ਚੰਡੀਗੜ੍ਹ- ਪੰਜਾਬ ਅਤੇ ਹਰਿਆਣਾ ਦੀ ਬਾਰ ਕੌਂਸਲ ਨੇ ਅੱਜ ਕਾਨੂੰਨ ਭਵਨ ਵਿਖੇ ਨਵੇਂ ਚੁਣੇ ਗਏ ਜੱਜਾਂ ਅਤੇ ਉਨ੍ਹਾਂ ਦੇ ਮਾਪਿਆਂ ਨੂੰ ਸਨਮਾਨਿਤ ਕਰਨ ਲਈ ਇੱਕ ਪ੍ਰੋਗਰਾਮ ਦਾ ਆਯੋਜਨ ਕੀਤਾ। ਜੀ.ਪੀ ਸਰ (ਗੁਰਿੰਦਰ ਪਾਲ ਸਿੰਘ) ਵੱਲੋਂ ਪੜ੍ਹਾਏ ਲੋੜਵੰਦ ਬੱਚਿਆਂ ਦੇ ਸਫਲ ਹੋਣ 'ਤੇ ਇਹ ਸਨਮਾਨ ਸਮਾਰੋਹ ਕਰਵਾਇਆ ਗਿਆ।
ਜੀਪੀ ਸਿੰਘ ਹਾਈ ਕੋਰਟ ਵਿੱਚ ਇੱਕ ਵਕੀਲ ਹੈ ਜਿਸ ਨੇ 2019 ਵਿੱਚ ਲੋੜਵੰਦ ਬੱਚਿਆਂ ਲਈ ਮੁਫ਼ਤ ਕੋਚਿੰਗ ਸ਼ੁਰੂ ਕੀਤੀ ਜੋ ਜੁਡੀਸ਼ੀਅਲ ਸਰਵਿਸਿਜ਼ ਦੀ ਕੋਚਿੰਗ ਫੀਸ ਦਾ ਭੁਗਤਾਨ ਕਰਨ ਵਿੱਚ ਅਸਮਰੱਥ ਸਨ। ਵਰਤਮਾਨ ਵਿੱਚ ਜੀਪੀ ਸਿੰਘ ਦੁਆਰਾ ਪੜ੍ਹਾਏ ਗਏ 5 ਉਮੀਦਵਾਰਾਂ ਨੇ ਹਰਿਆਣਾ ਜੁਡੀਸ਼ਰੀ ਸਰਵਿਸਜ਼ ਦੀ ਪ੍ਰੀਖਿਆ ਪਾਸ ਕੀਤੀ ਹੈ ਅਤੇ ਜੱਜ ਬਣ ਗਏ ਹਨ।
ਨਵਨਿਯੁਕਤ ਜੱਜਾਂ ਰੇਣੂ ਬਾਲਾ, ਰਿਤਿਕਾ ਸ਼ਰਮਾ, ਮਨਜੋਤ ਕੌਰ, ਜਸਮੀਤ ਕੌਰ ਅਤੇ ਅਵਿਸ਼ੇਕ ਗਰਗ ਅਤੇ ਉਨ੍ਹਾਂ ਦੇ ਮਾਪਿਆਂ ਨੂੰ ਸਨਮਾਨਿਤ ਕੀਤਾ ਗਿਆ। ਇਸ ਦੇ ਨਾਲ ਹੀ ਪੀਜੀਆਈ ਦੇ ਸਾਬਕਾ ਸੀਨੀਅਰ ਫੋਟੋਗ੍ਰਾਫਰ ਕੁਲਦੀਪ ਸੋਨੀ ਨੂੰ ਵੀ ਜੀਪੀ ਸਰ ਦੀਆਂ ਕਲਾਸਾਂ ਵਿੱਚ ਦਿੱਤੇ ਗਏ ਯੋਗਦਾਨ ਲਈ ਸਨਮਾਨਿਤ ਕੀਤਾ ਗਿਆ। ਕੁਲਦੀਪ ਸੋਨੀ ਨੇ ਜੀਪੀ ਸਰ ਦੀਆਂ ਕਲਾਸਾਂ ਦੇ ਡਾਕੂਮੈਂਟੇਸ਼ਨ ਕਰਨ, ਔਨਲਾਈਨ ਕਲਾਸਾਂ ਲੈਣ ਅਤੇ ਸ਼ਖਸੀਅਤ-ਭਾਸ਼ਾ 'ਤੇ ਕੰਮ ਕਰਨ ਵਿੱਚ ਮਦਦ ਕੀਤੀ।
