪੈਰਿਟੀ ਦਾ ਮਸਲਾ ਮਹਿਜ ਕੋਈ ਆਰਥਿਕ ਮਸਲਾ ਨਹੀਂ ਹੈ ਸਗੋਂ ਇਹ ਸਮੁੱਚੇ ਵੈਟਰਨਰੀ ਪਰੋਫੈਸ਼ਨ ਦੀ ਆਨ ਸ਼ਾਨ ਅਤੇ ਅਣਖ ਇੱਜਤ ਦਾ ਮਸਲਾ ਹੈ | ਜਿਸ ਨੂੰ ਉਹ ਹਰ ਹਾਲ ਮੁੜ ਤੋਂ ਬਹਾਲ ਕਰਵਾ ਕੇ ਹੀ ਹਟਣਗੇ | ਯਾਦ ਰਹੇ ਕਿ ਇਸ ਪੇਅ ਪੈਰਿਟੀ ਲਈ ਵੈਟਰਨਰੀ ਡਾਕਟਰਾਂ ਨੇ ਸਮੇ ਦੀਆਂ ਸਰਕਾਰਾਂ ਖਿਲਾਫ ਬਹੁਤ ਲੰਮੀ ਲੜਾਈ ਲੜੀ ਸੀ |