ਨਵੀਂ ਦਿੱਲੀ- ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ‘ਤੇ ਸਰਕਾਰੀ ਸ਼ਹਿ ਨਾਲ ਕਾਬਜ਼ ਹੋਏ ਮੌਜੂਦਾ ਪ੍ਰਬੰਧਕ ਹਰਮੀਤ ਸਿੰਘ ਕਾਲਕਾ , ਜਗਦੀਪ ਸਿੰਘ ਕਾਹਲੋਂ ਤੇ ਇਹਨਾਂ ਦਾ ਆਕਾ ਮਨਜਿੰਦਰ ਸਿੰਘ ਸਿਰਸਾ ਜੋ ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਬੰਧ ਹੇਠਲੇ ਗੁਰੂ ਘਰਾਂ ਤੇ ਸੰਸਥਾ ਤੇ ਲੁੱਟ ਤੇ ਖਾਣ ਤੋਂ ਬਾਅਦ ਹੁਣ ਸਿੰਘ ਸਭਾ ਦੇ ਗੁਰੂ ਘਰਾਂ ਤੇ ਕਬਜ਼ੇ ਕਰਨ ਤੇ ਉਤਰ ਆਏ ਹਨ ਤੇ ਕਿ ਉਹਨਾਂ ਤੇ ਕਾਬਜ਼ ਹੋਕੇ ਉੱਥੇ ਵੀ ਸਿੱਖੀ ਸਿਧਾਂਤਾਂ ਦਾ ਘਾਣ ਕਰ ਸਕਣ ਤੇ ਗੁਰੂ ਘਰਾਂ ਦੀ ਗੋਲਕ ਲੁੱਟ ਸਕਣ । ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਸੀਨੀਅਰ ਆਗੂ ਸ. ਜਤਿੰਦਰ ਸਿੰਘ ਸੋਨੂੰ ਨੇ ਪ੍ਰੈੱਸ ਨੂੰ ਜਾਰੀ ਇਕ ਬਿਆਨ ਰਾਹੀਂ ਕਿਹਾ ਕਿ ਇਸਦੀ ਤਾਜ਼ਾ ਮਿਸਾਲ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਨੇਤਾ ਜੀ ਨਗਰ (ਸਰੋਜਨੀ ਨਗਰ) ਹੈ ਜਿੱਥੇ ਇਹਨਾਂ ਨੇ ਕਬਜ਼ੇ ਦੀ ਕੋਸ਼ਿਸ਼ ਕੀਤੀ ਪਰ ਸਾਡੇ ਸਤਿਕਾਰਯੋਗ ਮੈਂਬਰ ਸ. ਸਤਨਾਮ ਸਿੰਘ ਖੀਵਾ ਦੇ ਯਤਨਾਂ ਨਾਲ ਸਦਕਾ ਇਹ ਅਸਫ਼ਲ ਹੋ ਗਏ । ਪਰ ਫੇਰ ਵੀ ਇਹ ਲੋਕ ਆਪਣੀਆਂ ਕੋਝੀਆਂ ਹਰਕਤਾਂ ਤੋਂ ਬਾਜ਼ ਨਹੀਂ ਆ ਰਹੇ । ਇਹੋ ਜਿਹੀਆਂ ਹਰਕਤਾਂ ਕਾਰਨ ਹੀ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਆ ਰਹੀ ਚੋਣ ਲਈ ਇਹਨਾਂ ਲੋਕਾਂ ਨੂੰ ਚੋਣ ਲੜਨ ਲਈ ਉਮੀਦਵਾਰ ਨਹੀ ਮਿਲ ਰਹੇ ਤੇ ਇਹ ਲੋਕ ਨਿੱਜੀ ਲਾਲਚ ਦੇ ਕੇ ਹੋਰਨਾਂ ਮੈਂਬਰਾਂ ਨੂੰ ਆਪਣੇ ‘ਚ ਸ਼ਾਮਲ ਕਰ ਰਹੇ ਹਨ । ਇਹਨਾਂ ਦੀਆਂ ਇਹੋ ਜਿਹੀਆਂ ਹਰਕਤਾਂ ਕਾਰਨ ਅਦਾਲਤਾਂ ਵਿੱਚ ਇਹਨਾਂ ਦੇ ਕੇਸ ਚੱਲ ਰਹੇ ਹਨ ਤੇ ਦਿੱਲੀ ਕਮੇਟੀ ਦੀਆਂ ਜਾਇਦਾਦਾਂ ਨਿਲਾਮ ਹੋਣ ਤੱਕ ਦੀ ਨੌਬਤ ਆ ਗਈ ਹੈ ਤੇ ਸਿੱਖ ਸਿਧਾਂਤਾਂ ਦਾ ਲਗਾਤਾਰ ਘਾਣ ਹੋ ਰਿਹਾ ਹੈ । ਇਸ ਲਈ ਹੁਣ ਦਿੱਲੀ ਦੀ ਸੰਗਤ ਲਈ ਸੋਚਣ ਦਾ ਵੇਲਾ ਵੀ ਹੈ ਤੇ ਪੰਥਕ ਸਰਮਾਏ ਨੂੰ ਸੰਭਾਲਣ ਦਾ ਵੀ ਕਿ ਉਹ ਇਹਨਾਂ ਸਰਕਾਰੀ ਮਸੰਦਾਂ ਨੂੰ ਗੁਰੂ ਘਰਾਂ ਦੇ ਪ੍ਰਬੰਧ ਤੋਂ ਲਾਂਭੇ ਕਰਨ ਤੇ ਸਿੱਖੀ ਸਿਧਾਂਤਾਂ ਤੇ ਸਾਡੇ ਪੁਰਖਿਆਂ ਦੀਆਂ ਬਣਾਈਆਂ ਜਾਇਦਾਦਾਂ ਬਚਾਉਣ ਲਈ ਅੱਗੇ ਆਉਣ ।