ਖਰੜ :- ਪੂਰੇ ਭਾਰਤ ਵਿੱਚ ਚਾਇਨਾਂ ਡੋਰ ਉਪਰ ਪਾਬੰਦੀ ਲੱਗੀ ਹੋਈ ਹੈ ਪਰ ਪੂਰੇ ਪੰਜਾਬ ਸੂਬੇ ਵਿੱਚ ਇਸ ਘਾਤਕ ਡੋਰ ਦੀ ਵਿਕਰੀ ਬੇਰੋਕ ਜਾਰੀ ਹੈ। ਇਸ ਸਬੰਧੀ ਨਿਊ ਸਵਰਾਜ ਨਗਰ ਖਰੜ ਦੇ ਸਮਾਜਸੇਵੀ ਆਗੂ ਅਤੇ ਵਾਰਡ ਨੰਬਰ 8 ਦੇ ਪ੍ਰਧਾਨ ਕੰਵਲਜੀਤ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਖਰੜ ਦੇ ਵਟਸਐਪ ਗਰੁੱਪਾਂ ਵਿੱਚ ਇਹ ਗੱਲ ਕਾਫੀ ਚਰਚਾ ਦਾ ਵਿਸ਼ਾ ਬਣੀ ਹੋਈ ਹੈ ਕਿ ਸ਼ਹਿਰ ਵਿੱਚ ਕੁਝ ਦੁਕਾਨਦਾਰ ਚੋਰ ਮੋਰੀ ਰਾਹੀਂ ਇਸ ਘਾਤਕ ਚਾਇਨਾਂ ਡੋਰ ਦੇ ਪਿੰਨੇ ਅਤੇ ਚਰਖੜੀਆਂ ਦੀ ਵਿਕਰੀ ਕਰ ਰਹੇ ਹਨ ਜੋ ਨਾ ਸਿਰਫ ਬੇਜ਼ੁਬਾਨ ਪੰਛੀਆਂ ਲਈ ਘਾਤਕ ਹੈ ਬਲਕਿ ਇਨਸਾਨੀ ਜਾਨਾਂ ਵੀ ਲੈ ਰਹੀ ਹੈ। ਢਿੱਲੋਂ ਨੇ ਕਿਹਾ ਕਿ ਪਿਛਲੇ ਕਈ ਸਾਲਾਂ ਤੋਂ ਸਰਕਾਰਾਂ ਸਿਰਫ ਔਡਰ ਹੀ ਕਰਦੀਆਂ ਆ ਰਹੀਆਂ ਹਨ ਕਿ ਚਾਇਨਾਂ ਡੋਰ ਵੇਚਣ ਵਾਲੇ ਦੁਕਾਨਦਾਰਾਂ ਤੇ ਸਖਤ ਕਾਰਵਾਈ ਕੀਤੀ ਜਾਵੇਗੀ ਪਰ ਇਹ ਹੁਕਮ ਸਿਰਫ ਅਖਬਾਰਾਂ ਦੇ ਅੱਖਰ ਕਾਲੇ ਕਰਨ ਵਾਲੇ ਹੀ ਸਾਬਤ ਹੋ ਰਹੇ ਹਨ ਅਤੇ ਕਾਰਵਾਈ ਕਰਨੀ ਜੀਰੋ ਸਾਬਿਤ ਹੋ ਰਹੀ ਹੈ।
