ਪੰਥ ਦੀ ਉਡੀਕ ਕਰ ਰਿਹਾ ਹੈ ਸੰਤਾਂ ਦਾ ਸਾਥੀ ਫੋਟੋਗ੍ਰਾਫਰ ਸਤਪਾਲ ਦਾਨਿਸ਼

ਅੰਮ੍ਰਿਤਸਰ-20 ਵੀ ਸਦੀ ਦੇ ਮਹਾਨ ਸਿੱਖ ਸੰਤ ਜਰਨੈਲ ਸਿੰਘ ਖ਼ਾਲਸਾ ਭਿੰਡਰਾ ਵਾਲਿਆਂ ਦੇ ਅਤਿ ਨੇੜਲੇ ਸਾਥੀ ਪੱਤਰਕਾਰ ਤੇ ਫੋਟੋਗ੍ਰਾਫਰ ਸਤਪਾਲ ਦਾਨਿਸ਼ ਅੱਜ ਆਪਣੇ ਘਰ ਵਿਚ ਜਿੰਦਗੀ ਲਈ ਜੰਗ ਲੜ ਰਿਹਾ ਹੈ। ਸਤਪਾਲ ਦਾਨਿਸ਼ ਪਿਛਲੇ ਕਰੀਬ 8 ਮਹੀਨੇ ਤੋ ਬਿਮਾਰ ਹਨ ਤੇ ਵਖ ਵਖ ਹਸਪਤਾਲਾਂ ਵਿਚ ਇਲਾਜ ਕਰਵਾ ਚੁੱਕੇ ਹਨ।ਸਰੀਰ ਕਮਜੋਰ ਹੋ ਚੁੱਕਾ ਹੈ ਤੇ ਇਕ ਹੇਰਵਾ ਵੀ ਹੈ ਕਿ ਜਿਸ ਪੰਥ ਦੀ ਸੇਵਾ ਕਰਦਿਆਂ ਉਮਰ ਲੰਘ ਗਈ ਉਸ ਪੰਥ ਵਿਚੋ ਕਿਸੇ ਨੇ ਆ ਕੇ ਹਾਲ ਵੀ ਨਹੀ ਪੁੱਛਿਆ।ਜਿਸ ਦਮਦਮੀ ਟਕਸਾਲ ਲਈ ਉਨਾਂ ਲੰਮਾ ਸਮਾਂ ਸੇਵਾ ਕੀਤੀ , ਸਰਕਾਰੀ ਤਸ਼ਦਦ ਵੀ ਝਲਿਆ ਉਸ ਸੰਸਥਾ ਨੇ ਇਕ ਫੋਨ ਕਰਕੇ ਇਹ ਜਾਨਣ ਦੀ ਕੋਸ਼ਿਸ਼ ਹੀ ਨਹੀ ਕੀਤੀ ਕਿ ਉਸ ਦੀ ਸਿਹਤ ਕਿਵੇ ਹੈ। ਸਤਪਾਲ ਦਾਨਿਸ਼ ਦਾ ਪਰਿਵਾਰ 1880 ਤੋ ਲੈ ਕੇ ਅੱਜ ਤਕ ਸਿੱਖ ਵਿਰਾਸਤ ਦੀ ਅਮੀਰ ਕਲਾ ਕੰਧ ਚਿਤਰ ਅਤੇ ਫੋਟੋਗ੍ਰਾਫਰੀ ਰਾਹੀ ਪੰਥ ਦੀ ਸੇਵਾ ਕਰਦਾ ਆ ਰਿਹਾ ਹੈ।ਅੱਜ ਕਲ ਉਨਾਂ ਦੇ ਸਪੁੱਤਰ ਹਰਦੀਪ ਸਿੰਘ ਆਪਣੇ ਪੁਰਖਿਆ ਦੀ ਤਰਜ ਤੇ ਲਿਖਣ ਕਲਾ (ਕੈਲੀਗ੍ਰਾਫੀ) ਰਾਹੀ ਪੰਥ ਦੀ ਸੇਵਾ ਕਰ ਰਿਹਾ ਹੈ। ਸਤਪਾਲ ਦਾਨਿਸ਼ ਉਹ ਫੋਟੋਗ੍ਰਾਫਰ ਹੈ ਜਿਸ ਨੇ ਸਾਰੀ ਹਯਾਤੀ ਪੰਥ ਨੂੰ ਸਮਰਪਿਤ ਕਰੀ ਰਖੀ।