ਜੀਰਕਪੁਰ ਨਗਰ ਕੌਂਸਲ ਦੇ ਨਵਨਿਯੁਤਕ ਪ੍ਰਧਾਨ ਉਦੇਵੀਰ ਸਿੰਘ ਢਿੱਲੋਂ ਵਲੋਂ ਸਹੁੰ ਚੁੱਕਣ ਤੋਂ ਬਾਅਦ ਉਦੇਵੀਰ ਢਿੱਲੋਂ ਅਤੇ ਹਲਕਾ ਕਾਂਗਰਸ ਇੰਚਾਰਜ ਦੀਪਇੰਦਰ ਸਿੰਘ ਢਿਲੋਂ ਵਲੋਂ ਖੇਤਰ ਦੀਆਂ ਨਜਾਇਜ ਉਸਾਰੀਆਂ ਲਈ ਹਲਕਾ ਵਿਧਾਇਕ ਐਨ ਕੇ ਸ਼ਰਮਾ ਅਤੇ ਉਨ੍ਹਾ ਦੀ ਟੀਮ ਨੂੰ ਜਿੰਮੇਵਾਰ ਕਰਾਰ ਦਿੰਦੇ ਹੋਏ ਉਨ੍ਹਾਂ ਖਿਲਾਫ ਪਹਿਲ ਦੇ ਅਧਾਰ ਤੇ ਕਾਰਵਾਈ ਕਰਨ ਦਾ ਬਿਆਨ ਦਿੱਤਾ ਗਿਆ ਸੀ ਪਰ ਇੱਕ ਦਿਨ ਬਾਅਦ ਹੀ ਉਨ੍ਹਾਂ ਦੇ ਇੱਕ ਕਾਫੀ ਨਜਦੀਕੀ ਦੱਸੇ ਜਾਦੇ ਵਿਅਕਤੀ ਵਲੋਂ ਕਥਿਤ ਰੂਪ ਵਿੱਚ ਨਜਾਇਜ ਉਸਾਰੀ ਕਰਕੇ ਬਣਾਏ ਗੁਦਾਮ ਦਾ ਮਾਮਲਾ ਸਾਹਮਣੇ ਆ ਗਿਆ ਹੈ। ਸ਼ਹਿਰ ਵਿੱਚ ਇਸ ਗੱਲ ਨੂੰ ਲੈ ਕੇ ਚਰਚਾ ਛਿੜ ਗਈ ਹੈ ਕਿ ਦੀਪਇੰਦਰ ਸਿੰਘ ਢਿੱਲੋਂ ਇਸ ਨਜਾਇਜ ਉਸਾਰੀ ਕਰਤਾ ਖਿਲਾਫ ਕਾਰਵਾਈ ਕਰਨ ਦੇ ਨਿਰਦੇਸ਼ ਦੇਣਗੇ ਜਾਂ ਉਨ੍ਹਾ ਵਲੋਂ ਨਜਾਇਜ ਉਸਾਰੀਆਂ ਕਰਨ ਵਾਲਿਆਂ ਖਿਲਾਫ ਕਾਰਵਾਈ ਕਰਨ ਦਾ ਦਿੱਤਾ ਬਿਆਨ ਫੋਕਾ ਫਾਇਰ ਸਾਬਿਤ ਹੋਵੇਗਾ।