ਨਵੀਂ ਦਿੱਲੀ- ਜਲਾਵਤਨੀ ਆਗੂ ਭਾਈ ਗਜਿੰਦਰ ਸਿੰਘ ਦੀ ਮਿੱਠੀ, ਨਿੱਘੀ ਤੇ ਪਿਆਰੀ ਯਾਦ ਨੂੰ ਸਮਰਪਿਤ ਪੰਥਕ ਸਮਾਗਮ 'ਪੰਥ ਸਿਧਾਂਤ ਅਤੇ ਸੰਘਰਸ਼' 4 ਜੁਲਾਈ, ਦਿਨ ਸ਼ਨੀਵਾਰ ਨੂੰ ਅੰਮ੍ਰਿਤਸਰ ਵਿਖੇ ਗੁਰਦੁਆਰਾ ਪਾਤਸ਼ਾਹੀ ਛੇਵੀਂ ਰਣਜੀਤ ਐਵਿਨਿਉ ਸਵੇਰੇ 11 ਵਜੇ ਕਰਵਾਇਆ ਜਾ ਰਿਹਾ ਹੈ। ਸਮਾਗਮਾਂ ਦੇ ਮੁੱਖ ਪੰਜ ਏਜੰਡਿਆਂ 'ਚ ਸ੍ਰੀ ਅਕਾਲ ਤਖਤ ਸਾਹਿਬ ਦੀ ਪ੍ਰਭੂਸਤਾ ਤੇ ਸਰਵਉਚਤਾ ਵੀ ਸ਼ਾਮਲ ਹਨ, ਇਹਨਾਂ ਸ਼ਬਦਾਂ ਦਾ ਪ੍ਰਗਟਾਵਾ ਦਲ ਖਾਲਸਾ ਦੇ ਆਗੂ ਬਾਬਾ ਹਰਦੀਪ ਸਿੰਘ ਮਹਿਰਾਜ ਨੇ ਜਾਰੀ ਇੱਕ ਅਖਬਾਰੀ ਬਿਆਨ ਵਿੱਚ ਕਿਹਾ ਕੀਤਾ। ਜ਼ਿਕਰਯੋਗ ਹੈ ਕਿ ਦਲ ਖਾਲਸਾ ਦੇ ਆਗੂ ਭਾਈ ਗਜਿੰਦਰ ਸਿੰਘ ਤੇ ਹੋਰਨਾਂ ਸਿੱਖ ਸਾਥੀਆਂ ਨੇ ਮਿਲ ਕੇ ਉਸ ਵੇਲੇ ਸੰਤ ਜਰਨੈਲ ਸਿੰਘ ਖਾਲਸਾ ਭਿੰਡਰਾਂਵਾਲਿਆਂ ਦੀ ਗਿਰਫਤਾਰੀ ਦੇ ਵਿਰੋਧ ਵਿੱਚ ਇੰਡੀਅਨ ਸਟੇਟ ਦੇ ਜਹਾਜ ਨੂੰ ਅਗਵਾਹ ਕਰਕੇ ਪਾਕਿਸਤਾਨ ਲਿਜਾਇਆ ਗਿਆ ਸੀ, ਜਿੱਥੇ ਤਸੀਹੇ ਅਤੇ ਲੰਮੀਆਂ ਉਮਰਾਂ ਕੈਦਾਂ ਤੋਂ ਬਾਅਦ ਭਾਈ ਗਜਿੰਦਰ ਆਖਰੀ ਸਾਹ ਤੱਕ ਉਥੇ ਹੀ ਰਹੇ। ਬਾਬਾ ਹਰਦੀਪ ਸਿੰਘ ਨੇ ਦੱਸਿਆ ਕਿ ਗੁਰੂ ਗ੍ਰੰਥ ਤੇ ਗੁਰੂ ਪੰਥ ਨੂੰ ਸਮਰਪਿਤ ਸਿੱਖ ਪ੍ਰਭੂਸਤਾ ਰਾਜ ਦੀ ਸਥਾਪਨਾ ਲਈ ਆਖਰੀ ਸਾਹ ਤੱਕ ਸੰਘਰਸ਼ਸੀਲ ਰਹੇ ਭਾਈ ਗਜਿੰਦਰ ਸਿੰਘ ਨੂੰ ਸਪਰਪਿਤ ਸਮਾਗਮ ਸਮੇਂ ਮੁੱਖ ਏਜੰਡਾ ਜਥੇਦਾਰ ਦੀ ਨਿਯੁਕਤੀ ਦਾ ਵਿਧੀ ਵਿਧਾਨ, ਇੰਡੀਅਨ ਸਟੇਟ/ ਹਕੂਮਤਾਂ ਦਾ ਸਿੱਖ ਧਰਮ ਵਿੱਚ ਦਾਖਲ, ਭਾਈ ਗਜਿੰਦਰ ਸਿੰਘ ਜੀਵਨ, ਸੋਚ ਤੇ ਸੰਘਰਸ਼ ਅਤੇ ਸੰਘਰਸ਼ ਵਿੱਚ ਖੜੋਤ ਦੇ ਕਾਰਨਾਂ ਦੀ ਨਿਸ਼ਾਨਦੇਹੀ ਅਤੇ ਭਵਿੱਖ ਦੇ ਰਾਹ ਦੀ ਤਲਾਸ਼ ਕਰਨਾ ਹੋਣਗੇ। ਉਹਨਾਂ ਸਿੱਖ ਸੰਗਤ ਨੂੰ ਸਮਾਗਮ ਵਿੱਚ ਵੱਧ ਚੜ ਕੇ ਹਿੱਸਾ ਲੈਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਇਹੋ ਜਿਹੇ ਯੋਧੇ ਸਾਡੇ ਇਤਿਹਾਸ ਦੇ ਨਾਇਕ ਹਨ ਜਿਨਾਂ ਨੂੰ ਹਮੇਸ਼ਾ ਹੀ ਜਹਿਨ ਦੇ ਵਿੱਚ ਵਸਾਈ ਰੱਖਣਾ ਹੁੰਦਾ ਹੈ। ਇਸ ਮੌਕੇ ਦਲ ਖਾਲਸਾ ਦੀ ਕੇਂਦਰੀ ਵਰਕਿੰਗ ਕਮੇਟੀ ਮੈਂਬਰ ਗੁਰਵਿੰਦਰ ਸਿੰਘ ਬਠਿੰਡਾ, ਜੀਵਨ ਸਿੰਘ ਗਿਲਕਲਾਂ, ਰਾਮ ਸਿੰਘ ਢਿਪਾਲੀ, ਬਲਕਰਨ ਸਿੰਘ ਡੱਬਵਾਲੀ ਤੇ ਭਗਵਾਨ ਸਿੰਘ ਸੰਧੂ ਖੁਰਦ ਵੀ ਸ਼ਾਮਲ ਸਨ।