ਪੰਜਾਬੀ ਸੂਬਾ ਮੋਰਚਾ, ਐਮਰਜੈਂਸੀ, 1978 ਦੇ ਸਿੱਖ ਨਿੰਰਕਾਰੀ ਸਾਕੇ ਦੌਰਾਨ ਸ਼ਹੀਦ ਸਿੰਘਾਂ ਦੀਆਂ ਤਸਵੀਰਾਂ ਤੋ ਲੈ ਕੇ ਸੰਤ ਜਰਨੈਲ ਸਿੰਘ ਖ਼ਾਲਸਾ ਭਿੰਡਰਾਂ ਵਾਲਿਆਂ ਦੀਆਂ ਕਈ ਮਹਤਵਪੂਰਨ ਤਸਵੀਰਾਂ ਉਨਾਂ ਦੇ ਕੈਮਰੇ ਨੇ ਤਿਆਰ ਕੀਤੀਆਂ ਸਨ।ਜੂਨ 1984 ਦੇ ਸ੍ਰੀ ਦਰਬਾਰ ਸਾਹਿਬ ਤੇ ਹੋਏ ਫੌਜੀ ਹਮਲੇ ਦੌਰਾਨ ਸ਼ਹੀਦ ਹੋਈ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੀ ਇਮਾਰਤ ਦੀ ਪਹਿਲੀ ਤਸਵੀਰ ਵੀ ਸਤਪਾਲ ਦਾਨਿਸ਼ ਨੇ ਹੀ ਕੈਮਰੇ ਰਾਹੀ ਖਿੱਚੀ ਅਤੇ ਓਪਰੇਸ਼ਨ ਬਲੈਕ ਥੰਡਰ ਦੀਆਂ ਤਸਵੀਰਾਂ ਵੀ ਭਰੇ ਮਨ ਨਾਲ ਖਿੱਚੀਆਂ ਸਨ॥ ਹਾਲ ਵਿਚ ਹੀ ਸ਼ੋ੍ਰਮਣੀ ਗੁਰਦਵਾਰਾ ਪ੍ਰਬੰਧਕ ਕਮੇਟੀ ਨੇ ਉਨਾਂ ਪਾਸੋ ਸ੍ਰੀ ਦਰਬਾਰ ਸਾਹਿਬ ਦੇ ਜੂਨ 1984 ਦੇ ਹਮਲੇ ਦੀਆਂ ਤਸਵੀਰਾਂ ਖ੍ਰੀਦ ਕੇ ਉਨਾਂ ਨੂੰ ਇਕ ਐਲਬਮ ਰਾਹੀ ਸੰਭਲਿਆ ਤੇ ਹਮਲੇ ਦੀਆਂ ਉਨਾਂ ਵਡਅਕਾਰੀ ਤਸਵੀਰਾਂ ਰਾਹੀ ਸੰਗਤਾਂ ਨੂੰ ਸਮੇ ਦੇ ਹਲਾਤ ਤੇ ਸਰਕਾਰੀ ਜਬਰ ਬਾਰੇ ਜਾਣਕਾਰੀ ਦਿੱਤੀ।ਜਿੰਦਗੀ ਦੀ ਜੰਗ ਲੜ ਰਹੇ ਸਤਪਾਲ ਦਾਨਿਸ਼ ਨੇ ਗਲ ਕਰਦਿਆਂ ਕਿਹਾ ਕਿ ਅਕਾਲ ਪੁਰਖ ਦੀ ਅਪਾਰ ਕ੍ਰਿਪਾ ਹੈ ਕਿ ਵਿਦੇਸ਼ਾਂ ਵਿਚ ਵਸਦੇ ਕਲਾ ਪ੍ਰੇਮੀ ਸਮੇ ਸਮੇ ਤੇ ਉਨਾਂ ਦਾ ਹਾਲ ਜਾਨਣ ਲਈ ਫੋਨ ਕਰਦੇ ਰਹਿੰਦੇ ਹਨ ਪਰ ਪੰਥ ਨੇ ਮੇਰੀ ਬਾਤ ਵੀ ਪੁੱਛਣੀ ਜਰੂਰੀ ਨਹੀ ਸਮਝੀ।