ਅੰਮ੍ਰਿਤਸਰ - ਮੋਢੀ ਸਿੱਖ ਵਿਦਿਅਕ ਸੰਸਥਾ ਮੰਨੀ ਜਾਂਦੀ ਖ਼ਾਲਸਾ ਕਾਲਜ ਵਲੋ ਬੀਏ ਦੇ ਚੌਥੇ ਸਮੈਸਟਰ ਦੇ ਹਿਸਟਰੀ ਆਫ ਪੰਜਾਬ ਦੀ ਪ੍ਰੀਖਿਆ ਵਿਚ ਸਿੱਖ ਇਤਿਹਾਸ ਦਾ ਘਾਣ ਕਰਦਿਆਂ ਅਜੀਬੋ ਗਰੀਬ ਪ੍ਰਸ਼ਨ ਪੁੱਛ ਕੇ ਨਵੇਕਲਾ ਇਤਿਹਾਸ ਰਚਿਆ ਹੈ। ਕਾਲਜ ਦੇ ਵਲੋ ਬੀਏ ਸਮੈਸਟਰ ਚਾਰ ਦੇ ਲਈ ਕਰਵਾਈ ਜਾ ਰਹੀ ਪ੍ਰੀਖਿਆ ਵਿਚ ਗੁਰੂ ਅਰਜਨ ਦੇਵ ਜੀ ਅਤੇ ਗੁਰੂ ਤੇਗ ਬਹਾਦਰ ਜੀ ਨੂੰ ਫਾਂਸੀ ਦਿੱਤੇ ਜਾਣ ਬਾਰੇ ਸਵਾਲ ਕਰਕੇ ਤਹਿਲਕਾ ਮਚਾ ਦਿੱਤਾ ਹੈ। ਜਾਣਕਾਰੀ ਮੁਤਾਬਿਕ ਸਿੱਖਾਂ ਦੀ ਪਲੇਠੀ ਵਿਦਿਅਕ ਸੰਸਥਾ ਖ਼ਾਲਸਾ ਕਾਲਜ ਵਿਖੇ ਬੀਏ ਸਮੈਸਟਰ ਚੌਥਾ ਲਈ ਹਿਸਟਰੀ ਆਫ ਪੰਜਾਬ ਦਾ ਪੇਪਰ ਲਿਆ ਜਾ ਰਿਹਾ ਸੀ। ਪੇਪਰ ਵਿਚ ਸਵਾਲ ਨੰਬਰ ਛੇ ਵਿਚ ਸਵਾਲ ਪੁਛਿਆ ਗਿਆ ਕਿ ਗੁਰੂ ਅਰਜਨ ਦੇਵ ਜੀ ਨੂੰ ਜਹਾਗੀਰ ਵਲੋ ਫਾਂਸੀ ਕਿਉ ਦਿੱਤੀ ਗਈ। ਇਥੇ ਹੀ ਬਸ ਨਹੀ ਸਵਾਲ ਨੰਬਰ ਗਿਆਰਾ ਵਿਚ ਪੁਛਿਆ ਗਿਆ ਕਿ ਔਰੰਗਜੇਬ ਨੇ ਗੁਰੂ ਤੇਗ ਬਾਹਦਰ ਜੀ ਨੂੰ ਫਾਂਸੀ ਕਿਉ ਦਿੱਤੀ। ਪੇਪਰ ਵਿਚ ਪੁੱਛੇ ਇਨਾ ਸਵਾਲਾਂ ਕਾਰਨ ਵਿਦਿਆਰਥੀਆਂ ਵਿਚ ਚਰਚਾ ਸ਼ੁਰੂ ਹੋ ਗਈ।
ਖ਼ਾਲਸਾ ਕਾਲਜ ਪ੍ਰਬੰਧ ਨੇ ਪਤਾ ਲਗਦੇ ਸਾਰ ਹੀ ਪ੍ਰਸ਼ਨ ਪੱਤਰ ਤੁਰੰਤ ਵਿਦਿਆਰਥੀਆਂ ਪਾਸੋ ਵਾਪਸ ਲੈ ਲਿਆ।ਕਾਲਜ ਪ੍ਰਬੰਧ ਵਲੋ ਇਸ ਸੰਬਧੀ ਇਕ ਪੱਤਰ ਜਾਰੀ ਕਰਕੇ ਕਿਹਾ ਗਿਆ ਹੈ ਕਿ ਵਿਦਿਆਰਥੀਆਂ ਵਲੋ ਧਿਆਨ ਵਿਚ ਲਿਆਂਦੇ ਜਾਣ ਤੋ ਬਾਅਦ ਸਿੱਖ ਗੁਰੂ ਸਾਹਿਬਾਨ ਬਾਰੇ ਅਜਿਹੀ ਅਸੰਵੇਦਨਸ਼ੀਲ ਤੇ ਅਸਵਿਕਾਰ ਕਰਨਯੌਗ ਸ਼ਬਦਾਵਲੀ ਵਰਤਣ ਤੇ ਕੰਟਰੋਲਰ ਪ੍ਰੀਖਿਆ ਨੇ ਪੇਪਰ ਸੈਂਟਰ ਨੂੰ ਮੁਆਫੀ ਮੰਗਣ ਲਈ ਕਿਹਾ ਗਿਆ ਹੈ।ਪੱਤਰ ਵਿਚ ਅੱਗੇ ਕਿਹਾ ਗਿਆ ਹੈ ਕਿ ਕੰਟਰੋਲਰ ਪੀ੍ਰਖਿਆ ਨੂੰ ਹਦਾਇਤ ਕਰ ਦਿੱਤੀ ਗਈ ਹੈ ਕਿ ਯੂਜੀਸੀ, ਯੂਨੀਵਰਸਿਟੀ ਦੇ ਨਿਯਮਾਂ ਤੇ ਪੇਪਰ ਦੀ ਸੀਕ੍ਰੇਸੀ ਨੂੰ ਧਿਆਨ ਵਿਚ ਰਖ ਕੇ ਪੇਪਰ ਸੈਂਟਰਾਂ ਨੂੰ ਪ੍ਰਸ਼ਨ ਪੱਤਰ ਵੇਲੇ ਭੇਜੀਆਂ ਜਾਣ ਵਾਲੀਆਂ ਹਦਾਇਤਾਂ ਵਿਚ ਸਖਤੀ ਨਾਲ ਲਿਖਣ ਕਿ ਗੁਰੂ ਸਾਹਿਬਾਨ ਤੇ ਸਿੱਖ ਧਰਮ ਪ੍ਰਤੀ ਪੂਰਨ ਸ਼ਰਧਾ ਵਾਲੀ ਸ਼ਬਦਾਵਲੀ ਵਰਤਣੀ ਯਕੀਨੀ ਬਣਾਉਣ।