ਅੰਮ੍ਰਿਤਸਰ - ਸੰਸਥਾ ਗੁਰੂ ਨਾਨਕ ਦੇ ਸਿੱਖ ਵਲੋ ਮਾਝੇ ਵਿਚ ਲੋੜਵੰਦ ਬੱਚਿਆਂ ਦੀ ਪੜਾਈ ਲਈ ਉਚੇਚੇ ਪ੍ਰਬੰਧ ਕੀਤੇ ਗਏ ਹਨ ਤਾਂ ਕਿ ਕੋਈ ਵੀ ਸਿੱਖ ਵਿਿਦਆਰਥੀ ਪੜਾਈ ਤੋ ਵਾਂਝਾ ਨਾ ਰਹਿ ਜਾਵੇ। ਅੱਜ ਜਾਣਕਾਰੀ ਦਿੰਦੇ ਭਾਈ ਸਾਹਿਬ ਸਿੰਘ ਨਾਮਧਾਰੀ ਨੇ ਦਸਿਆ ਕਿ ਸੰਸਥਾ ਗੁਰੂ ਨਾਨਕ ਦੇ ਸਿੱਖ ਵਲੋ ਕੀਤੇ ਉਪਰਾਲੇ ਸਫਲ ਹੋ ਰਹੇ ਹਨ। ਉਨਾਂ ਦਸਿਆ ਕਿ ਅਸੀ ਲੜਕੀਆਂ ਦੀ ਪੜਾਈ ਲਈ ਵਿਸੇ਼ਸ਼ ਯਤਨ ਕਰ ਰਹੇ ਹਾਂ ਤੇ ਜਿਹੜੀਆਂ ਲੋੜਵੰਦ ਲੜਕੀਆਂ 12 ਕਲਾਸ ਪਾਸ ਕਰ ਜਾਂਦੀਆਂ ਹਨ ਉਨਾਂ ਦੀ ਅਗਲੇਰੀ ਪੜਾਈ ਲਈ ਅਸੀ ਫੀਸਾਂ, ਦਾਖਲੇ ਅਤੇ ਕਿਤਾਬਾਂ ਆਦਿ ਦਾ ਖਰਚ ਸਹਿਣ ਕਰਦੇ ਹਾਂ। ਮੈਟ੍ਰਿਕ ਤਕ ਦੀ ਪੜਾਈ ਲਈ ਅਸੀ ਬਚਿਆਂ ਨੂੰ ਮੁਫਤ ਟਿਉਸ਼ਨ ਕਲਾਸਾਂ ਰਾਹੀ ਸਮੇ ਦਾ ਹਾਣੀ ਬਣਾਉਦੇ ਹਾਂ। ਭਾਈ ਸਾਹਿਬ ਸਿੰਘ ਨਾਮਧਾਰੀ ਨੇ ਦਸਿਆ ਕਿ ਮਾਝੇ ਵਿਚ ਅਸੀ ਅੰਮ੍ਰਿਤਸਰ , ਤਰਨਤਾਰਨ ਅਤੇ ਗੁਰਦਾਸਪੁਰ ਦੇ ਵਖ ਵਖ ਪਿੰਡਾਂ ਵਿਚ ਸੈਂਟਰ ਕਾਇਮ ਕੀਤੇ ਹਨ ਜਿਥੇ ਲੜਕੀਆਂ ਨੂੰ ਆਰਥਿਕ ਤੌਰ ਤੇ ਮਜਬੂਤ ਕਰਨ ਲਈ ਸਿਲਾਈ ਕਢਾਈ ਤੇ ਹੱਥੀ ਕਿਰਤ ਕਰਨ ਦੀ ਸਿੱਖਿਆ ਦਿੰਦੇ ਹਾਂ। ਉਨਾਂ ਦਸਿਆ ਕਿ ਸਾਡੇ ਸੈਂਟਰ ਦਦੇਹਰ ਸਾਹਿਬ, ਸਰਹਾਲੀ ਮੰਡ, ਚੋਹਲਾ ਸਾਹਿਬ, ਉਪਲ, ਬਿੰਦੇਸ਼ੀ, ਗੰਡੀਵਿੰਡ, ਸਾਧਪੁਰ ਚੌਗਾਵਾਂ ਆਦਿ ਪਿੰਡਾਂ ਵਿਚ ਸਫਲਤਾ ਪੂਰਵਕ ਚਲ ਰਹੇ ਹਨ।