ਅੰਮ੍ਰਿਤਸਰ -ਗੁਰਮਤਿ ਪ੍ਰਚਾਰਕ ਭਾਈ ਗੁਰਿੰਦਰ ਸਿੰਘ ਰਾਜਾ ਨੇ ਕਿਹਾ ਹੈ ਕਿ ਜਦ ਤਕ ਸਿੱਖਾਂ ਵਿਚੋ ਜਾਤ ਪਾਤ ਦਾ ਕੋਹੜ ਖਤਮ ਨਹੀ ਹੁੰਦਾ ਉਸ ਸਮੇ ਤਕ ਸਿੱਖ ਪੰਥ ਦੀ ਚੜ੍ਹਦੀ ਕਲਾ ਨਹੀ ਹੋ ਸਕਦੀ। ਅੱਜ ਇਥੇ ਪੱਤਰਕਾਰਾਂ ਨਾਲ ਗਲ ਕਰਦਿਆਂ ਭਾਈ ਰਾਜਾ ਨੇ ਕਿਹਾ ਕਿ ਪਿੰਡਾਂ ਵਿਚ ਸਮਾਜਿਕ ਵਖਰੇਵੇ ਦੀ ਹਾਲਤ ਇਨੀ ਬੁਰੀ ਹੈ ਕਿ ਅਸੀ ਜਾਤਾਂ ਦੇ ਅਧਾਰ ਤੇ ਗੁਰੂ ਘਰ, ਸ਼ਮਸ਼ਾਨ ਤਕ ਵੰਡੇ ਹੋਏ ਹਨ। ਸਿਤਮਜਰੀਫੀ ਦੀ ਗਲ ਇਹ ਵੀ ਹੈ ਕਿ ਸਮਾਜ ਦੇ ਠੇਕੇਦਾਰ ਅਖੌਤੀ ਜਾਤਾਂ ਦੀ ਵੰਡੀ ਕਾਰਨ ਦੂਜ਼ੇ ਗੁਰੂ ਘਰਾਂ ਵਿਚੋ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸਰੂਪ ਲਿਆਉਣ ਤੋ ਵੀ ਝਿਜਕਦੇ ਹਨ।ਭਾਈ ਰਾਜਾ ਨੇ ਕਿਹਾ ਕਿ ਸਮਾਜਿਕ ਵਖਰੇਵੇ ਕਾਰਨ ਅਸੀ ਆਪਣੇ ਹੀ ਭਰਾਵਾਂ ਨੂੰ ਮਾਣ ਸਨਮਾਨ ਦੇਣ ਤੋ ਵੀ ਪਾਸਾ ਵਟਦੇ ਹਾਂ ਜਿਸ ਕਾਰਨ ਪੰਜਾਬ ਵਿਚ ਧਰਮ ਪ੍ਰੀਵਰਤਨ ਦੀ ਲਹਿਰ ਸਿਰ ਚੁੱਕ ਰਹੀ ਹੈ ਅਤੇ ਅੱਗੇ ਜਾ ਕੇ ਇਹ ਹੀ ਲੋਕ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕਰਨ ਦਾ ਹੀਆ ਕਰਦੇ ਹਨ।ਉਨਾਂ ਕਿਹਾ ਕਿ ਸਿੱਖਾਂ ਦਾ ਇਤਿਹਾਸ ਬੜਾ ਹੀ ਵਿਲਖਣ ਇਤਿਹਾਸ ਹੈ, ਭਾਈ ਜ਼ੈਤਾ ਜੀ, ਬਾਬਾ ਲਖੀ ਸ਼ਾਹ ਵਣਜਾਰਾ ਤੇ ਦੀਵਾਨ ਟੋਡਰ ਮਲ ਨੇ ਗੁਰੂ ਸਾਹਿਬਾਨ ਤੇ ਉਨਾਂ ਦੇ ਸਹਿਬਜਾਦਿਆਂ ਦੇ ਸਰੀਰਾਂ ਦੀ ਬੇਅਦਬੀ ਨਹੀ ਹੋਣ ਦਿੱਤੀ।ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀਆਂ ਬੇਅਦਬੀ ਦੀਆਂ ਘਟਨਾਵਾਂ ਕਰਕੇ ਸਿੱਖਾਂ ਨੂੰ ਬੇਬਸ ਦਿਖਾਉਣ ਦੀਆਂ ਸ਼ਾਜਿਸ਼ਾਂ ਹਨ।ਭਾਈ ਰਾਜਾ ਨੇ ਕਿਹਾ ਕਿ ਸ਼ੋ੍ਰਮਣੀ ਕਮੇਟੀ ਤੇ ਸ਼ੋ੍ਰਮਣੀ ਅਕਾਲੀ ਦਲ ਸਾਡੇ ਪਰਵਾਰ ਦਾ ਹਿੱਸਾ ਹਨ ਪਰ ਅਫਸੋਸ ਪਰਵਾਰ ਦੇ ਮੁਖੀ ਕੁਝ ਸਮੇ ਤੋ ਪਰਵਾਰ ਦੀ ਸਾਰ ਨਹੀ ਲੈ ਰਹੇ।ਉਨਾਂ ਦੀ ਸੰਸਥਾ ਗੁਰੂ ਫਤਹਿ ਵੈਲਫੇਅਰ ਸੁਸਾਇਟੀ ਵਲੋ ਚਲਾਈ ਜਾ ਰਹੀ ਗੁਰਮਤਿ ਪ੍ਰਚਾਰ ਵਹੀਰ ਵਿਚ ਹੁਣ ਤਕ 280 ਧਾਰਮਿਕ ਸਮਾਗਮ ਕਰਵਾਏ ਜਾ ਚੁੱਕੇ ਹਨ ਤੇ ਹਜਾਰਾਂ ਪ੍ਰਾਣੀਆਂ ਨੇ ਖੰਡੇ ਦੀ ਪਾਹੁਲ ਛੱਕ ਕੇ ਗੁਰੂ ਨਾਲ ਸਾਂਝ ਪੱਕੀ ਕੀਤੀ ਹੈ।ਭਾਈ ਰਾਜਾ ਨੇ ਕਿਹਾ ਕਿ ਅਸੀ ਪਿੰਡਾਂ ਵਿਚ ਜਾ ਕੇ ਇਕ ਹੀ ਹੌਕਾ ਦਿੰਦੇ ਹਾਂ ਕਿ ਅਸੀ ਸਾਰੇ ਇਕ ਅਕਾਲ ਪੁਰਖ ਦੇ ਉਪਾਸ਼ਕ ਹਾਂ ਤੇ ਸਾਰੇ ਆਪਸ ਵਿਚ ਭਾਈ ਭਾਈ ਹਾਂ। ਅਸੀ ਜਿੰਨਾ ਪ੍ਰਾਣੀਆਂ ਨੂੰ ਗੁਰੂ ਨਾਲ ਜੋੜਿਆ ਉਨਾਂ ਨਾਲ ਮੇਲ ਮਿਲਾਪ ਰਖਦੇ ਹਾਂ ਤਾਂ ਕਿ ਸਮਾਜ ਵਿਚ ਦਰਪੇਸ਼ ਕਿਸੇ ਵੀ ਮੁਸ਼ਕਿਲ ਸਮੇ ਨਾਲ ਖੜੇ ਹੋ ਸਕੀਏ।