ਅੰਮ੍ਰਿਤਸਰ - ਆਈ ਐਚ ਏ ਫਾਊਡੇਸ਼ਨ ਅਤੇ ਸ਼ਮਾਰੂ ਕੈਸਟ ਸਾਂਝੇ ਤੌਰ ਤੇ ਗੁਰਦਵਾਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਦੀ ਜੰਮਪਲ ਬੀਬਾ ਮਨਬੀਰ ਕੌਰ ਦੁਆਰਾ ਗਾਇਣ ਕੀਤੇ ਸ਼ਬਦਾਂ ਦੀ ਸੀ ਡੀ ਤਿਆਰ ਕਰਵਾਉਣਗੇ। ਇਹ ਜਾਣਕਾਰੀ ਦਿੰਦੇ ਆਈ ਐਚ ਏ ਫਾਊਡੇਸ਼ਨ ਦੇ ਚੇਅਰਮੈਨ ਸ ਸਤਨਾਮ ਸਿੰਘ ਆਹਲੂਵਾਲੀਆ ਨੇ ਕਿਹਾ ਕਿ ਅਸੀਂ ਸ੍ਰੀ ਦਰਬਾਰ ਸਾਹਿਬ ਸ੍ਰੀ ਕਰਤਾਰਪੁਰ ਸਾਹਿਬ ਵਿਖੇ ਬੀਬਾ ਮਨਬੀਰ ਕੌਰ ਵਲੋਂ ਗਾਇਨ ਕੀਤਾ ਕੀਰਤਨ ਸਰਵਣ ਕੀਤਾ। ਬੀਬਾ ਦੀ ਆਵਾਜ਼ ਰੂਹ ਨੂੰ ਖੇੜਾ ਦੇਣ ਵਾਲੀ ਹੈ। ਉਹਨਾਂ ਇਸ ਬਾਰੇ ਤੁਰੰਤ ਸ਼ਮਾਰੂ ਕੈਸਟ ਦੇ ਸ. ਬਬਲੀ ਸਿੰਘ ਨਾਲ ਵਿਚਾਰ ਕਰਕੇ ਉਹਨਾਂ ਨੂੰ ਬੀਬਾ ਮਨਬੀਰ ਕੌਰ ਦੇ ਗਾਏ ਸ਼ਬਦ ਗੁਰਬਾਣੀ ਦੀ ਸੀ ਡੀ ਤਿਆਰ ਕਰਨ ਦਾ ਸੁਝਾਅ ਦਿੱਤਾ ਜੋ ਉਹਨਾਂ ਕਬੂਲ ਕਰ ਲਿਆ। ਸ ਆਹਲੂਵਾਲੀਆ ਨੇ ਕਿਹਾ ਕਿ ਜਲਦ ਹੀ ਸੰਸਾਰ ਪ੍ਰਸਿੱਧ ਕੰਪਨੀ ਸ਼ਮਾਰੂ ਬੀਬਾ ਦੇ ਗਾਏ ਸ਼ਬਦ ਇਕ ਸੀ ਡੀ ਦੇ ਰੂਪ ਵਿਚ ਜਾਰੀ ਕਰੇਗੀ। ਜ਼ਿਕਰਯੋਗ ਹੈ ਕਿ ਬੀਬਾ ਮਨਬੀਰ ਕੌਰ ਗੁਰਦਵਾਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਦੇ ਹੈਡ ਗ੍ਰੰਥੀ ਸਿੰਘ ਸਾਹਿਬ ਗਿਆਨੀ ਪ੍ਰੇਮ ਸਿੰਘ ਦੀ ਸਪੁੱਤਰੀ ਹੈ ਤੇ ਹਰ ਰੋਜ਼ ਇਕ ਸਮੇ ਗੁਰਦਵਾਰਾ ਸਾਹਿਬ ਵਿਖੇ ਕੀਰਤਨ ਦੀ ਹਾਜ਼ਰੀ ਭਰਦੀ ਹੈ। ਅਕਸਰ ਕਿਹਾ ਜਾਂਦਾ ਹੈ ਕਿ ਪਾਕਿਸਤਾਨ ਵਿਚ ਵਸਦੀਆਂ ਸਿੱਖ ਤੇ ਹਿੰਦੂ ਲੜਕੀਆਂ ਮਨਬੀਰ ਕੌਰ ਨੂੰ ਆਪਣਾ ਰੋਲ ਮਾਡਲ ਮੰਨਦੀਆਂ ਹਨ। ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਵਿਖੇ ਮਨਬੀਰ ਕੌਰ ਆਸਾ ਦੀ ਵਾਰ ਦਾ ਜਦ ਕੀਰਤਨ ਕਰਦੀ ਹੈ ਤਾਂ ਸੰਗਤ ਇਕ ਮਨ ਇਕ ਚਿਤ ਹੋ ਕੇ ਇਹ ਕੀਰਤਨ ਸਰਵਣ ਕਰਦੀ ਹੈ।