ਸ਼੍ਰੋਮਣੀ ਅਕਾਲੀ ਦਲ ਪੁਨਰ-ਸੁਰਜੀਤ ਦੇ ਸਕੱਤਰ ਜਨਰਲ ਗੁਰਪ੍ਰਤਾਪ ਸਿੰਘ ਵਡਾਲਾ ਨੇ ਇਆਲੀ ਦੇ ਅਸਤੀਫੇ ਤੇ ਆਪਣਾ ਪ੍ਰਤੀਕਰਮ ਦਿੰਦਿਆਂ ਕਿਹਾ ਕਿ ਮਨਪ੍ਰੀਤ ਸਿੰਘ ਇਆਲੀ ਨੇ ਪਾਰਟੀ ਦੇ ਅਹੁਦਿਆਂ ਤੋਂ ਅਸਤੀਫਾ ਦੇ ਕੇ ਸ੍ਰੀ ਅਕਾਲ ਤਖਤ ਸਾਹਿਬ ਨੂੰ ਪਿੱਠ ਦਿਖਾਈ ਹੈ। ਕਿਉਂਕਿ ਇਹ ਪਲੇਟਫਾਰਮ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਸਿਰਜਿਆ ਗਿਆ ਸੀ ਤੇ ਮਨਪ੍ਰੀਤ ਸਿੰਘ ਇਆਲੀ ਸਮੇਤ ਪੰਜ ਮੈਂਬਰਾਂ ਨੂੰ ਇਹ ਅਹਿਮ ਜਿੰਮੇਵਾਰੀ ਦਿੰਦਿਆਂ ਭਰਤੀ ਦੀ ਸੇਵਾ ਲਾਈ ਗਈ ਸੀ, ਪ੍ਰੰਤੂ ਭਰਤੀ ਦੌਰਾਨ ਵੀ ਅਤੇ ਵੱਖ-ਵੱਖ ਜਨਤਕ ਮੀਟਿੰਗਾਂ ਵਿੱਚ ਵੀ, ਇਆਲੀ ਆਪਣੀ ਵੱਖਰੀ ਸੁਰ ਅਲਾਪਦੇ ਰਹੇ। ਫਿਰ ਵੀ ਪਾਰਟੀ ਦੀ ਸਮੁੱਚੀ ਸੀਨੀਅਰ ਲੀਡਰਸ਼ਿਪ ਹਮੇਸ਼ਾਂ ਪਾਰਟੀ ਅਤੇ ਪੰਥ ਦੇ ਵਡੇਰੇ ਹਿੱਤਾਂ ਕਰਕੇ ਇਸ ਨੂੰ ਸਹਿਣ ਕਰਦੇ ਰਹੇ। ਅੱਜ ਮਨਪ੍ਰੀਤ ਇਆਲੀ ਵੱਲੋਂ ਜੋ ਇਲਜ਼ਾਮ ਸੀਨੀਅਰ ਲੀਡਰਸ਼ਿਪ ਤੇ ਲਗਾਏ ਗਏ, ਉਹ ਬਿਲਕੁਲ ਬੇਬੁਨਿਆਦ ਹਨ। ਕਿਉਂਕਿ ਭਰਤੀ ਦੌਰਾਨ ਵੀ ਇਹਨਾਂ ਹੀ ਲੀਡਰਾਂ ਨੇ ਭਰਤੀ ਲਈ ਪ੍ਰੋਗਰਾਮ ਕਰਾਏ ਸਨ, ਜਿਥੇ ਵਰਕਰਾਂ ਦੀ ਪੰਦਰਾਂ ਲੱਖ ਭਰਤੀ ਕੀਤੀ ਅਤੇ ਡੈਲੀਗੇਟ ਚੋਣਾਂ ਕਰਵਾਈਆਂ। ਇਸੇ ਭਰਤੀ ਕਮੇਟੀ ਨੇ ਹੀ ਉਹਨਾਂ ਸੀਨੀਅਰ ਲੀਡਰਾਂ ਨੂੰ ਡੈਲੀਗੇਟ ਚੁਣਿਆ। ਉਹ ਡੈਲੀਗੇਟ ਬਣਨ ਉਪਰੰਤ ਹੀ ਪਾਰਟੀ ਦੇ ਅਹੁਦੇਦਾਰ ਬਣੇ ਹਨ। ਸੋ ਇਹਨਾਂ ਆਗੂਆਂ 'ਤੇ ਇਲਜ਼ਾਮ ਲਾਉਣ ਨਾਲ ਇਆਲੀ ਸ੍ਰੀ ਅਕਾਲ ਤਖਤ ਨੂੰ ਪਿੱਠ ਦਿਖਾ ਕੇ ਸੁਖਬੀਰ ਬਾਦਲ ਵਾਲੀ ਕਤਾਰ ਵਿੱਚ ਖੜ੍ਹ ਗਏ ਹਨ। ਕਿਉਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਵੱਲੋਂ ਸਾਰੇ ਲੀਡਰਾਂ ਨੂੰ ਬਣਦੀ ਸਜ਼ਾ ਲਾ ਕੇ ਦੋਸ਼ ਮੁਕਤ ਕਰ ਦਿੱਤਾ ਸੀ। ਗੁਰੂ ਦਾ ਸਿਧਾਂਤ ਇਹ ਕਹਿੰਦਾ ਹੈ ਕਿ ਗੁਰੂ ਦਾ ਦਰ ਤੇ ਤਖ਼ਤ ਨਿਮਾਣਾ ਬਣਕੇ ਮਾਫ਼ੀ ਮੰਗਣ ਵਾਲੇ ਨੂੰ ਬਖ਼ਸ਼ ਦਿੰਦਾ ਹੈ
ਇਆਲੀ ਦੀ ਇਸ ਹਰਕਤ ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਦੇ ਸਿਧਾਂਤ ਨੂੰ ਮੰਨਣ ਵਾਲਾ ਕੋਈ ਸੱਚਾ ਸਿੱਖ ਕਦੇ ਮੁਆਫ ਨਹੀਂ ਕਰੇਗਾ।