ਅੰਤਰਾਲ ਯਾਤਰਾ ਚਿੱਤਰ ਪ੍ਰਦਰਸ਼ਨੀ ਵਿਚ ਅਧਿਆਤਮਕ ਚਿੱਤਰਾਂ ਨੇ ਅੰਮ੍ਰਿਤਸਰ ਵਾਸੀਆਂ ਦਾ ਮਨ ਮੋਹਿਆ

ਅੰਮ੍ਰਿਤਸਰ -ਸ਼ਹਿਰ ਦੀ ਠਾਕੁਰ ਸਿੰਘ ਆਰਟ ਗੈਲਰੀ ਵਿਖੇ ਸ੍ਰ ਜਸਵੰਤ ਸਿੰਘ ਵਲੋ ਅਧਿਆਤਮਕ ਚਿੱਤਰ ਪ੍ਰਦਰਸ਼ਨੀ ਅੰਤਰਾਲ ਯਾਤਰਾ ਲਗਾਈ ਗਈ। ਇਸ ਚਿੱਤਰ ਪ੍ਰਦਰਸ਼ਨੀ ਵਿਚ ਉੱਘੇ ਕਲਾਕਾਰ ਸ੍ਰ ਜਸੰਵਤ ਸਿੰਘ ਦੁਆਰਾ ਤਿਆਰ ਪੇਟਿੰਗ ਬੇਹਦ ਸੁੰਦਰ ਢੰਗ ਨਾਲ ਪ੍ਰਦਰਸ਼ਿਤ ਕੀਤੀਆਂ ਗਈਆਂ ਹਨ।ਅੰਤਰਾਲ ਯਾਤਰਾ ਚਿੱਤਰ ਪ੍ਰਦਰਸ਼ਨੀ ਵਿਚ ਅਧਿਆਤਮਕ ਚਿੱਤਰਾਂ ਨੇ ਦਰਸ਼ਕਾਂ ਦਾ ਮਨ ਮੋਹ ਲਿਆ। ਪੱਤਰਕਾਰਾਂ ਨਾਲ ਗਲ ਕਰਦਿਆਂ ਸ੍ਰ ਜਸਵੰਤ ਸਿੰਘ ਨੇ ਕਿਹਾ ਕਿ ਉਹ ਹਮੇਸ਼ਾਂ ਗੁਰਬਾਣੀ ਤੇ ਗੁਰਮਤਿ ਦੀ ਫਿਲਾਸਫੀ ਨੂੰ ਕੈਨਵੈਸ ਤੇ ਚਿਤਰਣ ਦਾ ਯਤਨ ਕਰਦੇ ਹਨ। ਗੁਰਮਤਿ ਦੀ ਦਾਤ ਉਨਾਂ ਨੂੰ ਵਿਰਸੇ ਵਿਚ ਮਿਲੀ ਹੈ ਜਿਸ ਕਾਰਨ ਕੁਦਰਤੀ ਤੌਰ ਤੇ ਹੀ ਰੰਗ ਤੇ ਗੁਰਮਤਿ ਦਾ ਸੁਮੇਲ ਹੋ ਜਾਂਦਾ ਹੈ। ਆਪਣੇ ਬਾਰੇ ਜਾਣਕਾਰੀ ਦਿੰਦੇ ਹੋਏ ਸ੍ਰ ਜਸਵੰਤ ਸਿੰਘ ਨੇ ਕਿਹਾ ਕਿ ਜਦ ਪੰਥ ਸ੍ਰੀ ਗੁਰੂ ਨਾਨਕ ਸਾਹਿਬ ਦਾ 500 ਸਾਲਾ ਪ੍ਰਕਾਸ਼ ਪੁਰਬ ਮਨਾ ਰਿਹਾ ਸੀ ਤਾਂ ਉਹ ਹਾਲੇ ਮਿਡਲ ਕਲਾਸ ਦੀ ਪੜਾਈ ਕਰਦੇ ਸਨ ਤੇ ਉਨਾਂ ਗੁਰੂ ਨਾਨਕ ਸਾਹਿਬ ਦਾ ਪਹਿਲਾ ਕੰਧ ਚਿੱਤਰ ਪਿੰਡ ਦੇ ਗੁਰੂ ਘਰ ਦੀ ਕੰਧ ਤੇ ਚਿੱਤਰਿਆ ਸੀ।