ਢਿੱਲੋਂ ਨੇ ਆਪਣੇ ਪੱਧਰ ਤੇ ਆਪਣੇ ਲਾਗਲੇ ਖੇਤਰ ਦੇ ਦੁਕਾਨਦਾਰਾਂ ਕੋਲੋਂ ਚਾਇਨਾਂ ਡੋਰ ਖਰੀਦਣ ਦਾ ਬਹੁਤ ਯਤਨ ਕੀਤਾ ਪਰ ਦੁਕਾਨਦਾਰ ਪਹਿਲਾਂ ਹੀ ਸਮਝ ਜਾਂਦੇ ਸੀ ਕਿ ਇਹ ਕੋਈ ਨਾ ਕੋਈ ਕਾਰਵਾਈ ਕਰਵਾ ਸਕਦਾ ਹੈ ਇਸ ਲਈ ਹਰ ਇੱਕ ਦੁਕਾਨਦਾਰ ਨੇ ਜਵਾਬ ਦੇ ਦਿੱਤਾ ਕਿ ਅਸੀਂ ਇਹ ਡੋਰ ਵੇਚਦੇ ਹੀ ਨਹੀਂ। ਜਦੋਂ ਢਿੱਲੋਂ ਨੇ ਵੱਖ ਵੱਖ ਗਲੀ ਮੁਹੱਈਆਂ ਵਿੱਚ ਜਾਕੇ ਦੇਖਿਆ ਤਾਂ ਕੁਝ ਬੱਚੇ ਚਾਇਨਾਂ ਡੋਰ ਨਾਲ ਪਤੰਗ ਉਡਾ ਰਹੇ ਸਨ। ਜਦੋਂ ਉਨ੍ਹਾਂ ਬੱਚਿਆਂ ਨੂੰ ਇਸਦੇ ਨੁਕਸਾਨ ਦੱਸਕੇ ਜਾਗਰੂਕ ਕੀਤਾ ਤਾਂ ਉਨ੍ਹਾਂ ਬੱਚਿਆਂ ਨੇ ਆਪਣੀਆਂ ਪਤੰਗਾਂ ਸਮੇਤ ਚਾਇਨਾਂ ਡੋਰ ਢਿੱਲੋਂ ਦੇ ਹਵਾਲੇ ਕਰ ਦਿੱਤੀ ਅਤੇ ਸੌਂਹ ਖਾਧੀ ਕਿ ਅੱਗੇ ਤੋਂ ਉਹ ਇਸ ਡੋਰ ਦਾ ਪ੍ਰਯੋਗ ਨਹੀਂ ਕਰਨਗੇ। ਇਸ ਖੁਸ਼ੀ ਦੇ ਮੌਕੇ ਤੇ ਢਿੱਲੋਂ ਨੇ ਉਨ੍ਹਾਂ ਬੱਚਿਆਂ ਨੂੰ ਦੋ ਸੌ ਰੁਪਏ ਇਨਾਮ ਦਿੱਤਾ ਅਤੇ ਚੰਗੀਆਂ ਚੀਜ਼ਾਂ ਖਾਣ ਦੀ ਸਲਾਹ ਦਿੱਤੀ। ਢਿੱਲੋਂ ਨੇ ਉਨ੍ਹਾਂ ਚਰਖੜੀਆਂ ਅਤੇ ਡੋਰ ਦੇ ਪਿੰਨਿਆਂ ਨੂੰ ਅੱਗ ਲਗਾਕੇ ਫੂੱਕ ਦਿੱਤਾ ਤਾਂ ਜੋ ਕੋਈ ਹੋਰ ਬੱਚਾ ਇਸ ਡੋਰ ਨੂੰ ਨਾ ਵਰਤ ਸਕੇ।
ਢਿੱਲੋਂ ਨੇ ਪ੍ਰਸ਼ਾਸ਼ਨ ਤੋਂ ਮੰਗ ਕੀਤੀ ਕਿ ਇਸ ਮਸਲੇ ਤੇ ਸਰਕਾਰ ਨੂੰ ਗੰਭੀਰ ਹੋਣ ਦੀ ਜਰੂਰਤ ਹੈ ਅਤੇ ਜੋ ਦੁਕਾਨਦਾਰ ਚਾਇਨਾਂ ਡੋਰ ਵੇਚਦੇ ਹਨ ਉਨ੍ਹਾਂ ਉਪਰ ਸਖਤ ਕਾਰਵਾਈ ਕੀਤੀ ਜਾਣੀ ਚਾਹੀਦੀ ਹੈ।