ਅੰਮ੍ਰਿਤਸਰ -ਮਹਾਰਾਜਾ ਰਣਜੀਤ ਸਿੰਘ ਦੀ ਸਤਵੀ ਪੀੜੀ ਚੋ ਡਾ ਜ਼ਸਵਿੰਦਰ ਸਿੰਘ ਨੇ ਇੰਗਲੈਂਡ ਵਿਚ ਵਸਦੇ ਸਿੱਖ ਭਾਈਚਾਰੇ ਨੂੰ ਮਹਾਰਾਜਾ ਦਲੀਪ ਸਿੰਘ ਦੀਆਂ ਕਬਰ ਵਿਚ ਬੰਦ ਅਸਥੀਆਂ ਨੂੰ ਭਾਰਤ ਦੇ ਸ਼ਹਿਰ ਅੰਮ੍ਰਿਤਸਰ ਜਾਂ ਪਾਕਿਸਤਾਨ ਦੇ ਸ਼ਹਿਰ ਲਾਹੌਰ ਲਿਆ ਕੇ ਸਿੱਖ ਰਹੁਰੀਤਾਂ ਨਾਲ ਸਸਕਾਰ ਕਰਨ ਲਈ ਚਾਰਾਜੋਈ ਕਰਨ ਲਈ ਕਿਹਾ ਹੈ। ਅੱਜ ਪੱਤਰਕਾਰਾਂ ਨਾਲ ਗਲ ਕਰਦਿਆਂ ਡਾ ਜ਼ਸਵਿੰਦਰ ਸਿੰਘ ਨੇ ਕਿਹਾ ਕਿ ਮਹਾਰਾਜਾ ਦਲੀਪ ਸਿੰਘ ਨੂੰ ਅੰਗਰੇਜ਼ ਹਾਕਮ ਧੋਖੇ ਨਾਲ ਇੰਗਲੈਂਡ ਲੈ ਗਏ ਸਨ ਤੇ ਉਨਾਂ ਦਾ ਧਰਮ ਪਰਵਰਤਨ ਕਰ ਦਿੱਤਾ ਸੀ। ਸਿੱਖ ਸਰਦਾਰਾਂ ਦੇ ਯਤਨਾ ਨਾਲ ਜਦ ਮਹਾਰਾਜਾ ਕੁਝ ਸਮੇ ਲਈ ਭਾਰਤ ਆਇਆ ਸੀ ਤਾਂ ਮਹਾਰਾਣੀ ਜਿੰਦ ਕੌਰ ਦੇ ਯਤਨਾ ਨਾਲ ਉਹ ਮੁੜ ਗੁਰਸਿੱਖ ਬਣਿਆ ਸੀ। ਮਹਾਰਾਜੇ ਦੇ ਅਕਾਲ ਚਲਾਣਾ ਕਰ ਜਾਣ ਤੋ ਬਾਅਦ ਉਸ ਦੀ ਮ੍ਰਿਤਕ ਦੇਹ ਨੂੰ ਇਸਾਈ ਪ੍ਰਪਰਾਵਾਂ ਮੁਤਾਬਿਕ ਦਫਨਾ ਦਿੱਤਾ ਗਿਆ ਸੀ। ਖ਼ਾਲਸਾ ਪੰਥ ਅਤੇ ਉਹ ਲੰਮੇ ਸਮੇ ਤੋ ਮਹਾਰਾਜਾ ਦਲੀਪ ਸਿੰਘ ਦੀਆਂ ਅਸਥੀਆਂ ਦਾ ਸਸਕਾਰ ਕੀਤੇ ਜਾਣ ਦੀ ਮੰਗ ਕਰ ਰਹੇ ਹਨ। ਉਨਾਂ ਇੰਗਲੈਂਡ ਵਿਚ ਵਸਦੇ ਸਿੱਖ ਭਾਈਚਾਰੇ ਨੂੰ ਅਵਾਜ ਦਿੱਤੀ ਕਿ ਇੰਗਲੈਂਡ ਵਿਚ ਸਿਆਸੀ ਤੌਰ ਤੇ ਮਜਬੂਤ ਧਿਰਾਂ ਉਥੋ ਦੀ ਸਰਕਾਰ ਨਾਲ ਗਲਬਾਤ ਕਰਕੇ ਉਸ ਸ਼ੇਰ ਏ ਪੰਜਾਬ ਮਹਾਰਾਜਾ ਰਣਜੀਤ ਸਿੰਘ ਦੇ ਰਾਜ ਦੇ ਆਖਰੀ ਸਿੱਖ ਰਾਜੇ ਦੀਆਂ ਅਸਥੀਆਂ ਗੁਰੂ ਨਗਰੀ ਸ੍ਰੀ ਅੰਮ੍ਰਿਤਸਰ ਜਾਂ ਸਿੱਖ ਰਾਜ ਦੀ ਰਾਜਧਾਨੀ ਲਾਹੌਰ ਵਿਖੇ ਲਿਆ ਕੇ ਸਿੱਖ ਰਹੁਰੀਤਾਂ ਮੁਤਾਬਿਕ ਅੰਤਮ ਸਸਕਾਰ ਕਰਨ ਦਾ ਯਤਨ ਕਰਨ।