ਅੱਜ ਤਕ ਉਹ ਹਜਾਰਾਂ ਚਿੱਤਰ ਤਿਆਰ ਕਰ ਚੁੱਕੇ ਹਨ ਤੇ ਦੇਸ਼ ਵਿਦੇਸ਼ ਵਿਚ ਅਨਗਿਣਤ ਚਿੱਤਰ ਪ੍ਰਦਰਸ਼ਨੀਆਂ ਲਗਾ ਚੁੱਕੇ ਹਨ।ਸ਼ਬਦ ਤੇ ਰੰਗ ਦਾ ਸੁਮੇਲ ਹੀ ਚਿੱਤਰ ਦੀ ਸ਼ੋਭਾ ਵਧਾਉਦਾ ਹੈ। ਉਨਾਂ ਦਸਿਆ ਕਿ ਭਾਰਤੀ ਨੌਜਵਾਨਾਂ ਨਾਲੋ ਵਿਦੇਸ਼ੀ ਨੌਜਵਾਨ ਖਾਸਕਰ ਲੜਕੀਆਂ ਚਿੱਤਰਕਲਾ ਵਿਚ ਬੇਹਦ ਮੁਹਾਰਤ ਰਖਦੀਆਂ ਹਨ। ਸਿੱਖ ਆਰਟ ਵਿਚ ਗੁਰੂ ਸਾਹਿਬਾਨ ਤੇ ਗੁਰਬਾਣੀ ਦੇ ਨਾਲ ਨਾਲ ਗੁਰਮਤਿ ਫਿਲਾਸਫੀ ਤੇ ਕੰਮ ਕਰਨਾ ਵਿਦੇਸ਼ੀ ਸਿੱਖ ਨੌਜਵਾਨਾ ਨੂੰ ਚੰਗਾ ਲਗਦਾ ਹੈ। ਉਨਾਂ ਕਿਹਾ ਕਿ ਕੈਨਵੈਸ ਤੇ ਜਦ ਕੋਈ ਚਿੱਤਰ ਉਕਰਿਆ ਜਾਂਦਾ ਹੈ ਤਾਂ ਪਹਿਲਾਂ ਉਸ ਬਾਰੇ ਮਨ ਨਾਲ ਵਿਚਾਰ ਹੁੰਦੀ ਹੈ ਤੇ ਇਹ ਵਿਚਾਰ ਹੀ ਚਿੱਤਰ ਦੀ ਖੂਬਸੂਰਤੀ ਨਿਖਾਰਦੀ ਹੈ। ਸ਼ਹਿਰ ਵਾਸੀਆਂ ਦੇ ਵਿਚ ਸ੍ਰ ਜਸਵੰਤ ਸਿੰਘ ਦੇ ਤਿਆਰ ਚਿੱਤਰਾਂ ਨੂੰ ਦੇਖਣ ਨੂੰ ਲੈ ਕੇ ਬੇਹਦ ਉਤਸਾਹ ਹੈ। ਉਨਾਂ ਕਿਹਾ ਕਿ ਚਿੱਤਰ ਪ੍ਰਦਰਸ਼ਨੀ ਧਰਮ ਪ੍ਰਚਾਰ ਦਾ ਸਭ ਤੋ ਸੌਖਾ ਸਾਧਨ ਹੈ ਜਿਸ ਰਾਹੀ ਤੁਸੀ ਕੁਝ ਪਲਾਂ ਵਿਚ ਸੈਕੜੇ ਕਿਤਾਬਾਂ ਜਿੰਨਾ ਗਿਆਨ ਦੇ ਸਕਦੇ ਹੋ।