ਚਾਵਲਾ ਨੇ ਜਥੇਦਾਰ ਦੀ ਕਾਰਜਸ਼ੈਲੀ ਤੇ ਹੀ ਚੁੱਕੇ ਸਵਾਲ

ਅੰਮ੍ਰਿਤਸਰ  - ਬਹਿਰੀਨ ਵਾਲੀ ਬੀਬੀ ਨਾਲ ਅਨੈਤਿਕ ਸੰਬਧ ਰਖਣ ਦੇ ਮਾਮਲੇ ਵਿਚ ਪੰਥ ਚੋ ਛੇਕੇ ਸ਼ੋ੍ਰਮਣੀ ਕਮੇਟੀ ਦੇ ਸਾਬਕਾ ਮੈਂਬਰ ਅਮਰਜੀਤ ਸਿੰਘ ਚਾਵਲਾ ਨੇ ਅੱਜ ਇਕ ਵੀਡੀਓ ਜਾਰੀ ਕਰਕੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਕਾਰਜਕਾਰੀ ਜਥੇਦਾਰ ਗਿਆਨੀ ਕੁਲਦੀਪ ਸਿੰਘ ਗੜਗੱਜ ਨੂੰ ਸਵਾਲਾਂ ਦੇ ਘੇਰੇ ਵਿਚ ਲਿਆਂਦਾ ਹੈ।ਵੀਡੀਓ ਰਾਹੀ ਚਾਵਲਾ ਨੇ ਜਥੇਦਾਰ ਦੀ ਕਾਰਜਸ਼ੈਲੀ ਤੇ ਹੀ ਸਵਾਲ ਚੁੱਕ ਦਿੱਤੇ ਹਨ। ਚਾਵਲਾ ਨੇ ਕਿਹਾ ਕਿ ਮੈ ਜਾਣਦਾ ਹਾਂ ਕਿ ਤੁਸੀ ਮੇਰੇ ਪ੍ਰਤੀ ਦਿਲ ਵਿਚ ਰਜਿੰਸ਼ ਪਾਲੀ ਬੈਠੇ ਹੋ, ਕਿਉਕਿ ਮੈ ਤੁਹਾਨੂੰ ਕਿਹਾ ਸੀ ਕਿ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ ਦੀ ਸੇਵਾ ਦਿਨ ਚੜੇ ਤੇ ਸੰਭਾਲ ਲਵਾਂਗੇ। ਅੱਜ ਵੀ ਲੋਕ ਸ਼ੋਸ਼ਲ ਮੀਡੀਆ ਤੇ ਕਈ ਪ੍ਰਕਾਰ ਦੀਆਂ ਟਿਪਣੀਆਂ ਕਰਦੇ ਹਨ। ਚਾਵਲਾ ਨੇ ਜਥੇਦਾਰ ਨੂੰ ਸੰਬੋਧਨ ਹੁੰਦਿਆਂ ਕਿਹਾ ਕਿ ਤੁਹਾਨੂੰ ਮਰਿਯਾਦਾ ਦੀ ਉਲੰਘਣਾ ਕਰਨ ਦੇ ਕਾਰਨ ਹੀ ਘਰ ਘਰ ਜਾ ਕੇ ਲੋਕਾਂ ਕੋਲੋ ਸਿਰੋਪੇ ਲੈਣੇ ਪਏ ਸਨ।ਜਥੇਦਾਰ ਨੁੰ ਸੰਬੋਧਨ ਹੁੰਦੇ ਹੋਏ ਚਾਵਲਾ ਨੇ ਕਿਹਾ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਜਿਹੇ ਇੰਨੇ ਵੱਡੇ ਇਨਸਾਫ ਦੇ ਅਸਥਾਨ ਤੋ ਉਨਾਂ ਨਾਲ ਬੇਇਨਸਾਫੀ ਹੋਈ ਹੈ। ਮੈਨੂੰ ਮੇਰਾ ਪੱਖ ਵੀ ਪੇਸ਼ ਕਰਨ ਦਾ ਮੌਕਾ ਨਹੀ ਦਿੱਤਾ ਗਿਆ। ਉਨਾਂ ਕਿਹਾ ਕਿ ਮੈਨੂੰ ਇਹ ਵੀ ਪਤਾ ਹੈ ਕਿ ਤੁਸੀ ਆਪਣੇ ਕੁਝ ਸਿਆਸੀ ਮਿੱਤਰਾਂ ਦੀ ਰਾਏ ਨਾਲ ਇਹ ਮਾਮਲਾ ਜਲਦ ਤੋ ਜਲਦ ਮੁਕਾਉਣਾ ਚਾਹੰਦੇ ਸੀ। ਉਨਾ ਵੀਡੀਓ ਵਿਚ ਸਾਫ ਸ਼ਬਦਾਂ ਵਿਚ ਕਿਹਾ ਕਿ ਇਕ ਸਾਜਿਸ਼ ਦੇ ਤਹਿਤ ਉਨਾਂ ਨੂੰ ਬਲੀ ਦਾ ਬਕਰਾ ਬਣਾਇਆ ਜਾ ਰਿਹਾ ਹੈ ਤੇ ਸਾਰਾ ਠੀਕਰਾ ਉਨਾਂ ਦੇ ਸਿਰ ਭੰਨਿਆ ਜਾ ਰਿਹਾ ਹੈ। ਚਾਵਲਾ ਨੇ ਅੱਗੇ ਕਿਹਾ ਕਿ ਉਹ ਭੱਜੇ ਨਹੀ ਹਨ ਤੇ ਨਾ ਹੀ ਭੱਜਣ ਵਾਲਿਆਂ ਵਿਚ ਹਨ, ਮੇਰਾ ਪੂਰਾ ਜੀਵਨ ਹੀ ਸੰਘਰਸ਼ ਵਿਚ ਬੀਤਿਆ ਹੈ। ਚਾਵਲਾ ਨੇ ਕਿਹਾ ਕਿ ਜਲਦ ਹੀ ਉਹ ਸਾਰੇ ਮਾਮਲੇ ਤੇ ਵੀਡੀਓ ਜਾਰੀ ਕਰਕੇ ਦਸਣਗੇ ਕਿ ਉਸ ਬਹਿਰੀਨ ਵਾਲੀ ਬੀਬੀ ਨੂੰ ਕਿਸ ਨੇ ਲਿਆਂਦਾ, ਕਿਉ ਲਿਆਂਦਾ ਤੇ ਕਿਥੇ ਕਿਥੇ ਰਖਿਆ। ਚਾਵਲਾ ਨੇ ਕਿਹਾ ਕਿ ਬਹਿਰੀਨ ਵਾਲੀ ਬੀਬੀ ਤੇ ਕਿੰਨੇ ਫਰਾਡ ਦੇ ਕੇਸ ਚਲ ਰਹੇ ਹਨ ਤੇ ਉਸ ਨੇ ਕਿੰਨੇ ਹੀ ਲੋਕਾਂ ਤੇ ਬਲਾਤਕਾਰ ਦੇ ਪਰਚੇ ਦਰਜ ਕਰਵਾਏ ਹੋਏ ਹਨ। ਚਾਵਲਾ ਨੇ ਕਿਹਾ ਕਿ ਮੈਂ ਸੁੱਚਾ ਸਿੰਘ ਲੰਗਾਹ ਨਹੀਂ ਹਾਂ।ਸੁੱਚਾ ਸਿੰਘ ਲੰਗਾਹ ਦੀ ਵੀਡੀਓ ਵੀ ਸਾਹਮਣੇ ਆਈ ਸੀ, ਪੂਰਾ ਸਬੂਤ ਸਾਹਮਣੇ ਆ ਗਿਆ ਸੀ। ਉਸ ਦੇ ਬਾਵਜੂਦ ਉਸ ਵੇਲੇ ਦੇ ਜਥੇਦਾਰਾਂ ਨੇ ਇਕ ਕਮੇਟੀ ਬਣਾ ਕੇ ਉਸ ਦੀਆਂ ਸਿਫ਼ਾਰਸ਼ਾਂ ਤੋਂ ਬਾਅਦ ਲੰਗਾਹ ਦੇ ਬਾਰੇ ਫੈਸਲਾ ਲਿਆ ਗਿਆ। ਇੱਥੇ ਤਾਂ ਅਜਿਹਾ ਕੁੱਝ ਵੀ ਨਹੀਂ ਸੀ।ਚਾਵਲਾ ਨੇ ਕਿਹਾ ਕਿ ਮੈ ਅੰਮ੍ਰਿਤਧਾਰੀ ਹਾਂ ਤੇ ਬਾਣੀ ਪੜ੍ਹਦਾ ਹਾਂ, ਤੁਸੀ ਪੰਥ ਦੇ ਇਸ ਨਿਮਾਣੇ ਜਿਹੇ ਸੇਵਕ ਨੂੰ ਹੀ ਪੰਥ ਚੋ ਬਾਹਰ ਕਢ ਦਿੱਤਾ ਹੈ। ਚਾਵਲਾ ਨੇ ਕਿਹਾ ਕਿ ਤੁਸੀ ਖੁਦ ਮੰਨੇ ਹੋ ਕਿ ਬਹਿਰੀਨ ਵਾਲੀ ਬੀਬੀ ਨੇ ਉਨਾਂ ਤਕ ਪਹੰੁਚ ਕੀਤੀ ਸੀ ਤੇ ਕੇਵਲ ਮਲਕੀਤ ਸਿੰਘ ਵਾਲਾ ਮਾਮਲਾ ਹੀ ਦਸਿਆ ਸੀ ਚਾਵਲਾ ਬਾਰੇ ਕੋਈ ਗਲ ਨਹੀ ਹੋਈ। ਅੱਜ ਅਜਿਹਾ ਕੀ ਹੋ ਗਿਆ।ਜਿਕਰਯੋਗ ਹੈ ਕਿ ਬੀਤੇ ਐਤਵਾਰ ਜਥੇਦਾਰਾਂ ਨੇ ਮੀਟਿੰਗ ਕਰਕੇ ਬਹਿਰੀਨ ਵਾਲੀ ਬੀਬੀ ਨਾਲ ਅਨੈਤਿਕ ਸੰਬਧ ਰਖਣ ਵਾਲੇ ਅਮਰਜੀਤ ਸਿੰਘ ਚਾਵਲਾ ਤੇ ਅਸ਼ਲੀਲ ਚੈਟ ਕਰਨ ਵਾਲੇ ਮਲਕੀਤ ਸਿੰਘ ਨੂੰ ਪੰਥ ਚੋ ਛੇਕ ਦਿੱਤਾ ਸੀ।