ਇਸ ਮੌਕੇ ਬਾਰ ਕੌਂਸਲ ਆਫ਼ ਪੰਜਾਬ ਅਤੇ ਹਰਿਆਣਾ ਦੇ ਪ੍ਰਧਾਨ ਸੁਵੀਰ ਸਿੱਧੂ, ਮੀਤ ਪ੍ਰਧਾਨ ਅਸ਼ੋਕ ਸਿੰਗਲਾ, ਸੁਪਰੀਮ ਕੋਰਟ ਆਫ਼ ਇੰਡੀਆ ਦੇ ਸੀਨਿਅਰ ਐਡਵੋਕੇਟ ਆਰ.ਐਸ.ਚੀਮਾ, ਸਾਬਕਾ ਐਡਵੋਕੇਟ ਜਨਰਲ ਪੰਜਾਬ ਏ.ਪੀ.ਐਸ ਦਿਓਲ, ਝਾਰਖੰਡ ਹਾਈ ਕੋਰਟ ਦੇ ਸਾਬਕਾ ਚੀਫ਼ ਜਸਟਿਸ ਵਰਿੰਦਰ ਸਿੰਘ, ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ ਸਾਬਕਾ ਜੱਜ ਪਰਮਜੀਤ ਸਿੰਘ ਧਾਲੀਵਾਲ, ਸਾਬਕਾ ਐਡੀਸ਼ਨਲ ਐਡਵੋਕੇਟ ਜਨਰਲ ਬਲਦੇਵ ਸਿੰਘ ਬਧਰਾਣ, ਬਾਰ ਕੌਂਸਲ ਦੇ ਐਡੀਸ਼ਨਲ ਸੇਕ੍ਰੇਟਰੀ ਮਲਕੀਤ ਸਿੰਘ ਅਤੇ ਗੁਰਿੰਦਰ ਪਾਲ ਸਿੰਘ ਹਾਜ਼ਰ ਸਨ।
ਸਮਾਗਮ ਵਿੱਚ ਸਨਮਾਨਿਤ ਕੀਤੇ ਗਏ ਨਵੇਂ ਚੁਣੇ ਗਏ ਜੱਜਾਂ ਨੇ ਜੀ ਪੀ ਸਿੰਘ ਵੱਲੋਂ ਦਿੱਤੇ ਮਾਰਗਦਰਸ਼ਨ ਬਾਰੇ ਵਿਸਥਾਰ ਨਾਲ ਦੱਸਿਆ ਅਤੇ ਇਸ ਯਾਤਰਾ ਵਿੱਚ ਉਨ੍ਹਾਂ ਦੀ ਮਦਦ ਕਰਨ ਲਈ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਜੁਡੀਸ਼ਰੀ ਇਮਤਿਹਾਨ ਪਾਸ ਕਰਨ ਲਈ ਮਿਹਨਤ ਅਤੇ ਲਗਨ ਦੇ ਨਾਲ-ਨਾਲ ਜਨੂੰਨ ਦਾ ਹੋਣਾ ਬਹੁਤ ਜ਼ਰੂਰੀ ਹੈ ਤਾਂ ਹੀ ਤੁਸੀਂ ਸਫਲਤਾ ਪ੍ਰਾਪਤ ਕਰ ਸਕਦੇ ਹੋ।
ਬਾਰ ਕੌਂਸਲ ਦੇ ਪ੍ਰਧਾਨ ਸੁਵੀਰ ਸਿੱਧੂ ਨੇ ਜੀ.ਪੀ. ਸਿੰਘ ਦੇ ਕਾਰਜਾਂ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇਹ ਜੀ.ਪੀ. ਸਿੰਘ ਅਤੇ ਉਨ੍ਹਾਂ ਦੇ ਪਰਿਵਾਰ ਦੀ ਸਾਂਝੀ ਕੋਸ਼ਿਸ਼ ਹੈ ਕਿ ਅੱਜ ਉਨ੍ਹਾਂ ਦੇ ਪੜ੍ਹਾਏ ਬੱਚੇ ਜੱਜ ਬਣੇ ਹਨ। ਉਨ੍ਹਾਂ ਐਲਾਨ ਕੀਤਾ ਕਿ ਬਾਰ ਕੌਂਸਲ ਵੱਲੋਂ ਜੀ ਪੀ ਸਰ ਕਲਾਸ ਲਈ ਹਰ ਮਦਦ ਮੁਹੱਈਆ ਕਰਵਾਈ ਜਾਵੇਗੀ।