ਅੰਮ੍ਰਿਤਸਰ - ਸਮੇ ਦੀ ਧੂੜ ਹੇਠਾਂ ਦਬ ਰਹੀ ਸਿੱਖ ਵਿਰਾਸਤ ਦਾ ਅਹਿਮ ਅੰਗ ਚਿੱਤਰਕਲਾ ਨੂੰ ਮੁੜ ਸੁਰਜੀਤ ਕਰਨ ਵਾਲੀ ਬੀਬੀ ਮਨਜੀਤ ਕੌਰ ਨੇ ਕਲਾ ਦੇ ਖੇਤਰ ਖਾਸ ਕਰ ਚਿੱਤਰਕਲਾ ਦੇ ਖੇਤਰ ਵਿਚ ਕੰਮ ਕਰ ਰਹੇ ਵਿਿਦਆਰਥੀਆਂ ਨੂੰ ਲਿਖਣ ਸ਼ੈਲੀ ਤੇ ਚਿੱਤਰਕਲਾ ਨੂੰ ਅਪਣਾਉਣ ਦਾ ਸੱਦਾ ਦਿੱਤਾ। ਅੱਜ ਇਸ ਪੱਤਰਕਾਰ ਨਾਲ ਗਲ ਕਰਦਿਆਂ ਬੀਬੀ ਮਨਜੀਤ ਕੌਰ ਨੇ ਦਸਿਆ ਕਿ ਉਹ ਪਿਛਲੇ 25 ਸਾਲ ਤੋ ਕਲਾ ਦੇ ਖੇਤਰ ਵਿਚ ਹਨ ਤੇ ਪਿਛਲੇ 5 ਸਾਲ ਤੋ ਉਹ ਪੁਰਾਤਨ ਸ਼ੈਲੀ ਦੀ ਚਿੱਤਰਕਾਰੀ ਕਰ ਰਹੇ ਹਨ। ਉਨਾਂ ਹੁਣ ਤਕ 50 ਦੇ ਕਰੀਬ ਸਿੱਖ ਗੁਰੂ ਸਾਹਿਬਾਨ ਦੇ ਪੁਰਾਤਨ ਸ਼ੈਲੀ ਵਿਚ ਚਿੱਤਰ ਤਿਆਰ ਕੀਤੇ ਹਨ।ਉਨਾਂ ਦਸਿਆ ਕਿ ਇਕ ਚਿੱਤਰ ਤਿਆਰ ਕਰਨ ਲਈ ਉਹ ਹਰ ਰੋਜ਼ 8 ਤੋ 9 ਘੰਟੇ ਦਾ ਸਮਾਂ ਦਿੰਦੇ ਹਨ। ਹੁਣ ਉਹ ਭਾਈ ਬਾਲੇ ਵਾਲੀ ਜਨਮ ਸਾਖੀ ਜਿਸ ਨੂੰ ਬੀ 40 ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ ਤੇ ਚਿੱਤਰ ਤਿਆਰ ਕਰਨ ਜਾ ਰਹੇ ਹਨ। ਉਨਾਂ ਦਸਿਆ ਕਿ ਕਿਸੇ ਸਮੇ ਪੰਜਾਬ ਦੀ ਪਹਿਚਾਣ ਰਹੀ ਚਿੱਤਰਕਲਾ ਗੁਰਦਵਾਰਾ ਸਾਹਿਬਾਨ, ਮੰਦਰ ਤੇ ਵਡੀਆਂ ਹਵੇਲੀਆਂ ਦਾ ਸ਼ਿਗਾਰ ਹੁੰਦੀ ਸੀ। ਅੱਜ ਕਲ ਇੲ ਲੁਪਤ ਹੋ ਰਹੀ ਹੈ। ਉਹ ਜੈਪੁਰ ਦੀ ਇਕ ਯੂਨੀਵਰਸਿਟੀ ਤੋ ਪੀ ਐਚ ਡੀ ਦੀ ਡਿਗਰੀ ਲਈ ਵੀ ਪੜਾਈ ਕਰ ਰਹੇ ਹਨ।