ਅੰਮ੍ਰਿਤਸਰ - ਸਿੰਘ ਸਿੱਖਾਂ ਦੀ ਅਜਾਦ ਹਸਤੀ ਤੇ ਅਡਰੀ ਹੌਂਦ ਦੇ ਪ੍ਰਤੀਕ ਮੂਲ ਨਾਨਕਸ਼ਾਹੀ ਕੈਲੰਡਰ ਮੁਤਾਬਿਕ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਵਲੋ ਗੁਰਦਵਾਰਾ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਵਿਖੇ ਸ੍ਰੀ ਗੁਰੂ ਨਾਨਕ ਸਾਹਿਬ ਦੇ ਜੋਤਿ ਜੋਤ ਪੁਰਬ ਮੌਕੇ ਹੋਣ ਵਾਲੇ ਸਮਾਗਮਾਂ ਵਿਚ ਭਾਗ ਲੈਣ ਲਈ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਸਿੰਘ ਸਾਹਿਬ ਗਿਆਨੀ ਹਰਪ੍ਰੀਤ ਸਿੰਘ ਅੱਜ ਅਟਾਰੀ— ਵਾਹਗਾ ਸਰਹੱਦ ਰਾਹੀ ਪਾਕਿਸਤਾਨ ਪਹੁੰਚ ਗਏ ਹਨ। ਜਥੇਦਾਰ ਨੇ ਨਾਲ ਸ੍ਰੀ ਦਰਬਾਰ ਸਾਹਿਬ ਦੇ ਹਜੂਰੀ ਰਾਗੀ ਭਾਈ ਜਰਨੈਲ ਸਿੰਘ ਕੁਹਾੜਕਾ ਦਾ ਰਾਗੀ ਜੱਥਾ ਵੀ ਪਾਕਿਸਤਾਨ ਗਿਆ ਹੈ। ਜਿਵੇ ਹੀ ਜਥੇਦਾਰ ਨੇ ਪਾਕਿਸਤਾਨ ਦੀ ਧਰਤੀ ਤੇ ਪੈਰ ਰਖਿਆ ਤਾਂ ਉਥੇ ਹਾਾਜਰ ਸੰਗਤਾਂ ਨੇ ਜੈਕਾਰਿਆਂ ਦੀ ਗੂੰਜ ਵਿਚ ਜਥੇਦਾਰ ਦਾ ਸਵਾਗਤ ਕੀਤਾ। ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ੍ਰ ਅਮੀਰ ਸਿੰਘ, ਜਰਨਨ ਸਕਤੱਰ ਸ੍ਰ ਵਿਕਾਸ ਸਿੰਘ, ਐਮ ਐਨ ਏ ਸ੍ਰ ਰਾਮੇਸ਼ ਸਿੰਘ ਅਰੋੜਾ, ਪਾਕਿਸਤਾਨ ਕਮੇਟੀ ਦੇ ਸਾਬਕਾ ਪ੍ਰਧਾਨ ਸ੍ਰ ਬਿਸ਼ਨ ਸਿੰਘ , ਸ੍ਰ ਤਾਰਾ ਸਿੰਘ ਤੇ ਸ੍ਰ ਸਤਵੰਤ ਸਿੰਘ ਦੇ ਨਾਲ ਨਾਲ ਇਵੈਕੁਈ ਟਰਸਟ ਦੇ ਜਰਨਲ ਸਕਤੱਰ ਜਨਾਬ ਤਾਰਿਕ ਵਜ਼ੀਰ ਤੇ ਡਿਪਟੀ ਸੈਕਟਰੀ ਸ਼ਰਾਇਨ ਜਨਾਬ ਇਮਾਰਨ ਗੌਂਦਲ ਨੇ ਜਥੇਦਾਰ ਤੇ ਨਾਲ ਆਏ ਵਫਦ ਦਾ ਫੁਲਾਂ ਦੇ ਹਾਰ ਪਾ ਕੇ ਸਵਾਗਤ ਕੀਤਾ। ਜਥੇਦਾਰ ਅੱਜ ਰਾਤ ਗੁਰਦਵਾਰਾ ਡੇਹਰਾ ਸਾਹਿਬ ਲਾਹੌਰ ਵਿਖੇ ਰੁਕਣਗੇ। ਅੱਜ ਰਾਤ ਜਥੇਦਾਰ ਤੇ ਨਾਲ ਗਿਆ ਵਫਦ ਪਾਕਿਸਤਾਨੀ ਪੰਜਾਬ ਦੇ ਗਵਰਨਰ ਚੌਧਰੀ ਮੁਹੰਮਦ ਸਰਵਰ ਦੇ ਨਾਲ ਗਵਰਨਰ ਹਾਉਸ ਲਾਹੌਰ ਵਿਚ ਰਾਤ ਦਾ ਖਾਣਾ ਖਾਵੇਗਾ। ਇਸ ਮੌਕੇ ਤੇ ਫੈਡਰਲ ਮੰਤਰੀ ਐਜਾਜ ਆਲਮ ਦੇ ਨਾਲ ਨਾਲ ਸ੍ਰ ਅਮੀਰ ਸਿੰਘ, ਬਿ਼ਸਨ ਸਿੰਘ, ਤਾਰਾ ਸਿੰਘ, ਐਮ ਐਨ ਏ ਸ੍ਰ ਰਾਮੇਸ਼ ਸਿੰਘ ਅਰੋੜਾ ਅਤੇ ਮੁਹਿੰਦਰਪਾਲ ਸਿੰਘ ਦੇ ਨਾਲ ਨਾਲ ਹਿੰਦੂ ਭਾਈਚਾਰੇ ਤੋ ਅਤੇ ਇਸਾਈ ਭਾਈਚਾਰੇ ਨਾਲ ਸੰਬਧਤ ਧਾਰਮਿਕ ਆਗੂ ਵੀ ਹਾਜਰ ਰਹਿਣਗੇ।ਅੱਜ ਦਿਨ ਸਮੇ ਜਥੇਦਾਰ ਲਾਹੌਰ ਦੀ ਇਕ ਯੂਨੀਵਰਸਿਟੀ ਵਿਚ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਨਗੇ। ਸ਼ਾਮ ਨੂੰ ਜਥੇਦਾਰ ਵਫਦ ਸਮੇਤ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਜਾਣਗੇ। ਇਸ ਬਾਰੇ ਹੋਰ ਗਲ ਕਰਦਿਆਂ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਅਮੀਰ ਸਿੰਘ ਨੇ ਦਸਿਆ ਕਿ 22 ਸਤੰਬਰ ਨੂੰ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਤੋ ਲਾਂਘੇ ਤਕ ਭਾਰਤ ਪਾਕਿ ਸਰਹੱਦ ਤਕ ਇਕ ਨਗਰ ਕੀਰਤਨ ਸਜਾਇਆ ਜਾ ਰਿਹਾ ਹੈ। ਦਸਣਯੋਗ ਹੈ ਕਿ ਸ੍ਰੀ ਗੁਰੂ ਨਾਨਕ ਸਾਹਿਬ ਦੇ ਜੋਤਿ ਜੋਤ ਪੁਰਬ ਪਾਕਿਸਤਾਨ ਸਿੱਖ ਗੁਰਦਵਾਰਾ ਪ੍ਰੰਬਧਕ ਕਮੇਟੀ ਵਲੋ ਗੁਰਦਵਾਰਾ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਵਿਖੇ ਮੂਲ ਨਾਨਕਸ਼ਾਹੀ ਕੈਲੰਡਰ ਮੁਤਾਬਿਕ 22 ਸਤੰਬਰ ਨੂੰ ਮਨਾਇਆ ਜਾ ਰਿਹਾ ਹੈ ਜਦਕਿ ਭਾਰਤ ਵਿਚ ਇਹ ਦਿਹਾੜਾ ਸ਼ੋ੍ਰਮਣੀ ਕਮੇਟੀ ਵਲੋ 16 ਅਸੂ ਭਾਵ 1 ਅਕਤੂਬਰ ਨੂੰ ਮਨਾਇਆ ਜਾਵੇਗਾ।